Maariko 13 - ÎVUKU RÎA ÛVORO MWARO

Jesû nîwaririe ûvoro wîgiî kwomomorwa kwa hekarû

¹ Rîrîa Jesû aaumaga hekarûrî, mûrutwa ûmwe wake nîwamwîrire atîrî, “Mwarimû! Taroria ûrîa mathiga mama wana mîako îno înenevete!”

² Nake Jesû nîwamwîrire atîrî, “Nîûrona mîako îno mînene û? Gûtirî îthiga wana rîmwe rî ava rîgaatigwa rî îgûrû rîa rîrîa rîngî; monthe nîmakaagwîthua nthî.”

Mathîna na mînyamaaro

³ Rîrîa Jesû eekarîte nthî Kîrîmarî Kîam Mîtî ya Mîtamaiyû aroretie hekarûrî, Petero, Jakuvu, Johana na Enderea, nîmaathiîre kûrî ke marî oonga na makîmwîra atîrî,

⁴ “Ta twîre atîrî, maûndû mama mageekîka rî, na nî ndûî gîgaatwonia atî îvinda rîu nîrîkinyu rîrîa maûndû mama monthe makaavinga.”

⁵ Nake Jesû nîwameerire atîrî, “Îîmenyagîrîreni mûtikavîtithue nî mûndû wana ûrîkû.

⁶ Nîûndû andû eengî nîmagaaûka makiugaga atî nîo Mesaya na nîmakaavîtithia andû eengî.

⁷ Na rîrîa mûkeegua mûrurumo wa mbaara vakuvî namue, kana ûvoro wa mbaara îrîa îgaaûka, mûtikavavûke. Maûndû ta mama nwa nginya mekîke, nwatî ûcio tîguo mûthiia wa nthî.

⁸ Mavûrûri nîmakaarûa, namo mothamaki mathithûkanîre. Nîgûkaagîa na ithingithia kûndû kwîngî wana kûgîe na yûra. Maûndû mama nî ta Kîammbîrîria Kîam ûrûrû ûrîa mûndûmûka egucaga akîgîa na mwana.

⁹ “Îîmenyagîrîreni nîûndû nîmûkaanyitwa na mûcirithîrue ciamarî cia athuuri. Wana nîmûkaarivîrwa mavoerorî, na mûrûngamue mbere ya anene na athamaki nîûndû wakwa ûrî ta ûira kûrî o.

¹⁰ Nwatî mbere ya îvinda rîu rîkinye, nwa nginya andû onthe mavunjîrue ûvoro mwaro.

¹¹ Rîrîa mûkaanyitwa na mûcirithîrue ciamarî cia athuuri, mûtigatangîke mûgîîciria ûrîa mûkaauga. Vîndî îo yakinya, thiîni mûkaauga ûndû wa wonthe ûrîa mûkaavotithua nîûndû nî Roho Mûtheru ûkaaragia arî ndaarî yenyu.

¹² Mûndû nîakaanenganîra mûrwang'ina aûragwe, na mûthuuri anenganîre mwana wake. Nacio ciana nîigaaûkîrîra aciari a cio na imaûragithie.

¹³ Nao andû onthe nîmakaamûmena nîûndû wakwa. Nwatî mûndû ûrîa ûkaaûmîrîria nginya mûthiia nîakaavonokua.

Vingo ya mathîna

¹⁴ “Rîrîa mûkoona kîndû kîrîa kîrî mûgiro kîrî varîa gîtagîrîrwe nîkwîthîrwa kîrî.” (Mûndû ûrîa ûrathoma nîataûkîrwe nî ûrîa kûreerwa) “Vîndî îo andû arîa makeethîrwa marî Judea, nîmakaaûra mathiîte irîmarî.

¹⁵ Nake mûndû ûrîa ûkeethîrwa arî nyomba îgûrû, ndakavarûrûke kana atonye nyomba kûgîra kîndû Kîam athiî nakîo.

¹⁶ Mûndû ûrîa wî mûgûndarî ndagacokere nguo ciake mûciî.

