Luka 17 - ÎVUKU RÎA ÛVORO MWARO

Wîvia

¹ Jesû nîwerire arutwa ake atîrî, “Maûndû marîa matûmaga andû mevie, nwa nginya moneke. Nwatî kaî mûndû ûrîa ûtûmaga maûndû mau moneke arî na thîna-î!

² Wana nî kava mûndû ûcio overerwe îthiga rîa kîthîi ngingorî yake akînaikua îriarî, gûkîra kûmûrekereria avîtithie kamwe ga twana tûtû tûnini.

³ Kwoguo menyagîrîrani ciîko cienyu! “Mûrwanyûkwe angîkûvîtîria mûkanie, na angîkûverera mwovere.

⁴ Na angîkûvîtîria maita mûgwanja mûthenya ûmwe, na wa riita rîrîa aakûvîtîria aûke kûrî we na akwîre atîrî, ‘Nie nînavera,’ we nwa nginya ûmwovere.”

Wîtîkio

⁵ Nao atûmwa nîmeerire Mwathani atîrî, “Twongerere wîtîkio!”

⁶ Nake Mwathani nîwamacokerie atîrî, “Angîthîrwa mûrî na wîtîkio wîgana ta mvîndî ya mûtî wa karatarî, nwa mwîre mûkûyû ûyû atîrî, ‘Îîkûûre na wîvande îriarî!’ Naguo nwa ûmwathîkîre.

Wîra wa ndungata

⁷ “Ethîrwa kûrî mûndû gatagatîrî kenyu ûrî na ndungata îrarîma mûgûndarî kana îrarîthia mbûri, yauma mûgûndarî nwa amîre atîrî, ‘Ûka wîkare nthî ûrîe?’

⁸ Na ma ndangîmîra ûguo! Vandû va ûguo nwa amîrire atîrî, ‘Mvarîrîria irio cia kîvwaî na weterere ndîe na nyue. Navaa nîrîo ûkaarîa na ûnyue.’

⁹ Ndungata îcokerue ngatho nîûndû wa gwîka ûrîa mwene amîra îke?

¹⁰ Kwoguo wa namue rîrîa mweka ûndû wa wonthe ûrîa mwerwa mwîke ugagani atîrî, ‘Tue tûrî ndungata itarî mbagîrîru tweka tu ûrîa tûragîrîrwe nî gwîka.’ ”

Jesû nîwavonirie andû îkûmi

¹¹ Rîrîa Jesû aathiîte Jerusalemu, nîwavîtûkîrîre mûvakarî wa vûrûri wa Samaria na Galili.

¹² Rîrîa aatonyaga gîcagirî kîmwe, nîwatûngirwe nî andû îkûmi arîa maarwarîte mûrimû mûcûku wa ngothi. Nao andû acio nîmaarûngamire vandû varaca na

¹³ makiugîrîria atîrî, “Jesû! Mwarimû! Twîguîre ntha!”

¹⁴ Rîrîa Jesû oonire andû acio nîwamerire atîrî, “Thiîni mûkeyonanie kûrî athînjîri-Ngai.” Na marî njîrarî mathiîte, nîmaatherirue.

¹⁵ Rîrîa mûndû ûmwe gatagatîrî kao oonire atî nîwavonua, nîwacokire vuva agîkumagia Ngai na mûgambo mûnene.

¹⁶ Nake mûndû ûcio akinya varîa Jesû aarî, nîwegwîthirie nthî magûrûrî ma Jesû na akîmûcokeria ngatho. Mûndû ûcio aarî Mûsamaria.

¹⁷ Nake Jesû nîwamûûririe atîrî, “Na kinthî nditheririe andû îkûmi? Acio engî kenda-rî, marî kû?

¹⁸ Anga gûtirî mûndû wîngî wacoka vuva gûcokeria Ngai ngatho tiga mûndû ûyû ûtarî wa gûkû?”

