Maariko 3 - ÎVUKU RÎA ÛVORO MWARO

Jesû nîwavonirie mûndû wonjete

¹ Wana rîngî Jesû nîwatonyire îvoerorî kûrîa kwarî na mûndû wonjete njara.

² Nao andû amwe arîa maarî kuo nîmaatuîragia ûndû ûrîa mangîmûthitanga naguo. Nao nîmekarire mamûroretie mûno nîguo moone kana nîakûvonia mûndû ûcio mûthenya wa thavatû.

³ Nake Jesû nîwerire mûndû ûcio wonjete njara atîrî, “Umîra ava mbere.”

⁴ Nîwacokire akîûria andû acio atîrî, “Watho wetû ûtwîtîkîrîtie twîkage atîa mûthenya wa thavatû? Ûtwîtîkîrîtie gûtethia kana kûnûva? Gûtethûra mûndû kuuma gîkuûrî kana kûûraga?” Nao nîmakirire.

⁵ Jesû nîwamaroririe arakarîte na arî na kîeva kîîngî mûno ngororî yake nîûndû wa ûrîa maaûmîtie ngoro ciao. Nîwacokire akîra mûndû ûcio wonjete njara atîrî, “Tambarûkia njara yaku.” Nake nîwamîtambarûkirie na îkîvua.

⁶ Nao Afarisai moona ûguo nîmaaumire îvoerorî, na makîthiî ndundu na Aerodia nîguo mavange ûrîa makûragithia Jesû.

Kîrîndî kîrîa kîarî vakuvî na îria

⁷ Jesû na arutwa ake nîmaaumire kûu na makîthiî îriarî rîa Galili.

⁸ Nao andû eengî nîmaamûrûmîrîre. Amwe maarî a kuuma Galili na engî a kuuma Judea, Jerusalemu, na mûringo wa Idumea, wana mûringo wa îrathîro wa rûnjî rwa Jorodani na kuuma vûrûrirî ûrîa wî vakuvî na matûûra ma Turo na Sidoni. Andû acio maathiîre kûrî Jesû nîûndû nîmeguîte maûndû marîa eekaga.

⁹ Na nîûndû wa ûrîa andû maarî eengî, Jesû nîwerire arutwa ake mamûvarîrîrie gatarû nîguo ndagatugutanue nîo.

¹⁰ Nake nîwavonetie andû eengî, na nîkîo arwaru onthe maavatîkanaga makîenda kûmûvutia.

¹¹ Na rîrîa rîonthe ngoma ciamwonaga, nîcietungumanagia nthî mbere yake na ikîmugagîrîria atîrî, “We nîwe Mûriû wa Ngai!”

¹² Jesû nîwakaanirie ngoma icio na vinya itikeere mûndû ûrîkû kana ûrîkû ke nîke û.

Jesû nîwathuurire atûmwa ake îkûmi na aîrî

¹³ Jesû nîwacokire akîambata kîrîmarî, na agîîtîra andû arîa eendire. Nao nîmaathiîre kûrî ke,

¹⁴ na akîthuura îkûmi na aîrî arîa aatuire atûmwa, nîguo mekaranagie nake, amatûmage makavunjie,

¹⁵ na methagîrwe na ûvoti wa kûrutûrûra ngoma.

¹⁶ Nao nî Simoni (ûrîa aatuîrîre rîîtwa akîmwîta Petero);

¹⁷ Jakuvu mûrû wa Zebedii na Johana mûrwang'ina na Jakuvu (arîa aatuîrîre rîîtwa akîmeeta, Boanerigesi, naguo ûguo nî ta kuga “Andû a marurumî,”);

¹⁸ Enderea, Filipu, Batholomayo, Mathaayo, Toma, Jakuvu mûrû wa Alufayo, Thadayo, Simoni Mûzeloti

¹⁹ na Judasi Mûsikariota, ûrîa wamûcukanîrîre.

Jesû na Belizebuli

²⁰ Jesû nîwacokire akînûka. Kîrîndî kîîngî nakîo nîkîagomanire ûndû ke na arutwa ake, matangîonire kamweke ga kûrîa irio.

²¹ Rîrîa andû a mûciî wao meeguire ûguo, nîmaathiîre kûmûnyita, nîûndû andû maugaga atî, “Nîagûrûkîte.”

²² Nao arimû amwe a watho, arîa maaumîte Jerusalemu maaugaga atîrî, “Arî na Belizebuli mûnene wa ndaimono! Belizebuli nîke ûmûvecaga ûvoti wa kûrutûrûra ndaimono.”

²³ Kwoguo Jesû nîwametire na akîmeera na ngerekano atîrî, “Caitani angîvota kûrutûrûra Caitani atîa?

²⁴ Ûthamaki wa wonthe ûngîîgaûkania, ûthamaki ûcio ndûngîvota kwîrûngamia.

²⁵ Wana mûciî ûngîîgaûkania, mûciî ûcio ndûngîvota kwîrûngamia.

²⁶ Kwoguo ûthamaki wa Caitani ûngîîgaûkania, ûthamaki ûcio ndûngîvota kwîrûngamia nîkwa ûngîthira.

²⁷ “Gûtirî mûndû ûngîtonya nyomba ya mûndû njamba na amûcune indo ciake atambîte kûmûthaîkania. Nwanga aambire kûmûthaîkania nîguo avote kûmûcuuna indo ciake.

²⁸ “Nîramwîra na ma atî, andû nîmakooverwa mevia mao monthe, wana irumi cionthe irîa maanaruma Ngai nacio.

²⁹ Nwatî mûndû wa wonthe, ûkaaruma Roho Mûtheru ndarî vingo akooverwa nîûndû nîwîkîte wîvia ûrîa ûtakoovanîrwa tene na tene.”

³⁰ (Jesû aaugire ûguo nîûndû andû amwe maaugaga atîrî, “Mûndû ûyû arî na ngoma.”)

Ng'ina wa Jesû na arîa maaciaranîrîtue na Jesû

³¹ Nake ng'ina wa Jesû na arîa maaciaranîrîtue na Jesû nîmaakinyire, makîrûngama vau nja na makîmûtûmanîra etwe.

³² Nakîo kîrîndî kîrîa gîekarîte nthî kîmûrigicîrîtie nîkîamwîrire atîrî, “Taroria nyûkwe na arîa mûciaranîrîtue nao marûngamîte varîa nja magîkûûria.”

³³ Nake Jesû nîwamaûririe atîrî, “Nyanya na arîa tûciaranîrîtue nao nî arîkû?”

³⁴ Na wa aroretie arîa meekarîte nthî vakuvî nake mamûrigicîrîtie, nîwamacokerie atîrî, “Nyanya na arîa tûciaranîrîtue nao, nî aya marî ava!

³⁵ Mûndû wa wonthe ûvingagia wendi wa Ngai, nîke mûrwaiya na mwarwaiya, na nîke nyanya.”