Maariko 1 - ÎVUKU RÎA ÛVORO MWARO

Mavunjio ma Johana Mûvatithania

¹ Gîkî nîkîo Kîammbîrîria Kîam Ûvoro Mwaro wîgiî Jesû Kristû, Mûriû wa Ngai

² Kwandîkirwe nî mûrathi Isaia: “Ngai aaugire atîrî, ‘Nie nîngûtûma mûnjaama wakwa athiî mbere yaku, na nîke ûgaakûthondekera njîra’;

³ Kûrî na mûndû ûranîrîra arî werûrî akiugaga atîrî, ‘Thondekani njîra ya Mwathani, na mûrûngarie tûcîra twake!’ ”

⁴ Nake Johana nîwathiîre werûrî akîvunjagia na akîvatithanagia. Nîweraga andû atîrî, “Îrireni mevia menyu na mûvatithue, nake Ngai nîakûmwovera mevia menyu.”

⁵ Nao andû eengî arîa maaumîte vûrûrirî wa Judea na îtûûrarî rîa Jerusalemu nîmaathiîre kûrî Johana nîguo mamûthikîrîrie. Nao nîmaaumbûrire mevia mao na makîvatithua nîke rûnjîrî rwa Jorodani.

⁶ Johana eekîraga nguo yarûthîtwe na guoya wa ngamîîra na akeyovaga mûcivi wa rûo kîûnûrî. Irio ciake ciarî ngige na ûûkî wa kîthaka.

⁷ Nîwavunjîrie andû na akîmeera atîrî, “Ûrîa ûgûka vuva wakwa nî mûnene kûngîra na nie ndirî mwagîrîru wa kûvota gûkuamîrîria nîmwovore iratû ciake.

⁸ Nîmûvatithagia na manjî, nwatî ke akaamûvatithagia na Roho Mûtheru.”

Kûvatithua na kûgerua kwa Jesû

⁹ Mîthenya mînini yavîtûka, Jesû nîwaumire îtûûrarî rîa Nazarethi vûrûrirî wa Galili na akîthiî kûvatithua nî Johana rûnjîrî rwa Jorodani.

¹⁰ Jesû aaumîra manjîrî warîo, nîwonire îgûrû rîavingûka na Roho Mûtheru akîmûnyûrûrûkîra ekariî ta ndutuura.

¹¹ Naguo mûgambo nîwaumire îgûrû ûkiuga atîrî, “We nîwe Mûrû wakwa ûrîa mendete, nîrîmûkenie mûno nîwe.”

¹² Na warîo Roho Mûtheru nîwatûmire athiî werûrî,

¹³ kûrîa eekarire mîthenya mîrongo îna, akîgeragua nî Caitani. Nîwekaranirie na nyamû cia kîthaka, nao araika makîmûtungatîra.

Jesû nîwetire ategi ana a nthamaki

¹⁴ Rîrîa Johana aavingîrwe njeera, Jesû nîwathiîre Galili akîvunjagia Ûvoro Mwaro wa Ngai,

¹⁵ akiugaga atîrî, “Kavinda nîgakinyu, naguo ûthamaki wa Ngai nîûkuvîvîrîtie! Îrireni mevia menyu na mwîtîkie Ûvoro Mwaro!”

¹⁶ Rîrîa Jesû aavîtûkagîra rûtererî rwa îria rîa Galili, nîwonire ategi aîrî a nthamaki, Simoni na mûrwang'ina wetagwa Enderea. Nao maategaga nthamaki na neti.

¹⁷ Nake Jesû nîwamerire atîrî, “Ûkani mûnûmîrîre na nîngûmûtua ategi a andû.”

¹⁸ Nao nî nîmatiganîrie neti ciao wa rîmwe, na makîmûrûmîrîra.

¹⁹ Nake Jesû athiîcathiîca vanini, nîwonire Jakuvu mûrû wa Zebedii, vamwe na mûrwang'ina wetagwa Johana marî gatarûrî magîtuma neti ciao.

²⁰ Rîrîa Jesû aamonire nîwametire. Nao nîmaatigire îthe wao Zebedii wa vamwe na andû ake a wîra marî gatarûrî, makîrûmîrîra Jesû.

Mûndû warî na ngoma

²¹ Jesû na arutwa ake nîmaathiîre îtûûrarî rîa Kaperinaumu. Na mûthenya wa thavatû wakinya nîwatonyire îvoerorî na akîambîrîria kûthomithia andû.

²² Nao andû arîa maamûthikîrîrîtie nîmaamakire nîûndû athomithanagia ta mûndû warî na wathani, nwatî tî ta arimû a Watho.

