Maariko 10 - ÎVUKU RÎA ÛVORO MWARO

Jesû nîwathomithanirie ûvoro wîgiî gûtecana kwa mûthuuri na mûka

¹ Jesû nîwaumire kûu Kaperinaumu, akîthiî vûrûrirî wa Judea, na akîringa mûringo ûcio wîngî wa rûnjî rwa Jorodani. Nakîo kîrîndî nîkîamûrigicîrie rîngî, na agîkîthomithia wata ûrîa aamenyerete.

² Nao Afarisai amwe nîmaathiîre kûrî ke makîenda kûmûgeria na makîmûûria atîrî, “Watho wetû nîwîtîkîrîtie mûthuuri ate mûka?”

³ Nake Jesû nîwamaûririe atîrî, “Musa aamwîrire mûvingagie watho ûrîkû?”

⁴ Nao nîmaamûcokerie atîrî, “Musa nîwetîkîrîtie mûthuuri andîkîre mûka maarûa ya kûmûta na acoke amûte.”

⁵ Jesû nîwamerire atîrî, “Musa aamwandîkîre watho ûcio nîûndû mwarî na ngoro nyûmû.

⁶ Nwatî kuuma Kîammbîrîria gîa kûmbwa kwa nthî, wa ta ûrîa kwîrîtwe mandîkorî atîrî, ‘Ngai aaûmbire mûndûmûrûme na mûndûmûka.

⁷ Na nîûndû wa gîtûmi gîkî mûndûmûrûme agaatigaga îthe na ng'ina na makanyitithanua na mûka,

⁸ na oîrî magatuîka kîndû kîmwe.’ Matigaacokaga gûtuîka aîrî rîngî nîûndû makethagîrwa marî mwîrî ûmwe.

⁹ Kwoguo andû arîa Ngai anyitithanîtie, mûndû wana ûrîkû ndakanamatigithanie.”

¹⁰ Rîrîa maacokire nyomba, arutwa nîmaaûririe Jesû ûndû ûcio wa rîngî.

¹¹ Nake Jesû nîwamacokerie atîrî, “Mûthuuri wa wonthe ûgaata mûka, na acoke avikie mûndûmûka wîngî, nî atharîtie.

¹² Nake mûndûmûka ûrîa ûtecaga mûthuuriwe na akavikua nî mûthuuri wîngî, wa nake nî atharîtie.”

Jesû nîwarathimire twana

¹³ Nao andû amwe nîmaavirîre Jesû twana nîguo atwigîrîre njara, nwatî arutwa ake makîmakaania.

¹⁴ Rîrîa Jesû oonire ûguo nîwarakarire na akîîra arutwa ake atîrî, “Îtîkîriani twana tûke kûrî nie, tigani gûtûgiria, nîûndû Ûthamaki wa Ngai nî wa arîa mekariî ta tuo.

¹⁵ Nîramwîra na ma atî mûndû wa wonthe ûtetîkagîra Ûthamaki wa Ngai ta kaana, ndagaaûtonya.”

¹⁶ Jesû nîwacokire agîoca twana, agîtûkumbata, agîtwigîrîra njara ciake na agîtûrathima.

Mûndû warî mûtongu

¹⁷ Rîrîa Jesû aambagîrîria kûthiî rûgendo, mûndû ûmwe nîwavinyûrire varî ke, agîturia maru mbere yake na akîmwîra atîrî, “Mwarimû Mwaro, nîngîka atîa nîguo ngaagaîrwa mwoyo wa tene na tene?”

¹⁸ Nake Jesû nîwamûûririe atîrî, “Ûrambîta mwaro nîkî? Gûtirî mûndû mwaro tiga Ngai wenga.

¹⁹ We nîwîcî maathani ma Ngai: ‘Ndûkanaûragane; ndûkanatharanie; ndûkanaîe; ndûkanaigîrîre mûndû kîng'enyo; ndûkanaveenanie; tîîa aguo na nyûkwe.’ ”

²⁰ Nake mûndû ûcio nîwerire Jesû atîrî, “Mwarimû, maathani mama monthe nîmathîkîrîte kuuma wa nî mûndû mwîthî.”

