Luka 22 - ÎVUKU RÎA ÛVORO MWARO

Mûvango wa kûûraga Jesû

¹ Mûthenya wa kîrugo Kîam mîgate îrîa îtethagîrwa îkîrîtwe ndawa ya kwimbia nîwakuvîvîrie. Kîrugo kîu gîtagwa pasaka.

² Nao anene a athînjîri-Ngai, arimû a Watho, nîmaatuîragia ûrîa mangîûragithia Jesû na nthitho, nîûndû nîmeetigagîra andû.

Judasi nîwetîkîre gûcukanîrîra Jesû

³ Caitani nîwatonyire Judasi ûrîa wetagwa Mûsikariota na ûrîa warî ûmwe wa arutwa arîa îkûmi na aîrî a Jesû.

⁴ Kwoguo Judasi nîwathiîre kûrî anene a athînjîri-Ngai, wa vamwe na anene a athigari arîa marangagîra hekarû nîguo marîkanîre ûrîa agûcukanîrîra Jesû kûrî o.

⁵ Nao nîmaakenire na makîrîkanîra atî nîmakûmûrîva mbeca.

⁶ Judasi nîwetîkanirie nao na akîambîrîria gûcaria kamweke ga gûcukanîrîra Jesû kûrî o andû matakûmenya.

Jesû nîwevarîrie kûrîa irio cia pasaka

⁷ Mûthenya nîwakinyire vîndî ya kîrugo Kîam mîgate îrîa îtethagîrwa îkîrîtwe ndawa ya kwimbia. Mûthenya ûcio nîguo tûtûrûme twa kûrîwa vîndî ya pasaka twathînjagwa.

⁸ Nake Jesû nîwatûmire Petero na Johana akîmeera atîrî, “Thiîni mûkavarîrie irio cia pasaka nîguo tûke tûrîe.”

⁹ Nao nîmaamûririe atîrî, “Nîkû ûrenda tûthiî tûkavarîrie irio cia pasaka?”

¹⁰ Nake Jesû nîwamacokerie atîrî, “Mûgîtonya îtûûrarî nîmûgûtûngana na mûndûmûrûme akuuîte mûtûngi wa manjî. Mumeni vuva na mûtonye nyomba îrîa ke agaatonya.

¹¹ Na mwamîtonya mwîre mwene yo atîrî, ‘Mwarimû atwîra tûke tûkwîre ûtwonie nyomba ya ageni, îrîa ke na arutwa ake makûrîra irio cia pasaka!’

¹² Nake mûndû ûcio nîakûmwonia nyomba nene ngorovarî îgûrû na îrî na indo cionthe. Kûu nîkuo mûkûvarîria.”

¹³ Nao nîmaathiîre na makîthîrîria gwîkariî wata ûrîa Jesû aameerîte na makîvarîria irio cia pasaka.

Irio cia Kîvwaî cia Mwathani

¹⁴ Rîrîa îvinda rîakinyire, Jesû na atûmwa ake nîmeekarire metharî kûrîa.

¹⁵ Nake Jesû nîwamerire atîrî, “Nie nîrendete mûno tûrîcanîre namue irio ino cia pasaka mbere ya nthînue.

¹⁶ Nîûndû nîramwîra na ma atî nie ndikaamîrîa rîngî nginya rîrîa îkaavingua Ûthamakirî wa Ngai.”

¹⁷ Jesû nîwacokire agîoca gîkombe, agîcokia ngatho na akiuga atîrî, “Keni gîkombe gîkî na mûkînyunyanîre.

¹⁸ Nîramwîra na ma atî, kuuma rîu nginya rîrîa Ûthamaki wa Ngai ûgaaûka, nie ndikaanyua ndivei îno.”

¹⁹ Nîwacokire agîoca mûgate na arîkia gûcokeria Ngai ngatho, akîwenyûranga na akînengera arutwa ake akiugaga atîrî, [“Ûyû nîguo mwîrî wakwa ûrîa ûvecanîtwe nîûndû wenyu. Îkagani ûguo nîguo mûndirikanage.”

