Luka 23 - ÎVUKU RÎA ÛVORO MWARO

Jesû nîwacirithirue nî Pilato

¹ Athuuri onthe a Kîamma nîmaaûkîrire na makîvira Jesû agacirithue nî Pilato.

² Nao nîmaambîrîrie kûmûthitanga makiugaga atîrî, “Tue tûranyitire mûndû ûyû akîvîtithia andû a vûrûri wetû. Arameeraga matikarutîre mûthamaki wa Roma mbeca cia gooti na akauga atî ke nîke Mesaya, mûthamaki.”

³ Nake Pilato nîwamûûririe atîrî, “We nîwe mûthamaki wa Ayahudi?” Nake Jesû nîwamûcokerie atîrî, “We nîwe wauga guo.”

⁴ Pilato nîwacokire akîîra anene a athînjîri-Ngai wa vamwe na kîrîndî atîrî, “Nie ndirona ûndû wana ûmwe mûcûku nîngîthitanga mûndû ûyû naguo.”

⁵ Nwatî nîmaakinyîrîrie ûvoro ûcio mûno makiugaga atîrî, “Mûndû ûyû akîthomithia nîaraunjuga andû a vûrûri wonthe wa Judea. Ke aambîrîrie vûrûrirî wa Galili na rîu arî gûkû gwetû.”

Jesû nîwavirirwe kûrî Herode agacirithue

⁶ Vîndî îrîa Pilato eegwire ûguo nîwaûririe atîrî, “Mûndû ûyû nî Mûgalili?”

⁷ Rîrîa Pilato aamenyire atî Jesû aarî wa kuuma vûrûrirî ûrîa Herode aathanaga, nîwamûtûmire kûrî Herode. Vîndî îo Herode wa nake aarî Jerusalemu.

⁸ Nake Herode nîwakenire mûno rîrîa oonire Jesû, nîûndû aarî mwîgu ngumo yake na nîwatûûrîte arî na mwîrîgîrîro mûno wa kwenda kwona Jesû akîringa ciama.

⁹ Kwoguo Pilato nîwaûririe Jesû ciûria nyîngî, nwatî Jesû ndaamûcokeria.

¹⁰ Nao anene a athînjîri-Ngai na arimû a Watho arîa maarûngamîte vo, nîmaathitangire Jesû mevotorete mûno.

¹¹ Nake Herode na athigari ake nîmaanyûrûririe Jesû na makîmwîka maûndû meengî ma ûûra nthoni. Nîmaacokire makîmwîkîra kanjû yarî ya goro na ya riiri na makîmûcokia kûrî Pilato.

¹² Kuuma mûthenya ûcio Herode na Pilato nîmaatuîkire arata wana ethîrwa vau mbererî maarî nthû.

Jesû nîwatuîrîrwe kûûragwa

¹³ Pilato nîwetire mûcemanio wa anene a athînjîri-Ngai, atongoria wa vamwe na kîrîndî,

¹⁴ na akîmeera atîrî, “Mue mûndetere mûndû ûyû na mwambîra atî ke nîaravîtithagia andû. Nînarîkia kûmûcirithia mûrî vo na ndinona ekîte îvîtia wana rîmwe rîa marîa mûramûthitanga namo.

¹⁵ Wana nginya Herode ndanoona ekîte îvîtia wana rîmwe nîûndû nîamûcokirie kûrî tue. Mûndû ûyû tî mwîku îvîtia wana rîmwe rîngîtûma atuîre kûûragwa.

¹⁶ Kwoguo nîmûrivithia ivoko na njoke nîmûrekie.” [

¹⁷ Pilato nîwetîkîrîtue nî watho wa Ayahudi amarekerie mûndû ûmwe vîndî ya pasaka].

¹⁸ Nakîo kîrîndî kîonthe nîkîaugîrîrie atîrî, “Mûndû ûyû nîaûragwe na tûcoke twovorerwe Baraba!”

