Luka 9 - ÎVUKU RÎA ÛVORO MWARO

Jesû nîwatûmire arutwa arîa îkûmi na aîrî

¹ Jesû nîwetire arutwa ake vamwe na akîmava vinya na ûvoti wa kûrutûrûra ngoma cionthe wana wa kûvonia andû mîrimû.

² Nîwacokire akîmatûma mathiî makavunjie Ûvoro wa Ûthamaki wa Ngai na makavonie arwaru.

³ Nake Jesû nîwamerire atîrî, “Mûtigekuuîre kîndû wana kîrîkû rûgendorî rwenyu; mûtigakuue mûtiriî, mbooro, irio, mbeca wana kana nguo wana îmwe ya gûcenjia.

⁴ Na nyomba wa yonthe îrîa mûgaatonyaga na mûkagwatwa ûgeni, îkaragani kuo nginya rîrîa mûkaauma îtûûrarî rîu.

⁵ Na kûndû kuonthe kûrîa andû akuo matakaamûgwata ûgeni, mbere ya mume îtûûrarî rîu, îîrivarivageni rûkûngû magûrûrî menyu. Nakîo gîîko gîkî gîtuîkage ûira kûrî andû acio, atî ûndû ûcio ndûnamûkenia.”

⁶ Nao arutwa acio nîmaaumire vau na makîthiî icagirî cionthe makîvunjagia Ûvoro Mwaro na makîvonagia arwaru a kûndû kuonthe.

Herode nîwarigarirue nî ûvoro wa Jesû

⁷ Vîndî îrîa Herode ûrîa warî mûthamaki wa Galili eegwire maûndû monthe marîa meekîkaga, nîwarigarirue mûno nîûndû andû amwe maaugaga atî Johana Mûvatithania nîke ûriûkîte.

⁸ Andû arîa engî maaugaga atî Elija nîke wonekete, nao andû engî makaugaga atî mûrathi ûmwe wa arîa a tene nîke ûriûkîte.

⁹ Nake Herode nîwaugire atîrî, “Nie nînie narengithirie kîongo Kîam Johana. Kwoguo, mûndû ûyû wîngî nîregua ûvoro wake-î, nîkwa arî ke û?” Nake Herode nîwageragia ûrîa angîona Jesû.

Jesû nîwavaithirie andû ngiri ithano

¹⁰ Vîndî îrîa atûmwa maacokire nîmeerire Jesû maûndû monthe marîa meekîte. Nake Jesû nîwocire arutwa ake na akîmavira îtûûrarî rîa Bethisaida marî onga.

¹¹ Rîrîa andû maamenyire kûrîa Jesû aarî, nîmaamûrûmîrîrie. Nao andû acio makinya varîa Jesû aarî nîwamagwatire ûgeni na akîambîrîria kûmathomithia ûvoro wîgiî ûthamaki wa Ngai na agîcoka akîvonia arwaru eengî.

¹² Rîrîa riûa rîambîrîrie kûthûa, arutwa nî maakuvîvîrie Jesû na makîmwîra atîrî, “Îra andû aya mathiî icagirî na mîgûndarî îrîa îrî vakuvî, nîguo magacarie kîndû mangîrîa na kûndû mangîmama nîûndû gûkû tûrî gûtirî na mîciî.”

¹³ Nwatî Jesû nîwerire arutwa ake atîrî, “Mue manengereni kîndû mangîrîa.” Nao arutwa nîmaamûcokerie atîrî, “Tue tûtirî na irio ciîngî tiga mîgate îtano na nthamaki igîrî, tiga nwanga tûthiîre kûgûra irio cia kûrîwa nî andû aya onthe.”

¹⁴ (Vandû vau vaarî na arûme ta ngiri ithano.) Nake Jesû nîwerire arutwa ake atîrî, “Îrani andû mekare nthî marî ikundi ta cia andû mîrongo îtano.”

¹⁵ Nao arutwa nîmeerire andû onthe mekare nthî kûringana na ûrîa Jesû aamerire.

