Maariko 12 - ÎVUKU RÎA ÛVORO MWARO

Ngerekano ya Arîmi arîa maakomborete mûgûnda wa Mîthavibu

¹ Jesû nîwambîrîrie kûthomithia andû na ngerekano na akîmeera atîrî, “Vîndî îmwe kwarî na mûndû wavandire mîthavibu mûgûndarî wake. Nîwawirigîre, akînja îrima rîa kîndû gîa kûvivîra ndivei, na agîtuma nyomba ya arangîri. Nîwacokire agîûkomborithia arîmi na akîthiî vûrûrirî wîngî.

² Rîrîa kavinda ga gûketha thavibu gaakinyire, mûndû ûcio nîwatûmire ngombo yake kûrî arîmi acio, nîguo îmûgîrîre îgai rîake rîa maketha.

³ Nao arîmi acio nîmaanyitire ngombo îo, makîmîriva na makîmîcokithia njara ntheri.

⁴ Nake mwene mûgûnda nîwacokire agîtûma ngombo îngî. Nao arîmi acio nîmaamîtivangirie kîongo, na makîmîka maûndû ma ûûra nthoni.

⁵ Mwene mûgûnda nîwacokire agîtûma ngombo îngî, nao makîmîûraga. Arîmi acio nîmaatûmîrwe ngombo ciîngî nyîngî, imwe makîiriva na ciîngî magîciûraga.

⁶ Mûndû ûcio ndaarî na mûndû wîngî wa gûtûma tiga mûvîcî wake wa mûmwe ûrîa eendete mûno. Na mûthiiarî nîwatûmire mûvîcî kûrî arîmi acio akiugaga atîrî, ‘Nîmbîcî nîmakûva mûvîcîwa gîtîîo!’

⁷ Nwatî arîmi acio nîmeeranire atîrî, ‘Ûyû nîke ûgaatigîrwa mûgûnda ûyû wî îgai rîake. Ûkani tûmûrage nîguo îgai rîu rîake rîtuîke rîetû.’

⁸ Kwoguo nîmaamûnyitire, makîmûûraga na magikia mwîrî wake nja ya mûgûnda ûcio.

⁹ “Mûreciria mwene mûgûnda ûcio agaacoka eke arîmi acio atîa? Agaaûka amaûrage, na akomborithie arîmi engî mûgûnda ûcio.

¹⁰ Nie nî na ma nîmûthomete mandîkorî atî ‘Îthiga rîrîa rîaregirwe nî atumi a nyomba, nîrîo rîtuîkîte rîa vata mûno, gûkîra marîa mengî monthe.

¹¹ Nî Mwathani wekire ûguo; naguo tûrawona wî ûndû wa magegania!’ ”

¹² Nao anene a Ayahudi nîmaageririe kûmûnyita nîûndû nîmaamenyire atî nî ûvoro wao Jesû aaragia na ngerekano îo. Nwatî nîmeetigîre kîrîndî na kwaguo makîmûtiga na makîîthiîra.

Kîûria kîgiî îrîvi rîa gooti

¹³ Afarisai amwe na andû amwe a Kîamma Kîam Herode (nîo metagwa Aherodia) nîmaatûmirwe kûrî Jesû nîguo mamûtege na ciûria akîaria.

¹⁴ Nao nîmaathiîre kûrî ke na makîmwîra atîrî, “Mwarimû, tue nîtwîcî atî we waragia ûma ûtakûmakua nî ûrîa andû magwîciria. Ndwendaga kûmenya mûndû nî wa ngathî îrîkû, nwatî nîûthomithagia andû ûma wîgiî wendi wa Ngai. Tatwîre atîrî, watho wetû nîûtwîtîkîrîtie tûrutîre mûthamaki wa Roma gooti? Tûrutage gooti kana tûtikarutage?”

¹⁵ Nwatî Jesû nîwamenyire atî maarî na ûvinga na akîmaûria atîrî, “Mûrangeria nîkî? Tanengerani mbeca nîmîrorie.”

¹⁶ Nao nîmaamûnengere mbeca, na akîmaûria atîrî, “Mbica îno, na rîîtwa rîîrî nî cia û?” Nao nîmaamûcokerie atîrî, “Nî cia Mûthamaki wa Roma.”

¹⁷ Kwoguo Jesû nîwamerire atîrî, “Rutagîrani mûthamaki wa Roma kîrîa kîthagîrwa kîrî gîake, na mûrutagîre Ngai kîrîa kîthagîrwa gî gîake.” Nao andû nîmaamakire nîûndû wa ûrîa aamacokerie.

Kîûria kîgiî kûriûka

¹⁸ Nao Asadukai arîa maugaga atî akuû matikaariûka nîmaathiîre kûrî Jesû na makîmwîra atîrî,

¹⁹ “Mwarimû, Musa aatwandîkîre watho waugaga atîrî, ‘Mûthuuri angîkua na atige mûka matagîte mwana nake, nwanginya mûrwang'ina athambie mûndûmûka ûcio wa ndigwa na magîa ciana, ciîtanague na mûthuuriwe ûrîa wakwire.’

²⁰ Rîu-î, vîndî îmwe kwarî na anake mûgwanja a ng'ina ûmwe; ûrîa warî mûkûrû nîwavikanirie na vuvarî agîkua matagîte ciana na mûka.

²¹ Nake wa kaîrî nîwavikirie mûndûmûka ûcio, na agîkua matagîte ciana. Na gûgîtuîka wa ûguo kûrî wana wa kathatû.

²² Na onthe mûgwanja nîmaamûvikirie na magîkua matagîte ciana nake. Na mûthiiarî mûndûmûka ûcio wa nake nîwakwire.

