Luka 24 - ÎVUKU RÎA ÛVORO MWARO

Kûriûka kwa Jesû

¹ Mûthenya wa Jumaviri kîraûko tene, aka arîa maaumîte Jesû vuva kuuma îtûûra rîa Galili nîmaathiîre mbîrîrarî makuuîte indo irîa maathondekete na cianungaga waro.

² Nao nîmeethîre îthiga rîrîa rîakunîkîte mbîrîra rîrî rîvingiritie.

³ Nwatî rîrîa maagukumire kûu mbîrîrarî matiethîra mwîrî wa Mwathani Jesû.

⁴ Rîrîa maarûngamîte kûu ndarî marigarîtue nî ndeto îo, arûme aîrî arîa meekîrîte nguo ciakengaga mûno, nîmaamaumîrîre wa rîmwe na makîrûngama rwarurî rwao.

⁵ Nao aka acio nîmaavavûkire na makînamia mothiû mao nthî. Nao arûme acio nîmaamerire atîrî, “Nîndûî kîratûma mûcarie mûndû ûrî mwoyo gatagatîrî ka arîa akuû?

⁶ Ke ndarî ava nîmûriûku. Taririkanani ûrîa aamwîrire vîndî îrîa aarî Galili, atî;

⁷ ‘Nwa nginya Mûrû wa Mûndû anenganîrwe kûrî evia, ambwe na mûthenya wa kathatû ariûkue.’ ”

⁸ Nao aka acio nîmaacokire makîririkana ciugo cia Jesû.

⁹ Nîmaaumire vau mbîrîrarî na makîthiî kûmenyithania maûndû mau monthe kûrî arutwa arîa îkûmi na ûmwe na kûrî andû onthe.

¹⁰ Mariamu Mûmagidali, Joana na Mariamu ng'ina wa Jakuvu na aka arîa engî maarî nao nîo maamenyithirie atûmwa ûvoro ûcio.

¹¹ Nwatî atûmwa matietîkia ûvoro ûcio nîûndû megucaga irî ng'ano. [

¹² Nwatî Petero nîwaûkîrire na akîvinyûra erekerete ya mbîrîrarî. Nake akinya vo nîwarorererie akuamîrîrîtie na akîona cuka îrîa yarigicîte mwîrî wa Jesû, nwatî ndoona kîndû kîngî. Petero nîwacokire akînûka amakîte nîûndû wa maûndû marîa meekîkîte.]

Rûgendo rwa kûthiî Emau

¹³ Na mûthenya wa ûcio arûmîrîri aîrî a Jesû maarî rûgendorî mathiîte gîcagirî Kîam Emau, kîrîa Kîamrî ta kilomita îkûmi na îmwe kuuma îtûûrarî rîa Jerusalemu.

¹⁴ Nao nîmaathiîre makîaragia ûvoro wîgiî maûndû monthe marîa meekîkîte.

¹⁵ Na rîrîa maaragîrîria maûndû marîa mekîkîte, Jesû ke mwene nîwamaumîrîre na akîthiîcania vamwe nao.

¹⁶ Nao nîmaamwonire nwatî matiamûmenya.

¹⁷ Nake Jesû nîwamaûririe atîrî, “Nî ûvoro ûrîkû mûthiîte mûkîaragia?” Nao nîmaarûngamire marî na kîeva kîîngî mûno.

¹⁸ Na ûmwe gatagatîrî kao, ûrîa wetagwa Kileopa nîwaûririe Jesû atîrî, “We nwawe mûgeni tu îtûûrarî rîîrî rîa Jerusalemu ûrîa ûtaicî maûndû marîa mekîkîte kuo mîthenyarî îno?”

¹⁹ Nake Jesû nîwamaûririe atîrî, “Nî maûndû marîkû?” Nao nîmaamûcokerie atîrî, “Maûndû megiî Jesû wa Nazarethi. Methorî ma Ngai na ma andû onthe mûndû ûcio ararî mûrathi ûrarî na ûvoti mûnene maûndûrî marîa araugaga na arekaga.

²⁰ Nao athînjîri-Ngai etû arîa anene na atongoria nîmaramûnenganîre kûrî anene a Roma, arîa maramûtuîrîre aûragwe na ambwe mûtharavarî.

²¹ Natue tûrevokete atî ke nîke ûkûvonokia andû a Isiraeli. Na makîria ya ûguo, ûyû rîu nîguo mûthenya wa kathatû kuuma maûndû mau mekîka.

²² Aka amwe a gîkundi gîetû nîmatûmakirie mûno nîûndû mathiîre mbîrîrarî kîraûko macangîa

²³ nwatî matinethîra mwîrî wa Jesû. Maûkire matwîra atî nîmonire kîoneki Kîam araika arîa mameerire atî Jesû arî mwoyo.

²⁴ Nao andû amwe a gîkundi gîetû mathiîre mbîrîrarî na methîra maûndû mekariî wata ûrîa aka acio maratûmenyithîtie, nwatî ke matinamwona.”

²⁵ Nake Jesû nîwacokirie atîrî, “Mue irimû ino mûtaviûvaga gwîtîkia na ngoro cienyu maûndû monthe marîa maarirue nî arathi!