²³ Na vîndî wa îo, kûu îvoerorî nîgwatonyire mûndû wanyitîtwe nî ngoma, na akiugîrîria atîrî,

²⁴ “Ûrenda atîa natue we Jesû wa Nazarethi? Ûkîte gûtûthiria? Nîngwîcî we wî û. We wî ûrîa Mûtheru wa Ngai!”

²⁵ Nake Jesû nîwagûkirie ngoma îo na vinya na akîmîra atîrî, “Kira na ume gwîke!”

²⁶ Nayo ngoma îo nîyamwinainirie na vinya, agîkaa na mûgambo mûnene na îkînauma kûrîke.

²⁷ Nao andû onthe nîmaamakire na makîambîrîria kûrania atîrî, “Ûguo naguo-î nî atîa? Gîkî nakîo nîkwa gî kîthomo kîgeni? Mûndû ûyû aratha ngoma nacio ikamwathîkîra!”

²⁸ Na wa rîmwe ngumo ya Jesû nîyatambire kûndû kuonthe vûrûrirî wa Galili.

Jesû nîwavonirie andû eengî

²⁹ Jesû na arutwa ake nîmaaumire îvoerorî na magîtonya nyomba gwa Simoni na Enderea. Nake Jakuvu na Johana maarî vamwe nao.

³⁰ Na vîndî îo, ng'ina wa mûka wa Simoni aamamîte ûrîrî arwarîte mûrimû wa kûviûva mwîrî. Nake Jesû akinya wa rîo nîmaamûmenyithirie ûvoro wake.

³¹ Jesû amûkuvîvîria, nîwamûnyitire njara na akîmûrûngamia. Nake mûndû ûcio nîwegwire waro na akîambîrîria kûmatungatîra.

³² Na kîvwaîrî kîu riûa rîathûa, andû nîmaavirîre Jesû andû onthe arîa maarwarîte wana arîa maarî na ngoma.

³³ Nao andû onthe a îtûûra rîu, nîmaagomanire vau nja ya nyomba.

³⁴ Nake Jesû nîwavonirie andû eengî arîa maarwarîte mîrimû ya mîthemba mîîngî na akîrutûrûra ndaimono nyîngî. Nake ndaciîtîkîria ciarie nîûndû nîciamwîcî.

Jesû nîwavunjirie Galili

³⁵ Kîraûko macangîa Jesû aramûka, nîwaumire nyomba na akîthiî kûndû gûtaarî na andû kûvoya Ngai.

³⁶ Nake Simoni na arîa engî maarî nake, nîmaamûcaririe

³⁷ na mamwona makîmwîra atîrî, “Andû onthe nîmaragûcaria.”

³⁸ Nake Jesû nîwamerire atîrî, “Tigani tuume gûkû tûthiî na kûu icagirî irîa irî vakuvî nîguo ngavunjie kuo, nîûndû kîu nîkîo gîtûmi kîrîa gîatûmire mbûke.”

³⁹ Nake Jesû nîwathiîre Galili kuonthe akîvunjagîria andû mavoerorî na akîrutûrûraga ndaimono kuuma kûrî andû.

Jesû nîwavonirie mûndû warwarîte mûrimû mûcûku wa ngothi

⁴⁰ Mûndû ûmwe warwarîte mûrimû mûcûku wa ngothi nîwathiîre kûrî Jesû akîmûturîria maru na akîmûkaîra akîmwîra atîrî, “We ûngîenda nwa ûntherie.”

⁴¹ Nake Jesû nîwaringirwe nî ntha, agîtambûrûkia njara, akîmûvutia na akîmwîra atîrî, “Nie nîngwenda, Ûrothera!”

⁴² Na wa rîo mûrimû ûcio wa ngothi nîwamûthirire na akîthera.

⁴³ Nake Jesû nîwamwarîrie na vinya na akîmwîra atîrî,

⁴⁴ “Menyerera ndûkere mûndû wana ûrîkû ûvoro ûyû. Nwatî ûthiî ûkeyonanie kûrî mûthînjîri-Ngai na ûrute îgongoona rîrîa Musa aathanire nîguo rîtuîke ûira wa ma kûrî andû onthe atî we nîwatherua.”

⁴⁵ Nake mûndû ûcio aathiî, nîwaririe atagwîtigîra na agîtambia ûvoro ûcio mûno ûndû Jesû atangîatonyire îtûûrarî wanarî rîrîkû akîonagwa. Kwoguo Jesû nîwathiîre kûndû kwîthithu, nwatî wana arî kuo andû nwa maathiîcaga kûrî ke maumîte kûndû kuonthe.