²⁰ Na marîkia kûrîa, nîwamanengere gîkombe akiugaga atîrî, “Gîkombe gîkî nî Kîam nthakame yakwa ya kîrîkanîro gîcerû îrîa yetûrûrirwe nîûndû wenyu.]

²¹ “Nwatî menyani atî mûndû ûrîa ûkûnjukanîrîra arî vamwe nanie ava metharî îno!

²² Mûrû wa Mûndû nîagûkua wata ûrîa Ngai atuîte, nwatî kaî mûndû ûrîa ûkamûcukanîrîra arî na thîna-î!”

²³ Nao arutwa nîmaambîrîrie kûrania, nî ûrîkû gatagatîrî kao wavangîte gûcukanîrîra Jesû.

Ngarari cia kwenda kûmenya nî ûrîkû mûnene

²⁴ Nîgwacokire gûkîgîa na ngarari cia kwenda kûmenya nî ûrîkû mûnene viû gatagatîrî ka arutwa.

²⁵ Nake Jesû nîwamerire atîrî, “Athamaki a andû arîa matetîkîtie nîmakinyagîrîria andû arîa maathaga, na athani acio nîmendaga gwîtwa, ‘Arata a andû.’

²⁶ Nwatî ûguo tîguo mwîkariî. Tigani ûrîa mûnene viû gatagatîrî kenyu atuîke mûnini viû, na mûtongoria atuîke ta ndungata.

²⁷ Nî mûndû ûrîkû wîthagîrwa arî mûnene viû; nî ûrîa wîkaraga metharî nîguo avirîrwe irio kana nî ûrîa ûviranagîra irio metharî? Na kinthî tî mûndû ûrîa wîkaraga metharî nîguo avirîrwe irio? Nwatî nie nîrî gatagatîrî kenyu mbîkariî ta ndungata yenyu.

²⁸ “Mue mwîthîrîtwe mûrî vamwe nanie mûno ngîgerua.

²⁹ Kwoguo wata ûrîa Ngai Vava aamveere ûvoti wa kwathana, ûguo nwa ta guo wa nanie ngûmûva ûvoti.

³⁰ Nîmûkaarîra na mûnyuîre metharî yakwa Ûthamakirî wakwa, na mûcoke mwîkarîre itî cia Ûthamaki na mwathe mîvîrîga îrîa îkûmi na îrî ya Isiraeli.”

Jesû nîwerire Petero atî nîakûmûkaana

³¹ Jesû nîwacokire akiuga atîrî, “Simoni, Simoni! Tathikîrîria! Caitani nîmûve rûtha rwa kûmûgeria muonthe na acagûranie andû arîa aro kuuma kûrî arîa acûku, wata ûrîa mûrîmi acagûranagia ngano kuuma kûrî macaki.

³² Nwatî we Simoni, nie nîrîmûkûvoeru nîguo wîtîkio waku ndûkenyenyue. Na wanjokerera ûgeekagîra aa mûrwanyûkwe vinya.”

³³ Nake Petero nîwamûcokerie atîrî, “Mwathani, nie nîrî mwîvarîriu kûvingîrwa njeera wana kûûragwa vamwe nawe!”

³⁴ Nake Jesû nîwamwîrire atîrî, “Nîrakwîra na ma atî, ngûkû tî îgamba ûtukû wa ûmûnthî ûtakaanîte maita mathatû atî we ndûmbîcî.”

Kîveeti, mbooro na rûviû

³⁵ Jesû nîwacokire akîûria arutwa ake atîrî, “Vîndî îrîa namûtûmîte mûtarî na kîveeti, mbooro wana kana iratû, kûrî kîndû wana kîmwe mwaturire?” Nao nîmaamûcokerie atîrî, “Gûtirî kîndû twaturire.”

