Maariko 16 - ÎVUKU RÎA ÛVORO MWARO

Kûriûka kwa Jesû

¹ Thavatû yavîtûka, Mariamu Mûmagidali, Salome na Mariamu ng'ina wa Jakuvu nîmaagûrire indo cianungaga waro nîguo mathiî makavake mwîrî wa Jesû.

² Mûthenya wa Jumaviri kîraûko tene riûa rîkîratha, aka acio nîmaathiîre mbîrîrarî.

³ Na marî njîrarî nîmaaûranagia atîrî, “Nû ûgaatûvingiritîria îthiga rîu rînene ûguo nîguo riumaume mûromorî wa mbîrîra?”

⁴ Nwatî rîrîa maaroririe, nîmoonire îthiga rîu rî rîvingiritie.

⁵ Na rîrîa maatonyire mbîrîrarî, nîmamakire mûno moona mwanake ekarîte nthî mwena wa ûrîo na ekîrîte nguo ndaca ya rangi îno njerû.

⁶ Mwanake ûcio nîwamerire atîrî, “Tigani kûmaka nîmbîcî mûracaria Jesû wa Nazarethi ûrîa ûraambirwe. Ke nîmûriûku! Ndarî ava. Taroriani! Ava nîvo maramwigîte.

⁷ Rîu thiîni kûrî arutwa ake mûtagûtigîrîra Petero na mûmeere atîrî, ‘Jesû nîakûthiî Galili mbere yenyu, na kûu nîkuo mûkaamwona wata ûrîa aamwîrire.’ ”

⁸ Nao aka acio nîmaamakire mûno na magîtetema. Kwoguo nîmaaumire mbîrîrarî mavinyûrîte. Nao matiera mûndû wana ûrîkû ûndû ûcio, nîûndû maarî na guoya. [

MÛRÎKÎRIE MÛRACA NA WA TENE WA ÎVUKU RÎA MAARIKO 16.9-20 Jesû nîwaumîrîre Mariamu Mûmagidali

⁹ Rîrîa Jesû aariûkire Jumaviri kîraûko tene nîwambire kuumîrîra Mariamu Mûmagidali ûrîa aarutîte ngoma mûgwanja. Nao aka acio nîmaathiîre kûrî Petero na arata ake na makîmava na njîra nguvî ûvoro wonthe ûrîa meerîtwe.

¹⁰ Nake Mariamu nîwathiîre kûrî arutwa a Jesû na akîmethîrîria makîrîraga na marî na kîeva. Na vuva wa ûguo Jesû ke mwene nîwatûmire arutwa ake mathiî mwena wa îrathîro na wa îthûîro makavecane ndûmîrîri îrîa ntheru na ya ûvonokio wa tene na tene.]

¹¹ Rîrîa Mariamu aameerire atî Jesû aarî mûriûku na atî ke aarî mûmwonu, matiamwîtîkia.

Jesû nîwaumîrîre arutwa ake aîrî

¹² Vuva wa ûguo Jesû nîwaumîrîre arutwa aîrî arî na mwonekere wîngî vîndî îrîa maathiîte ya mîgûndarî.

¹³ Nao nîmaacokire kûrî arutwa arîa engî na makîmera atî o nîmona Jesû nwatî matietîkia.

Jesû nîwaumîrîre arutwa ake îkûmi na ûmwe

¹⁴ Na mûthiiarî, Jesû nîwaumîrîre arutwa arîa îkûmi na ûmwe vîndî îrîa meekarîte metharî makîrîa irio. Nake nîwamatetirie mûno nîûndû wa gûtura wîtîkio, kûmia ngoro ciao na kûrega gwîtîkia arîa maamwonete ariûka.

¹⁵ Nake Jesû nîwamerire atîrî, “Thiîni nthî yonthe mûkavunjîrie andû onthe ûvoro mwaro.

¹⁶ Na mûndû wa wonthe ûgeetîkagia na avatithue nîakaavonoka. Nwatî mûndû wa wonthe ûtageetîkagia, nîagaatuîrwa Mûthenya wa Îtuîro.

¹⁷ Nao etîkia nîmakaavewa ûvoti wa kûringa ciama, wa kûrutûrûra ngoma kuuma kûrî andû na rîîtwa rîakwa na wa kwaria na nthiomi ng'eni.

¹⁸ Na mangîkaanyita njoka kana manyue ûrogi, itikaamacûkia. Nîmakaaigîrîra arwaru njara na mavone.”

Jesû nîwambatire îgûrû

¹⁹ Rîrîa Mwathani Jesû aarîkirie kûmarîria, nîwambatirue îgûrû na agîkara mwena wa ûrîo wa Ngai.

²⁰ Nao arutwa nîmaathiîre na makîvunjia ûvoro mwaro kûndû kuonthe. Nake Mwathani nîwethagîrwa arî vamwe nao na agekagîra ndûmîrîri yao vinya na njîra ya ciama irîa ciaringagwa.] [