Maariko 11 - ÎVUKU RÎA ÛVORO MWARO

Jesû nîwatonyire Jerusalemu arî na ûvootani

¹ Rîa Jesû na arutwa ake maakuvîvîrie îtûûra rîa Jerusalemu, na magîkinya krîmarî Kîam mîtî ya Mîtamaiyû, kîrîa Kîamrî vakuvî na matûûra ma Bethifage na Bethania, Jesû nîwatûmire arutwa ake aîrî mathiî mbere, na akîmeera atîrî,

² “Thiîni gîcagirî kîîrîa kîrî mbere yenyu, na mwakinya kuo warîo, nîmûkwona njaû ya mvunda îtaanakuua mûndû îthaîkîtwe vau nja. Mîthaûreni mûmîrete ava.

³ Na mûngîûrua nî mûndû gîtûmi gîa gwîka ûguo, mwîreni, ‘Mwathani nîamîvatarîte na nîakûmûcokeria narua.’ ”

⁴ Kwoguo andû acio aîrî nîmaathiîre na makîthîra njaû îthaîkîtwe vau nja ya nyomba. Na rîrîa maamîthaûraga,

⁵ andû amwe arîa maarûngamîte vo nîmaamaûririe atîrî, “Mûrathaûra njaû îo nîkî?”

⁶ Nao arutwa acio nîmaamacokerie wata ûrîa Jesû aamerîte, na andû acio makîmetîkîria mathiî nayo.

⁷ Nao arutwa nîmaavirire njaû îo kûrî Jesû, makîmigîrîra nguo ciao, nake akîmîkarîra.

⁸ Nao andû eengî nîmaatandîkire nguo ciao njîrarî na engî makiuna mathîgî kîthakarî na makîmatandîka njîrarî.

⁹ Nao andû arîa maarî mbere ya Jesû na arîa maamumîte vuva, nîmaambîrîrie kugîrîria atîrî, “Ngai arokumua! Ngai arorathima ûrîa ûkîte na rîîtwa rîa Mwathani!

¹⁰ Ngai arorathima ûthamaki wa îthe wetû Daudi. Ngai arokumua!”

¹¹ Jesû nîwakinyire Jerusalemu na agîtonya hekarûrî. Na rîrîa aaroririe kûu hekarûrî kuonthe, nîwaumire kuo, na akîthiî Bethania marî na arutwa ake îkûmi na aîrî nîûndû kwarî gûtuku.

Jesû nîwarumire mûkûyû

¹² Mûthenya ûcio wîngî warûmîrîrîte, rîrîa Jesû na arutwa ake maaumîte Bethania, Jesû aarî mûvûtu.

¹³ Na rîrîa oonire mûkûyû ûrî varaca na ûrurîte waro, nîwathiîre kwona kana warî na ngûyû. Nwatî rîrîa aakinyire varî guo, nîwonire atî ndwarî na ngûyû tiga mathangû tu, nîûndû kau tîko kaarî kavinda kaguo ga gûciara.

¹⁴ Nake Jesû nîwerire mûkûyû ûcio atîrî, “Gûtirî mûndû ûkaarîa ngûyû rîngî ciumîte kûrî we!” Nao arutwa ake nîmeguire akiuga ûguo.

Jesû nîwatonyire hekarûrî

¹⁵ Rîrîa Jesû na arutwa ake maakinyire Jerusalemu, Jesû nîwatonyire hekarûrî na akîambîrîria kûrutûrûra andû onthe arîa meendagia, wana arîa maagûraga. Nîwang'aûranirie metha cia andû arîa maakûrananagia mbeca wana itî cia andû arîa meendagia ndutuura.

¹⁶ Nake Jesû ndangîetîkîririe mûndû wana ûrîkû avîtûkîrîrie kîndû wana kîrîkû hekarûrî.