¹⁹ (Baraba oovetwe nîûndû wa kunjuga andû îtûûrarî na nîûndû wa kûûragana.)

²⁰ Pilato nîwarîrie kîrîndî wa rîngî nîûndû nîwendaga kûrekia Jesû.

²¹ Nwatî kîrîndî nîkîaugîrîrie atîrî, “Mwambe mûtharavarî îgûrû! Mwambe mûtharavarî îgûrû!”

²² Wa rîngî Pilato nîwamaarîrie rita rîa kathatû na akîmaûria atîrî, “Mûndû ûyû ekîte wîvia ûrîkû? Nie ndirona ekîte îvîtia wana rîmwe rîngîtûma atuîrwe kûûragwa. Kwoguo nîmûrivithia ivoko na njoke nîmûrekie.”

²³ Nwatî kîrîndî nîkîathiîre na mbere kugîrîria gîkinyîrîrîtie gîkiuga atî Jesû ambwe, na mûthiiarî kugîrîria kwao gûkîvootana.

²⁴ Kwoguo Pilato nîwacokire agîtua ciira akiuga mavingîrue ûrîa meendaga.

²⁵ Nîwamovorere mûndû ûrîa meendaga, ûrîa wovetwe nîûndû wa kunjuga andû îtûûrarî na wa kûûragana. Nîwacokire akîmanengera Jesû nîguo mamwîke ûrîa meendaga.

Jesû nîwambirwe

²⁶ Rîrîa athigari maaumagarîtie Jesû mathiîte kûmwamba, nîmaatûnganire na mûndû ûmwe wa kuuma îtûûrarî rîa Kurene wetagwa Simoni aumîte ya mîgûndarî. Nîmaamûnyitire makîmwigîrîra mûtharava nîguo aûkue aumîte Jesû vuva.

²⁷ Andû eengî mûno nîmaaumire Jesû vuva na gatagatîrî kao vaarî na aka maarîragîra Jesû marî na kîeva kîîngî ngororî ciao.

²⁸ Nwatî Jesû nîwevûgûrire na kûrîa maarî na akîmeera atîrî, “Mue aka aya a Jerusalemu tigani kûndîrîra, îîrîrîreni mue ene na mûrîrîre ciana cienyu.

²⁹ Nîûndû mîthenya nîyûkîte rîrîa andû makaambîrîria kuga atîrî, ‘Na kaî aka arîa nthaata arîa mataanaciara na arîa matanongia, nîarathime-î.’

³⁰ Kavinda kau nîrîo andû makaambîrîria kwîra irîma atîrî, ‘Tûgwîreni!’ na macoke meere tûrîma atîrî, ‘Tûkunîkîreni!’

³¹ Nîûndû angîthîrwa andû nîmareka maûndû ta mama vîndî îrîa mûtî ûrî mwîthî, gûgeekara atîa mûtî waûma?”

³² Na andû engî aîrî ageri ngero nîmaaumagarirue nîguo makaûragwe vamwe na Jesû.

³³ Rîrîa maakinyire vandû vetagwa, “Îvîndî rîa Kîongo,” nîmaambire Jesû vo wa vamwe na ageri ngero acio aîrî, ûmwe mwena wake wa ûrîo, na ûcio wîngî mwena wake wa ûmotho.

³⁴ Nake Jesû nîwaugire atîrî, “Ngai Vava, movere nîûndû matiîcî ûrîa mareka.” Nao nîmaaûthîre nguo cia Jesû nîguo mamenye ûrîa makûigaana.

³⁵ Rîrîa andû maarûngamîte vau maroretie, atongoria a Ayahudi nîmaanyûrûririe Jesû makîmwîraga atîrî, “Nîaravonokagia andû arîa engî, tiga evonokie rîu angîthîrwa ke nîke Mesaya ûrîa Ngai athuurîte!”

³⁶ Wa nao athigari nîmaathiîre kûrî Jesû, makîmûva ndivei ino ngagatu na makîmûnyûrûria

³⁷ makîmwîraga atîrî, “Îîvonokie rîu angîthîrwa we nîwe Mûthamaki wa Ayahudi!”