²³ Rîu-î, rîrîa akuû onthe makaariûka-î, mûndûmûka ûcio agaatuîka wa û na anake acio onthe mûgwanja nîmaamûvikîtie?”

²⁴ Nake Jesû nîwamacokerie atîrî, “Na kaî mûrî aritu-î! Na gîtûmi nî atî mûtiîcî mandîko kana vinya wa Ngai.

²⁵ Nîûndû rîrîa akuû makaariûka, mageekara ta araika arîa marî îgûrû kwa Ngai na matikaavikania kana mavikue.

²⁶ Naguo ûvoro wîgiî kûriûkua gwa akuû-î, anga mûtiathoma îvukuurî rîa Musa gîcunjî kîrîa kîgiî kîvînga kîrîa gîaakanaga mwaki? Gîcunjîrî kîu kwandîkîtwe ûrîa Ngai aarîrie Musa akîmwîra atîrî, ‘Nie nînie Ngai wa Iburahimu, Ngai wa Isaka, na Ngai wa Jakovu.’

²⁷ Mue mûvîtîtie mûno nîûndû ke nî Ngai wa arîa marî mwoyo, tî Ngai wa arîa akuû.”

Rîathani rîrîa rînene

²⁸ Navo vaarî na mwarimû ûmwe wa watho wamathikîrîrîtie makîaranîria. Na rîrîa eegwire ûrîa Jesû aacokerie Asadukai waro, nîwamûririe atîrî, “Nî rîathani rîrîkû rîrî vata mûno makîria ya marîa mengî monthe?”

²⁹ Nake Jesû nîwamûcokerie atîrî, “Rîathani rîrîa rîrî vata gûkîra marîa mengî monthe nî rîîrî, ‘Tathikîrîriani mue andû a Isiraeli! Mwathani Ngai wetû nîke Mwathani tu.

³⁰ Kwoguo endaga Mwathani Ngai waku na ngoro yaku yonthe, na mwoyo waku wonthe, na meciria maku monthe wana vinya yaku yonthe.’

³¹ Narîo rîa kaîrî nî rîîrî, ‘Enda mûndû ûrîa mûriganîtie nake wata ûrîa wîendete we mwene.’ Gûtirî rîathani rîngî rîrî vata gûkîra mama maîrî!”

³² Nake mwarimû ûcio wa Watho nîwerire Jesû atîrî, “Mwarimû, nîwacokia waro! Nî ma atî Ngai nîke Mwathani tu na gûtirî Ngai wîngî tiga ke.

³³ Na mûndû kwenda Ngai na ngoro yake yonthe, na ûûgî wake wonthe, na vinya yake yonthe, wana kwenda mûndû ûrîa mariganîtie nake wata ûrîa eyendete ke mwene, nîgûkîrîte kûrutîra Ngai magongoona ma kûvîvua wana ma mîthemba îrîa îngî yonthe.”

³⁴ Rîrîa Jesû oonire mûndû ûcio acokia waro nîwamwîrire atîrî, “We ndûrî varaca na Ûthamaki wa Ngai.” Na kuuma kavinda kau gûtirî mûndû waûmîrîrie kûmûria kîûria kîngî.

Kîûria kîgiî Mesaya

³⁵ Rîrîa Jesû aathomithanagia hekarûrî, nîwaûririe atîrî, “Arimû a Watho maugaga Mesaya nî wa mbarî ya Daudi nîkî?

³⁶ Daudi nîwavotithirue nî Roho Mûtheru kuga atî: ‘Ngai-Mûnene nîwerire Mwathani wakwa atîrî: Îkara nthî mwena wakwa wa njara ya ûrîo, nginya rîrîa ngaatûma ûthige nthû ciaku na magûrû maku.’

³⁷ Angîthîrwa Daudi ke mwene eetire Mesaya Mwathani, Mesaya angîthîrwa arî wa mbarî ya Daudi atîa?” Navo vaarî na andû eengî mûno maathikîrîrîtie Jesû makenete.

Îîmenyagîrîreni mûtigatuîke ta Arimû a Watho

³⁸ Rîrîa aamathomithagia nîwamerire atîrî, “Îîmenyagîrîreni mûtigatuîke ta arimû a Watho arîa mendete kûthiî mekîrîte nguo ndaca na gûkethua na gîtîîo thokorî,

³⁹ na mendete kwîthuurîra itî cia mbere mavoerorî na gwîkarîra itî cia ageni a gîtîîo marugarî.

⁴⁰ Aya nwao mathithûkagîra aka a ndigwa mîciîrî yao, makamacuna indo ciao cionthe, na makeyonania ûrîa marî aro na njîra ya kûracavia mavoya. Nao nîmagaatuîrwa îvera rînene.”

Mûvothi wa mûndûmûka wa ndigwa

⁴¹ Rîrîa Jesû eekarîte nthî hekarûrî vakuvî na varîa andû maavothagîra, nîwaroririe andû makîvotha. Nacio itonga nyîngî nîciarekirie mbeca nyîngî mûno.

⁴² Nake mûndûmûka wa ndigwa mûthîni, nîwarekirie tûtuururu twîrî na mwîgana watuo warî ta kîng'otore kîmwe.

⁴³ Nake Jesû nîwetire arutwa ake na akîmeera atîrî, “Nîramwîra na ma atî mûndûmûka ûyû wa ndigwa mûthîni nîwarekia mbeca nyîngî kathandûkûrî ka mûvothi gûkîra acio engî onthe.

⁴⁴ Nîûndû acio engî onthe marekia matigari ma ûtonga wao, nwatî ûyû athînîte ûguo athînîte, arekia mbeca cionthe irîa ararî nacio mûthithûrî wake.”