¹⁶ Vîndî wa îo, Jesû nîwocire mîgate îo îtano na nthamaki icio igîrî na atira metho na îgûrû, akîirathima, agîcoka akîenyûranga mîgate wana nthamaki icio na akînengera arutwa ake magaîre andû acio.

¹⁷ Rîrîa andû onthe maarîre na makîvaa, arutwa nîmaaûnganirie cienywa irîa ciatigarîte, na cienywa icio igîcûra ciondo îkûmi na igîrî.

Petero nîwaumbûrire Jesû

¹⁸ Mûthenya ûmwe rîrîa Jesû aavoyaga arî wenga, arutwa ake nîmaathiîre kûrî ke, nake akîmaûria atîrî, “Andû maugaga nie nîrî û?”

¹⁹ Nao arutwa nîmaamûcokerie atîrî, “Andû amwe maugaga atî we nîwe Johana Mûvatithania, arîa engî makauga atî we nîwe Elija, nao engî makauga atî we ûrî mûrathi ûmwe wa arîa a tene ûriûkîte.”

²⁰ Jesû nîwacokire akîmaûria atîrî, “Mue namue-î mugaga nie nîrî û?” Nake Petero nîwamûcokerie atîrî, “We nîwe Mesaya wa Ngai.”

Jesû nîwaririe ûvoro wîgiî kûthînua na gûkua gwake

²¹ Nake Jesû nîwamakaanirie na vinya atî matikere mûndû wa na ûmwe ûvoro ûcio,

²² na akîmeera atîrî, “Nwa nginya Mûrû wa Mûndû athînue mûno na aregwe nî athuuri, anene a athînjîri-Ngai, na arimû a Watho. Nake nîakaaûragwa na mûthenya wa kathatû acoke ariûke.”

²³ Jesû nîwacokire akîîra andû onthe atîrî, “Mûndû wa wonthe ûngîenda kûnûmîrîra, mbere nî ambe erege ke mwene na akuuage mûtharava wake wa mûthenya na acoke anûmîrîre.

²⁴ Nîûndû mûndû wa wonthe wendaga kûvonokia mwoyo wake nîaûtecaga, na mûndû wa wonthe ûtecaga mwoyo wake nîûndû wakwa, nîakaaûvonokia.

²⁵ Kûrî na vata ûrîkû wa mûndû kûgîa na ûtonga wa nthî ng'ima, na acoke aûrwe nî mwoyo wake?

²⁶ Mûndû wa wonthe ûconokaga nîûndû wakwa na nîûndû wa ndûmîrîri yakwa, ûcio nî agaaconokerwa nî Mûrû wa Mûndû rîrîa ke agaaûka na riiri wake, wa vamwe na riiri wa îthe na wa araika atheru.

²⁷ Nwatî nie nîramwîra na ma atî, ava varî na andû amwe matagaakua matambîte kwona Ûthamaki wa Ngai.”

Jesû nîwagarûrûkire mwonekere wake

²⁸ Naguo mûthenya wa kanana kuuma Jesû aaria maûndû mau, nîwocire Petero, Johana na Jakuvu na makîambata kîrîmarî îgûrû kûvoya.

²⁹ Vîndî îrîa Jesû aavoyaga, ûthiû wake nîwagarûrûkire, na nguo ciake nacio ikîambîrîria gûkengakenga.

³⁰ Wa rîmwe andû aîrî maarî vau makîaria nake. Andû acio maarî Musa na Elija.

³¹ Andû acio aîrî maarî na riiri na nîmaambîrîrie kwaria na Jesû ûvoro wîgiî gîkuû gîake, kîrîa aarî akue arî îtûûrarî rîa Jerusalemu.

³² Nake Petero vamwe na andû aîrî arîa maarî nake maarî toro, nwatî vîndî îo nîmaaramûkire na makîona Jesû arî na riiri na andû aîrî marûngamîte vamwe nake.