²¹ Nake Jesû aroria mûndû ûcio nîwegwire amwenda na akîmwîra atîrî, “Kûrî na ûndû ûmwe ûtigarîtie gwîka. Thiî wendie indo ciaku cionthe, ûve athîni mbeca icio na ûcoke ûnûmîrîre, nawe nî ûkwîigîra ûtonga mwîngî îgûrû.”

²² Rîrîa mûndû ûcio eegwire ûguo, nîwairire kîthithi, na akîthiî aritûvîrîtwe mûno ngororî yake, nîûndû aarî mûtongu mûno.

²³ Nake Jesû nîwaroririe arutwa ake na akîmeera atîrî, “Na kaî nî ûndû wî na vinya itonga gûtonya Ûthamakirî wa Ngai-î!”

²⁴ Nao arutwa nîmaamakire mûno nîûndû wa ciugo icio, nwatî Jesû nîwathiîre na mbere na kûmeera atîrî, “Ciana ciakwa, na kaî nî ûndû wî na vinya gûtonya Ûthamakirî wa Ngai-î.

²⁵ Nî ûndû mûvûthû ngamîîra gûtonyerera karimarî ga cindano gûkîra gîtonga gûtonya Ûthamakirî wa Ngai.”

²⁶ Nao arutwa megua ûguo nîmaamakire mûno na makîûrania atîrî, “Nî ûrîkû vi, ûngîvonoka?”

²⁷ Jesû nîwamaroririe na akîmeera atîrî, “Ûndû ta ûyû ndûngîvotekeka nî andû, nwatî maûndû monthe nîmavotekekaga nî Ngai.”

²⁸ Petero nîwacokire akîîra Jesû atîrî, “Mwathani tue tûtiganîrîtie indo cionthe cietû na tûgakûrûmîrîra.”

²⁹ Nake Jesû nîwamerire atîrî, “Nîramwîra na ma atî mûndû wa wonthe ûtigîte nyomba yake, na aa mûrwang'ina, aa mwarwang'ina, îthe kana ng'ina, kana ciana, wana kana mîgûnda, nîûndû wakwa na nîûndû wa ûvoro mwaro,

³⁰ nîakaagîa na ûtonga mwîngî rûciarorî rûrû, na acoke agîe na maita îgana, ma nyomba na ma aa mûrwang'ina, na aa mwarwang'ina; na aa ng'ina, na ciana, na mîgûnda na acoke anyamarue na vuva wa ûtûûro ûyû agîe na mwoyo wa tene na tene.

³¹ Nwatî andû eengî arîa marî mbere rîu, nîmagaatuîka a vuva, nao arîa marî vuva rîu, nîmagaatuîka a mbere.”

Jesû nîwaririe riita rîa kathatû ûvoro wîgiî gûkua gwake

³² Rîrîa Jesû na arutwa ake maambatîte mathiîte Jerusalemu, Jesû aarî mbere yao. Kwoguo arutwa ake nîmaamakîte mûno, nao andû arîa maamaumîte vuva magetigîra. Na wa rîngî Jesû nîwetire arutwa arîa îkûmi na aîrî ndundu na akîmeera maûndû marîa ageerie kwona.

³³ Jesû nîwameerire atîrî, “Tathikîrîriani! Twambatîte tûthiîte Jerusalemu kûrîa Mûrû wa Mûndû akûnenganîrwa kûrî athînjîri-Ngai arîa anene na arimû a watho. Nao nîmakaamûtuîra aûragwe na mamûnenganîre kûrî andû a ndûrîrî,

³⁴ arîa makaamûnyûrûria, mamûtuîre mata mamûrive na ivoko na mamûûrage, na vuva wa mîthenya îthatû ariûke.”

Îvoya rîa Jakuvu na Johana

³⁵ Nao Jakuvu na Johana, avîcî a Zebedii, nîmaathiîre kûrî Jesû na makîmwîra atîrî, “Mwarimû, kûrî na ûndû tûrenda ûtwîkîre.”

³⁶ Nake Jesû nîwamaûririe atîrî, “Mûrenda nîmwîkîre atîa?”