²⁶ Na kinthî gûtiagîrîrîte Mesaya athînue nîguo acoke kwoneka arî na riiri wake?”

²⁷ Jesû nîwacokire akîmeereithia maûndû marîa mamwîgiî na maarîtue Mandîkorî Matheru, kwambîrîria na mavuku ma Musa nginya marîa maandîkirwe nî arathi onthe.

²⁸ Vîndî îrîa maakuvîvîrie gîcagi kîrîa mathiîte, Jesû nîwonekanire takwa eendaga kûthiî na mbere na rûgendo.

²⁹ Nwatî arûmîrîri acio nîmaamûthaithire makîmwîraga atîrî, “Îkarania natue nîûndû kûthiîte gûtuka.” Kwoguo Jesû nîwathûkirie na agîkarania nao.

³⁰ Jesû nîwekarire metharî vamwe nao, agîoca mûgate na akîûrathima, agîcoka akîwenyûranga na akîmava.

³¹ Namo metho mao nîmaavingûkire na makîmûmenya. Nake nîwacokire akîûrîra wa rîmwe na magîtiga kûmwona.

³² Nao nîmaambîrîrie kûrania atîrî, “Na kinthî ngoro cietû itikûrîrîmbûkaga vîndî îrîa agûtwaragîria na gûtûtaarîria Mandîko Matheru tûrî njîrarî?”

³³ Nao arûmîrîri acio nîmaaûkîrire vîndî wa îo na magîcoka Jerusalemu. Nîmeethîre arutwa arîa îkûmi na ûmwe magomanîte vamwe na arîa engî

³⁴ makiugaga atîrî, “Nî ma Mwathani nî mûriûku! Ke nîwîyonithanîtie kûrî Simoni!”

³⁵ Nao arûmîrîri arîa aîrî nîmaacokire makîmenyithia arutwa acio îkûmi na ûmwe a Jesû wa vamwe na andû acio engî maûndû marîa meekîkire marî njîrarî na ûrîa maamenyire Mwathani kavinda karîa eenyûrangire mûgate.

Jesû nîwaumîrîre arutwa ake

³⁶ Rîrîa arûmîrîri acio aîrî maamavecaga ûvoro ûcio, Jesû ke mwene nîwarûngamire gatagatîrî kao wa rîmwe na akîmeera atîrî, “Gîani na thayû!”

³⁷ Nao nîmegwire guoya mûno na makîmaka nîûndû meciragia atî nî ngoma moonaga.

³⁸ Nwatî Jesû nîwamaûririe atîrî, “Nîndûî kîratûma mwîtigîre? Nîndûî kîratûma mûgîe na nganja?

³⁹ Taroriani njara ciakwa na magûrû mwone atî nie nînie. Mvutiani na nîmûkwîîguîra nîûndû ngoma ndarî nyama kana mavîndî ta mama mûrona nîrî namo.” [

⁴⁰ Rîrîa aarîkirie kûmeera ûguo nîwamoonirie njara ciake wana magûrû make.]

⁴¹ Na rîrîa meekarîte ûguo matagwîtîkia nîûndû wa gûkena na kûmaka, Jesû nîwamaûririe atîrî, “Mûrî na kîndû kîngîrîwa?”

⁴² Nao nîmaamûvere kînuku Kîam nthamaki îno nduge,

⁴³ nake agîgîoca na agîkîrîa mamûroretie.

⁴⁴ Jesû nîwacokire akîmeera atîrî, “Maûndû mama nwamo nîramwîraga vîndî îrîa nîrethagîrwa nîrî vamwe namue. Maûndû marîa mambîgiî na mandîkîtwe Wathorî wa Musa, mandîkorî ma arathi, wana nginya Thaburirî nwa nginya mavingue.”

⁴⁵ Nake Jesû nîwamavotithirie gûtaûkîrwa nî Mandîko,

⁴⁶ na akîmeera: “Kwandîkîtwe atîrî, nwa nginya Mesaya athînue na mûthenya wa kathatû acoke ariûke.

⁴⁷ Na atî rîîtwarî rîake andû a ndûrîrî cionthe cia nthî, kwambîrîria îtûûrarî rîa Jerusalemu nwa nginya mavunjîrue ndûmîrîri ya Ngai, îgiî kwîrira nîguo moverwe mevia mao.

⁴⁸ Mue mûrî aira a maûndû mama.

⁴⁹ Nie nînie ngaamûtûmîra kîrîa Ngai Vava aamwîrîîre. Nwatî nwa nginya mwîkare gûkû îtûûrarî rîa Jerusalemu mwetererete nginya rîrîa mûkaagîa na vinya wa Ngai kuuma îgûrû.”

Jesû nîwambatirue îgûrû

⁵⁰ Jesû nîwamatongoririe makiuma kûu îtûûrarî rîu na makîthiî îtûûrarî rîa Bethania. Nîwacokire agîûkîrîria njara ciake na akîmarathima.

⁵¹ Na vîndî îrîa aamarathimaga, nîwamatigire na akîambatua îgûrû.

⁵² Nao arutwa ake nîmaamûgoocire na magîcoka îtûûrarî rîa Jerusalemu makenete mûno.

⁵³ Na mavinda mao monthe nîmeekaraga hekarûrî magîkumagia Ngai.