³³ Na vîndî îrîa andû acio maatigaga Jesû, Petero nîwerire Jesû atîrî, “Mwarimû, na kaî nî ûndû mwaro tûrî ava-î! Twîtîkîrie tûtume tûnyomba tûthatû: kamwe gaku, kamwe ka Musa na kamwe ka Elija.” (Nwatî ke aaririe ûguo atakûmenya ûrîa aaugaga.)

³⁴ Vîndî wa îo Petero wa aaragia, îtu nîrîaumîrire na rîkîmakunîkîra na kîruru Kîam rîo, na nî ûndû wa ûguo, arutwa nîmaagîre na guoya nyîngî.

³⁵ Naguo mûgambo nîwaumire îtuurî rîu ûkiugaga atîrî, “Ûyû nîke Mûrû wakwa ûrîa nîthuurîrîte, mûthikagîrîrieni!”

³⁶ Rîrîa mûgambo warîkirie kwîguîka, Jesû nîwonekire arî wenga. Nao arutwa ake nîmaakirire kivi na mîthenyarî îo matiera mûndû wana ûmwe ûvoro wîgiî maûndû marîa monthe moonete.

Jesû nîwavonirie kamwana karîa kaarî na ngoma

³⁷ Mûthenya ûcio warûmîrîrîte, Jesû na arutwa acio ake athatû nîmaanyûrûrûkire maumîte kîrîmarî îgûrû na Jesû agîtûngwa nî kîrîndî kîîngî.

³⁸ Nake mûndû ûmwe ûrîa warî kîrîndîrî kîu nîwaugîrîrie atîrî, “Mwarimû! Nie nakûthaitha ûririkane mûvîcîwa nîûndû ke nwake mwana wakwa wa mûmwe!

³⁹ Mavinda mamwe ngoma nthûku nîîmûnyitaga, nake agakaa wa rîmwe. Nayo ngoma îo nîtûmaga ke aikie nthari nginya akambîrîria kûruta mûvûû kanyuarî gake. Ngoma îo nîîcokaga îkauma kûrî ke kavora, nwatî rîrîa yauma nî îmûtigaga atuîkangîte.

⁴⁰ Nie nînthaithire arutwa aku mamîrutûrûre, nwatî matinavota.”

⁴¹ Jesû nîwacokirie atîrî, “Mue rûciaro rûrû rûtetîkîtie na rwîvia! Nîmbîkarania namue nginya rî? Na nîmûkirîrîria nginya rî?” Nake Jesû nîwacokire akîîra mûndû ûcio atîrî, “Rete mûvîcîguo ava!”

⁴² Vîndî îrîa kamwana kau kaathiîte kûrî Jesû, ngoma îo nîyakagwîthirie nthî, nako gakîambîrîria gwikia nthari. Nwatî Jesû nîwakaanirie ngoma îo, agîcoka akîvonia kamwana kau na agîkanenganîra kûrî îthe.

⁴³ Nao andû onthe nîmaamakire nîûndû wa ûvoti mûnene wa Ngai. Vîndî îrîa andû onthe maamakîte nîûndû wa maûndû monthe marîa Jesû eekaga, nîwerire arutwa ake atîrî,

Jesû nîwaririe rîngî ûvoro wîgiî gûkua gwake

⁴⁴ “Mûtikariganîrwe nî ûvoro ûyû ngeerie kûmwîra! Mûrû wa Mûndû nîakûnenganîrwa nîguo anyitwe nî andû.”

⁴⁵ Nwatî arutwa nao matiataûkîrwa nî ûrîa Jesû eendaga kuga. Ûndû ûcio warî mûthithe kuuma kûrî o nîguo matikaûmenye na nîmeetigagîra kûmûria ûrîa eendaga kuga.

Nî ûrîkû mûnene gûkîra arîa engî

⁴⁶ Nao arutwa nîmaagîre na ngarari gatagatîrî kao arutwa makîenda kûmenya nî ûrîkû mûnene gûkîra arîa engî.