¹⁹ Nake Jesû nîwacokire akîra mûndû ûcio atîrî, “Rûngama na wîthiîre, gwîtîkia gwaku nîkuo gwatûma ûvone.”

Gûka kwa Ûthamaki wa Ngai

²⁰ Nao Afarisai amwe nîmaaûririe Jesû rîrîa Ûthamaki wa Ngai ûgaaûka. Nake Jesû nîwamacokerie atîrî, “Ûthamaki wa Ngai ndûkaga na njîra îroneka.

²¹ Wana gûtirî mûndû ûkaauga atîrî, ‘Taroriani, ûrî ava!’ kana ‘Ûûrîa vaarîa!’ Nîûndû Ûthamaki wa Ngai ûrî gatagatîrî kenyu.”

²² Jesû nîwacokire akîra arutwa ake atîrî, “Kûrî vingo îgaakinya mwîrirîrie kwona mûthenya ûmwe wa mîthenya ya Mûrû wa Mûndû nwatî mûtikawona.

²³ Kûrî na andû amwe makaamwîra atîrî, ‘Taroriani vaarîa!’ kana ‘Taroriani ava!’ Nwatî mûtikaamarûmîrîre.

²⁴ Nîûndû wata ûrîa rûveni rûvenagia na rûkamûrîka matu kuuma mwena ûmwe nginya mwena ûrîa wîngî, ûguo nwaguo Mûrû wa Mûndû ageekara mûthenya ûcio wake.

²⁵ Nwatî nwa nginya ambe athînîke mûno na aregwe nî andû a rûciaro rûrû.

²⁶ Wata ûrîa gwekariî vîndî ya Nuhu, nwaguo gûgeekara mûthenya wa Mûrû wa Mûndû.

²⁷ Andû nîmaarîcaga na makanyua, makavikania na makavikua, nginya mûthenya ûrîa Nuhu aatonyire thavinarî na mbura ya kîvovoto îkiura na îkîmaûraga onthe.

²⁸ Mûthenya ûcio ûgeekara wata ûrîa gwekariî vîndî ya Loti. Vîndî îo andû maatûûraga marîcaga na manyunyaga, magûraga na mendagia indo, na mavandaga na matumaga nyomba.

²⁹ Nwatî mûthenya ûrîa Loti aaumire Sodomu, Ngai nîwaurithirie mwaki na ûviriti, na ûkîûraga andû acio onthe.

³⁰ Ûguo nwaguo gûgeekara mûthenya ûrîa Mûrû wa Mûndû akoonanua.

³¹ “Mûthenya ûcio mûndû ûrîa ûkeethîrwa arî nyomba îgûrû ndakaume athiîte kûruta indo ciake. Wana mûndû ûrîa ûkeethîrwa arî mûgûndarî ndagacoke na mûciî.

³² Taririkanani mûka wa Loti!

³³ Mûndû wa wonthe ûgeragia kûvonokia mwoyo wake nîagaaûta, nake ûrîa ûtecaga mwoyo wake nîakaaûvonokia.

³⁴ Nîramwîra na ma atî, ûtukû ûcio andû aîrî nîmakeethîrwa mamamîte ûrîrî ûmwe, na ûmwe wao nîagoocwa nake ûcio wîngî atigwe.

³⁵ Nao aka aîrî nîmakeethîrwa marî vamwe magîkia, na ûmwe wao nîagoocwa, nake ûcio wîngî atigwe. [

³⁶ Nao andû aîrî nîmakeethîrwa marî vamwe makîruta wîra mûgûndarî, na ûmwe wao nîagoocwa nake ûcio wîngî atigwe.”]

³⁷ Nao arutwa nîmaaûririe Jesû atîrî, “Mwathani, maûndû mama magaatuîkîkîra kû?” Nake nîwamacokerie atîrî, “Vandû varîa kimba kîrî nîvo nderi itûnganaga.”