¹⁷ Na kaî vîndî îo aka arîa makeethîrwa marî îvu wana arîa makeethîrwa makîongithia nîmakegua ûrûrû mwîngî-î!

¹⁸ Voyani Ngai nîguo maûndû mama matigekîke vîndî ya mvevo.

¹⁹ Nîûndû vîndî îo andû nîmakoona mathîna matanoneka kuuma rîrîa Ngai aambîrîrie kûmba nthî. Na gûtirî vîndî andû makaathînîka ta ûguo rîngî.

²⁰ Nwatî Mwathani nîanyivanyivîtie mîthenya ya mathîna mau, nîûndû wa andû ake arîa ethuurîrîte. Tiga nî ûguo gûtirî mûndû ûngîgaatigara.

²¹ “Vîndî îo mûngîkeerwa nî mûndû atîrî, ‘Taroria, ûyû nîke Mesaya’ kana amwîre, ‘Roriani! Ûrîa nîke Mesaya;’ mûtikamwîtîkie.

²² Nîûndû andû arîa metucaga Mesaya na arîa metucaga arathi nîmakeyumîria na monanie ciama na morirû nîguo kûngîvoteka mavîtithie andû arîa Ngai ethuurîrîte.

²³ Kwoguo îîmenyagîrîreni nîûndû nie nînamwîra maûndû mama mbere ya mekîke.

Gûka kwa Mûrû wa Mûndû

²⁴ “Mîthenyarî îo vîndî ya mathîna yavîtûka riûa nîrîgaatuîka nduma mweri ûtige kwara,

²⁵ njata igwe nthî kuuma îgûrû, na maavinya marîa marî îgûrû mainainue.

²⁶ Nake Mûrû wa Mûndû nîakoonekana agîûka arî matuurî, na arî na vinya nyîngî na riiri.

²⁷ Nake nîagaacoka atûme araika mathiî nthî yonthe makaûnganie andû arîa Ngai ethuurîrîte kuuma gîturi kîmwe Kîam nthî nginya kîrîa kîngî.

Kîthomo kuumana na Mûkûyû

²⁸ “Tathomani kuumana na mûkûyû mwone atî kavinda karîa mvûa ciaguo ciambîrîria kûruta mathangû, nîmûmenyaga atî vîndî ya mbura îrî vakuvî.

²⁹ Kwoguo rîrîa mûkoona maûndû mama magîkîka nîmûkaamenya atî Mûrû wa Mûndû arî vakuvî.

³⁰ Nîramwîra na ma atî, rûciaro rûrû rûtikaathira maûndû mama monthe matarî mekîku.

³¹ Îgûrû na nthî nîikaathira, nwatî ciugo ciakwa itikaathira.

Gûtirî mûndû wîcî mûthenya kana îthaa

³² “Gûtirî mûndû wîcî mûthenya ûcio kana îthaa rîu rîgaakinya rî. Araika arîa marî îgûrû wana nginya Mûriû matiîcî, nwatî Ngai tu nîke wîcî.

³³ Îkaragani mwîvarîrîtie, nîûndû mûtiîcî rîrîa kavinda kau gagaakinya.

³⁴ Gûkeethîrwa gwîkariî ta ûrîa mûndû akiuma mûciî athiî rûgendo atigaga agaîra ndungata ciake mawîra, wa ndungata wîra wake, na agacoka akeera mûrangîri arangîre mûciî.

³⁵ Kwoguo îîmenyagîrîreni nîûndû mûtiîcî kavinda karîa mwene mûciî agaacoka. Avota gûgaacoka kîvwaîrî, kana ûtukû gatagatî, kana ngûkû îkîgamba, wana kana kîraûko riûa rîkîratha.

³⁶ Kwoguo îîmenyagîrîreni nîguo angîûka wa rîmwe, ndakamwîthîrîrie mûrî toro.

³⁷ Na ûguo nîramwîra, nwaguo nîrera andû onthe atî: Îîmenyagîrîreni!”