³⁷ Nao nîmaamûcokerie atîrî, “Vîndî îrîa ûgeekarîra gîtî Kîam ûnene Ûthamakirî waku ûrîa wîna riiri, tûrenda ûgaatwîtîkîria twîkare nawe, ûmwe mwena waku wa ûrîo na ûmwe mwena waku wa ûmotho.”

³⁸ Nwatî Jesû nîwameerire atîrî, “Mue mûtiramenya kîrîa mûravoya. Nîmûkûvota kûnyuîra gîkombe Kîam mînyamaaro kîrîa ngeerie kûnyuîra; kana mûvatithue na njîra îrîa ngeerie kûvatithua nayo?”

³⁹ Nao nîmaamûcokerie atîrî, “Ii nîtûkûvota.” Jesû nîwameerire atîrî, “Nî ma nîmûkûnyuîra gîkombe kîrîa ngûnyuîra, na mûvatithue na njîra îrîa ngûvatithua nayo,

⁴⁰ nwatî ndirî na ûvoti wa gûtua nî ûrîkû ûgeekara mwena wakwa wa ûrîo kana wa ûmotho. Ngai nîke ûkaavecana itî icio kûrî andû arîa aigîrîte.”

⁴¹ Na rîrîa arutwa arîa engî îkûmi meeguire ûguo, nîmaarakarire nîûndû wa Jakuvu na Johana.

⁴² Kwoguo Jesû nîwametire onthe vamwe na akîmeera atîrî, “Mue nîmûramenya atî andû arîa magîrîrwe nî gûtongoria andû a ndûrîrî nîmenenevagia,

⁴³ nwatî ûguo tîguo gûkwîthîrwa gwîkariî gatagatîrî kenyu. Mûndû wa wonthe ûngîenda gûtuîka mûnene gatagatîrî kenyu, nwa nginya atuîke ndungata ya arîa engî onthe.

⁴⁴ Na mûndû wa wonthe ûngîenda gûtuîka wa mbere, nwa nginya atuîke ngombo ya arîa eengî onthe.

⁴⁵ Nîûndû Mûrû wa Mûndû wa nake ndaaûka gûtungatîrwa, nwatî aaûkire gûtungata na kûvecana mwoyo wake ûtuîke wa gûkûûra andû engî kuuma meviarî.”

Jesû nîwavonirie mûtumumu wetagwa Baritimayo

⁴⁶ Nao nîmaakinyire Jeriko. Na rîrîa Jesû aaumire Jeriko marî na arutwa ake, wa vamwe na gîkundi kînene Kîam andû, nîmoonire mûtumumu wekarîte rûtererî rwa njîra akîvoyaga ûtethio. Na mûtumumu ûcio eetagwa Baritimayo (mûrû wa Timayo).

⁴⁷ Rîrîa mûtumumu ûcio eegwire atî nî Jesû wa Nazarethi wavîtûkîrîrîte vau, nîwaugîrîrie atîrî, “Jesû Mûrû wa Daudi, mbîguîra ntha!”

⁴⁸ Nao andû eengî maamwîgua nîmaamûgûkîre, nwatî ke nîwakîrîrîrie kugîrîria atîrî, “Mûrû wa Daudi, mbîguîra ntha.”

⁴⁹ Jesû nîwarûngamire na akîmeera atîrî, “Mwîteni.” Kwoguo nîmeetire mûtumumu ûcio na makîmwîra atîrî, “Îyûmîrîrie ûûkîre nîûndû Jesû nîaragwîta.”

⁵⁰ Nake mûtumumu ûcio nîwatecanirie nguo yake, akîrûngama wa rîmwe na akîthiî kûrî Jesû.

⁵¹ Nake Jesû nîwamûûririe atîrî, “Ûrenda ngwîkîre atîa?” Nake mûtumumu ûcio nîwamûcokerie atîrî, “Mwarimû! Nie nîrenda kwona!”

⁵² Nake Jesû nîwamwîrire atîrî, “Îîthiîre! Gwîtîkia gwaku nîkuo gwatûma ûvone.” Na kavinda wa kau mûtumumu ûcio nîwavotire kwona na akîrûmîrîra Jesû.