³⁶ Jesû nîwacokire akîmeera atîrî, “Nwatî rîu, mûndû wa wonthe ûrî na kîveeti kana mbooro nîakuue, na mûndû wa wonthe ûtarî na rûviû nwa nginya endie îgooti rîake arûgûre.

³⁷ Nîûndû nîramwîra atî Mandîko Matheru marîa maugîte atîrî, ‘Nîwatuîrîrwe ûndû ûmwe na imaramari,’ nwa nginya mavingue; nîûndû maûndû marîa mandîkîtwe îgûrû rîakwa nî vîndî maravinga.”

³⁸ Nao arutwa nîmaamwîrire atîrî, “Mwathani! Taroria! Ava varî na mviû igîrî.” Nake nîwamacokerie atîrî, “Nî ûguo rîu! Icio nîmbîganu!”

Jesû nîwavoire arî kîrîmarî kîa mîtî ya Mîtamaiyû

³⁹ Jesû nîwaumire îtûûrarî rîu na wata ûrîa aamenyerete, akîthiî kîrîmarî Kîam mîtî ya Mîtamaiyû. Nao arutwa ake nîmaamumire vuva.

⁴⁰ Rîrîa aakinyire kuo, nîwamerire atîrî, “Voyani nîguo mûtikagwe mageriorî.”

⁴¹ Jesû nîwacokire akîmatiga, akîthiî vandû wata varîa mûndû angîvota gwikia îthiga, na aaturia maru nîwavoire atîrî,

⁴² “Vava, ûngîenda nthengutîria gîkombe gîkî Kîam mathîna, nwatî îka ûrîa we ûkwenda, tî ûrîa nie ngwenda.” [

⁴³ Na vîndî wa îo mûraika kuuma îgûrû nîwamumîrîre na akîmwîkîra vinya.

⁴⁴ Jesû arî na ûrûrû mwîngî ngororî yake, nîwavoire na kîo kîîngî mûno. Nayo nthithina yake nîyagwîcaga nthî îkariî ta matata manene ma nthakame.]

⁴⁵ Rîrîa Jesû aarîkirie kûvoya, nîwacokire varîa aatigîte arutwa ake na akîmethîrîria mamamîte na maûrîtwe nî vinya nîûndû wa kîeva.

⁴⁶ Nake nîwamaûririe atîrî, “Nîndûî gîtûmîte mûmame? Ûkîrani mûvoe nîguo mûtikagwe mageriorî.”

Jesû nîwanyitirwe

⁴⁷ Rîrîa Jesû aaragia andû eengî nîmaakinyire matongoreretue nî mûndû wetagwa Judasi ûrîa warî ûmwe wa arutwa arîa îkûmi na aîrî. Judasi nîwakuvîvîrie Jesû nîguo amûmumunye.

⁴⁸ Nwatî Jesû nîwamûririe atîrî, “Judasi, ûracukanîrîra Mûrû wa Mûndû na njîra ya kûmûmumunya?”

⁴⁹ Rîrîa arutwa arîa maarî na Jesû moonire ûrîa kwathiîte gwîkîka, nîmaamûririe atîrî, “Mwathani, tûmatemange na mviû cietû?”

⁵⁰ Na ûmwe gatagatîrî kao nîwarengire gûtû kwa ûrîo kwa ngombo ya Mûthînjîri-Ngai ûrîa mûnene.

⁵¹ Nwatî Jesû nîwaugire atîrî, “Tigani gwîka ûguo!” Nake nîwacokire akîvutia gûtû kwa ngombo îo na akîmîvonia.

⁵² Jesû nîwacokire akîîra anene a athînjîri-Ngai, arangîri a hekarû na atongoria a mavoero arîa maathiîte kûmûnyita atîrî, “Nîkwa nîrî mûtoi nîguo mûke kûnyita mûkuuîte mviû na njokoma?

⁵³ Mûthenya wa mûthenya nîrethagîrwa nîrî namue hekarûrî na mûtiranyitaga. Nwatî gaka nîko kavinda kenyu ga gwîka ûrîa mwîcirîtie gwîka mûtongoretue nî vinya wa nduma.”