⁴⁷ Nwatî rîrîa Jesû aamenyire ûrîa arutwa meciragia, nîwocire mwana, na akîmûrûngamia rwarurî rwake

⁴⁸ na akîmeera atîrî, “Mûndû wa wonthe ûgwataga mwana ûyû ûgeni nîûndû wa rîîtwa rîakwa, nînie ethagîrwa akîgwata ûgeni. Nake mûndû wa wonthe ûngwataga ûgeni, nî ûrîa wandûmire ethagîrwa akîgwata ûgeni. Mûndû ûrîa mûnini viû gatagatîrî kenyu muonthe, nîke mûnene gûkîra arîa engî onthe.”

Mûndû ûrîa ûtarî nthû yenyu nî wa thiritû yenyu

⁴⁹ Johana nîwerire Jesû atîrî, “Mwarimû, nîtûronire mûndû akîrutûrûra ngoma na rîîtwa rîaku, na twamûkaania nîûndû ke tî wa thiritû yetû.”

⁵⁰ Nwatî Jesû nîwacokerie Johana na arutwa acio engî atîrî, “Mûtiagîrîrwe nî kûmûkaania, nîûndû mûndû wa wonthe ûtarî nthû yenyu nî wa thiritû yenyu.”

Gîcagi kîmwe kîa Asamaria nîkîaregire kûgwata Jesû ûgeni

⁵¹ Rîrîa kavinda gaakuvîvîrie ka Jesû ambatue îgûrû, Jesû nîweciririe athiî Jerusalemu.

⁵² Nake nîwatûmire anjaama amwe mathiî mbere yake. Na rîrîa andû acio maathiîre nîmaatonyire gîcagirî kîmwe Kîam Asamaria kûmûvarîria maûndû monthe.

⁵³ Nao andû a gîcagi kîu nî maaregire kûmûnyita ûgeni nîûndû nîmaaicî cararûkû atî ke athiîte Jerusalemu.

⁵⁴ Rîrîa arutwa ake, Jakuvu na Johana maamenyire ûguo, nîmaamûririe atîrî, “Mwathani, nîûrenda tuge mwaki ûmanyûrûrûkîre kuuma îgûrû na ûmathirie?”

⁵⁵ Nwatî Jesû nîwavûgûkire na kûrîa maarî na akîmakaania.

⁵⁶ Nake Jesû na arutwa ake nîmaaumire kûu na makîthiî gîcagirî kîngî.

Andû arîa mangîatuîkire arûmîrîri a Jesû

⁵⁷ Rîrîa Jesû na arutwa ake maarî njîrarî mathiîte, nîmaatûnganire na mûndû ûmwe ûrîa werire Jesû atîrî, “Nie nîngûkûrûmîrîra wa kûrîa kuonthe ûkûthiî.”

⁵⁸ Nake Jesû nîwamûcokerie atîrî, “Mbwe ciîthagîrwa na marima, iconi ikethîrwa na ciomba, nwatî Mûrû wa Mûndû ndarî na vandû angîmama avurûke.”

⁵⁹ Nake Jesû nîwerire mûndû wîngî atîrî, “Nûmîrîra.” Nake mûndû ûcio nîwamûcokerie atîrî, “Mwathani, tiga nyambe nthiî ngathike vava.”

⁶⁰ Nake Jesû nîwamwîrire atîrî, “Tiga akuû mathike akuû ao. Thiî ûkanîrîre ndûmîrîri ya Ûthamaki wa Ngai.”

⁶¹ Nake mûndû wîngî nîwerire Jesû atîrî, “Mwathani, nie nîngûkûrûmîrîra, nwatî tiga nyambe njoke mûciî, nîguo ngeere andû etû matigwe na waro.”

⁶² Nake Jesû nîwerire mûndû ûcio atîrî, “Mûndû wa wonthe ûroragia na vuva vîndî îrîa ambîrîria kûrîma, tî mwagîrîru Ûthamakirî wa Ngai.”