³⁸ Na vau mûtharavarî îgûrû rîa kîongo Kîam Jesû, vaarî na kîmenyithia Kîamndîkîtwe atîrî: “Ûyû nîke mûthamaki wa Ayahudi!”

³⁹ Na mûndû ûmwe wa arîa maambîtwe nîûndû wa kûgera ngero nîwamûrumire akîmwîraga atîrî, “Na kinthî we tîwe Mesaya? Îîvonokie na ûcoke ûtûvonokie!”

⁴⁰ Nwatî mûndû ûcio wîngî nîwamûkaanirie akîmwîraga atîrî, “Anga ndwîtigagîra Ngai? We ûtuîrîrîtwe ûndû ûmwe nake?

⁴¹ Tue tûtuîrîrîtwe îvera rîringanîte na ciîko irîa twîkîte. Nwatî mûndû ûyû tî mwîku ûndû wana ûmwe mûcûku.”

⁴² Nake mûndû ûcio nîwacokire akîîra Jesû atîrî, “Jesû, ûkaandirikana vîndî îrîa ûgaatuîka Mûthamaki!”

⁴³ Nake Jesû nîwamwîrire atîrî, “Na ma nîrakwîra atî, ûmûnthî ûyû, nîwîthîrwa ûrî îkenero vamwe nanie.”

Gûkua kwa Jesû

⁴⁴ Kuuma thaa thita cia mûthenya, riûa nîrîatigire kwara na vûrûri wonthe ûkîgîa nduma nginya thaa kenda,

⁴⁵ nakîo gîtambaa Kîam hekarû gîgîatûkana maita maîrî.

⁴⁶ Jesû nîwaugîrîrie na mûgambo mûnene atîrî, “Vava, nînakûnengera mwoyo wakwa.” Na arîkia kuga ûguo agîtuîkana.

⁴⁷ Vîndî îrîa mûnene wa athigari îgana oonire ûrîa gwekîka, nîwakumirie Ngai akiugaga atîrî, “Na ma mûndû ûyû ararî mûthingu!”

⁴⁸ Rîrîa andû onthe arîa maacemanîtie kwîroreria, moonire ûrîa gwekîka nîmeenûkire makîîriraga.

⁴⁹ Nao andû onthe arîa maamwîcî wa vamwe na aka arîa maamûrûmîrîrîte kuuma Galili, nîmaarûngamire vandû varaca maroretie.

Kûthikwa kwa Jesû

⁵⁰ Kwarî mûndû wetagwa Josefu waumîte Arimathea, îtûûra rîa Judea. Ke aarî mûndû mwaro na mûthingu.

⁵¹ Nîwatûûraga etererete gûka kwa Ûthamaki wa Ngai. Wana ethîrwa aarî mûthuuri wa Kîamma Kîam Ayahudi, ke ndetîkanîtie na îtua na gîko Kîamo.

⁵² Josefu nîwathiîre kûrî Pilato na akîvoya mwîrî wa Jesû.

⁵³ Nîwacokire akîûruta mûtharavarî, akîûrigica na cuka na akîwiga mbîrîrarî îrîa yacîtwe îthigarî. Nayo mbîrîra îo ndîethîrîtwe yanaigwa mwîrî wa mûndû wîngî.

⁵⁴ Mûthenya ûcio warî wa Jumaa nayo thavatû yarî vakuvî kwambîrîria.

⁵⁵ Nao aka arîa maaumîte Jesû vuva kuuma Galili, nîmaathiîre marî vamwe na Josefu na makîona mbîrîra na ûrîa mwîrî wa Jesû waigirwe.

⁵⁶ Nîmaacokire makînûka, makîvarîria indo cianungaga waro na maguta maanungaga waro ma gwîtîrîria mwîrî wa Jesû. Naguo mûthenya wa thavatû wakinya nîmaanogokire wata ûrîa Watho wathanîte.