Petero nîwakaanire Jesû

⁵⁴ Nao nîmaanyitire Jesû na makîmûvira mûciî kwa Mûthînjîri-Ngai ûrîa mûnene. Nake Petero nîwamaumire vuva arî varaca.

⁵⁵ Nao athigari marîkia gwakia mwaki nja gatagatî, Petero nîwekarire nthî vamwe nao.

⁵⁶ Rîrîa ndungata îmwe ya mwîrîtu yonire Petero amûrîkîtwe nî ûtheri wa mwaki, nîyamûroririe mûno na akiuga atîrî, “Mûndû ûyû wa nake arethagîrwa arî vamwe na Jesû.”

⁵⁷ Nwatî Petero nîwakaanire akiugaga atîrî, “We mûndûmûka ûyû, tenya kûndeterere, nie wana ndiîcî mûndû ûyû!”

⁵⁸ Vuva wa kavinda kanini, mûndû wîngî nîwonire Petero na akîmwîra atîrî, “Wa nawe ûrî ûmwe wa o!” Nwatî Petero nîwamûcokerie atîrî, “We mûndû ûyû, tenya kûndeterere, nie ndîrî ûmwe wa o!”

⁵⁹ Vuva wa îthaa ta rîmwe ûguo, mûndû wîngî nîwakinyîrîrie ûvoro ûcio akiuga atîrî, “Na ma mûndû ûyû mararî na Jesû, nîûndû wa nake nî Mûgalili!”

⁶⁰ Nwatî Petero nîwamûcokerie atîrî, “Mûndû ûyû, tenya kûndeterere, nie wana ndiramenya ûrîa ûrauga!” Kavinda wa kau aaragia, ngûkû nîyagambire.

⁶¹ Nake Mwathani nîwavûgûkire na akîroria Petero. Petero nîwacokire akîririkana ciugo irîa Mwathani aamwîrîte atî: “Mbere ya ngûkû îgambe ûtukû wa ûmûnthî, nîûkwîthîrwa ugîte maita mathatû atî we ndûmbîcî.”

⁶² Nake Petero nîwacokire akiuma nja na akîrîra arî na ûrûrû mwîngî ngororî yake.

Jesû nîwanyûrûrirue na akîrivwa

⁶³ Andû arîa maarangîrîte Jesû nîmaamûnyûrûririe na makîmûriva.

⁶⁴ Nîmaacokire makîmûmika metho na makîmûria atîrî, “Mûrathi ûyû, ta îcirîrie nû wakûringa!”

⁶⁵ Nao nîmaacokire makîmwîra maûndû meengî ma kûmûruma.

Jesû nîwacirithirue nî kîama

⁶⁶ Kîraûko gwakîa atongoria a mavoero, anene a athînjîri-Ngai na arimû a Watho, nîmaatûnganire vamwe. Nake Jesû nîwarûngamirue mbere ya athuuri acio a Kîamma

⁶⁷ na makîmûûria atîrî, “Ta twîre atîrî, we nîwe Mesaya?” Nake Jesû nîwamacokerie atîrî, “Nie wana nîngîmwîra mûtingîmbîtîkia.

⁶⁸ Na nîngîmûria kîûria, mûtingînjokeria.

⁶⁹ Nwatî kuuma rîu Mûrû wa Mûndû akethagîrwa ekarîte mwenarî wa ûrîo wa Ngai mwene vinya wonthe.”

⁷⁰ Nao athuuri acio onthe a Kîamma nîmaamûririe atîrî, “We vi nîwe Mûriû wa Ngai?” Nake Jesû nîwamacokerie atîrî, “Mue nîmwauga atî nie nînie ke.”

⁷¹ Nao athuuri acio a Kîamma nîmeeranire atîrî, “Nî ûira wîngî ûrîkû tûravatara? Tue nîtweîguîra ûrîa auga.”