¹⁷ Nîwacokire akîthomithia andû atîrî, “Ngai augîte mandîkorî atî, ‘hekarû yakwa îgetagwa nyomba ya kûvoyagîrwa nî andû a ndûrîrî cionthe.’ Nwatî mue mûmîtuîte ngurunga ya acunani.”

¹⁸ Rîrîa anene a athînjîri-Ngai na arimû a watho meeguire ûvoro ûcio, nîmaambîrîrie gûcaria ûrîa mangîmûûraga. Nao nîmaamwîtigagîra nîûndû kîrîndî nîkîamakagua mûno nî mûthomithanîrie wake.

¹⁹ Na kîvwaî gîakinya, Jesû na arutwa ake nîmaaumire Jerusalemu.

Kîthomo kuumana na mûkûyû

²⁰ Mûthenya ûcio wîngî kîraûko macangîa rîrîa Jesû na arutwa ake maathiîte na njîra, nîmoonire mûkûyû wî mûmû kuuma mathangûrî nginya mîrirî.

²¹ Nake Petero nîwaririkanire ûrîa gwekîkîte na akîîra Jesû atîrî, “Mwarimû, taroria! Mûkûyû ûrîa ûrarumire nî mûmû!”

²² Nake Jesû nîwamacokerie atîrî, “Îtîkiani Ngai.

²³ Nîramwîra na ma atî, mûndû wa wonthe nwa eere kîrîma gîkî, ‘Îkûûre na wîikie îriarî.’ Ke nwa avingîrue ûndû ûyû angîthîrwa ndarî na nganja ngororî yake, nwatî nîetîkîtie atî ûndû ûcio auga nîûgûtuîkîka.

²⁴ Kwoguo nîramwîra atî, ûndû wa wonthe mûngîtia rîrîa mûkûvoya, îtîkagiani atî nîmûrîkîtie kûvingîrua, namue mûkaavecagwa kîndû wa kîonthe kîrîa mûkaavoyaga.

²⁵ Rîrîa rîonthe mûrûngamîte mûkîvoya, ovagîrani andû onthe arîa mamûvîtîrîtie nîguo îthe wenyu ûrîa wî îgûrû wa nake amwovagîre mevia menyu.” [

²⁶ Nwatî mûngîrega kwovanîra, wana îthe wenyu ûrîa wî îgûrû ndangîmwovera mevia menyu.]

Kîûria kîgiî Wathani wa Jesû

²⁷ Jesû na arutwa ake nîmaakinyire Jerusalemu rîngî. Rîrîa Jesû aathiîrîrîte kûu hekarûrî, anene a athînjîri-Ngai, arimû a Watho na athuuri, nîmaathiîre kûrî ke

²⁸ na makîmûûria atîrî, “Ûreka maûndû mama na wathani ûrîkû, na nû ûkûvete wathani ûcio?”

²⁹ Nake Jesû nîwamacokerie atîrî, “Nîngûmûria kîûria kîmwe tu, na mwanjokeria nîngûmwîra mbîkaga maûndû mama na wathani ûrîkû.

³⁰ Tambîrani atîrî, Johana aavatithanagia na wathani ûrîkû, warî wa kuuma kûrî Ngai kana kûrî andû?”

³¹ Nao nîmaambîrîrie gûkararania makîûranagia atîrî, “Nîtuga atîa? Wona twamûcokeria, ‘Warî wa kuuma kûrî Ngai,’ nîatûûria atîrî, ‘Mwaregire gwîtîkia Johana nîkî vi?’

³² Nwatî wona twamûcokeria atî, ‘Warî wa kuuma kûrî andû ...’ ” (Nao nîmeetigagîra nîûndû andû meetîkîtie atî Johana aarî mûrathi wa ma.)

³³ Kwoguo nîmaacokerie Jesû atîrî, “Tue tûtiîcî.” Nake Jesû nîwamerire atîrî, “Wa nanie ndikûmwîra mbîkaga maûndû mama na wathani ûrîkû.”