Luka 15 - ÎVUKU RÎA ÛVORO MWARO

Ngerekano ya ng'ondu îmwe yûrîte

¹ Mûthenya ûmwe etia eengî a mbeca cia gooti na evia nîmaathiîre varîa Jesû aarî kûthikîrîria akîthomithania.

² Nao Afarisai na arimû a Watho nîmaambîrîrie kûnuguna makiugaga atîrî, “Mûndû ûyû nîagwataga evia ûgeni wana nginya akarîcanîra nao!”

³ Na kwoguo Jesû nîwamavere ngerekano îno:

⁴ “Mûndû ûmwe gatagatîrî kenyu angîthîrwa arî na ng'ondu îgana, na îmwe yacio yûre-î, angîcoka eke atîa? Na kinthî ndatigaga icio ciîngî mîrongo kenda na kenda kîthakarî, na agacoka akathiî gûcaria îo îngî yûrîte nginya rîrîa akaamîona.

⁵ Na amîona, nîakenaga mûno nginya akamigîrîra cianderî ciake

⁶ na akamîkuua amîcoketie na mûciî. Na akinya mûciî, nîwîtaga arata ake wa vamwe na andû arîa maatûûranîrîte nake na akameera atîrî, ‘Ûkani tûkenanîre nîûndû nîrîmwonu ng'ondu yakwa îrîa îraûrîte!’

⁷ Nîramwîra na ma atî, ûguo nwaguo îgûrû kwîthagîrwa na gîkeno makîria, nîûndû wa mwîvia ûmwe ûrîa wîrirîte, gûkîra gîkeno kîrîa kîthagîrwa kuo nîûndû wa andû athingu mîrongo kenda na kenda, arîa matarî na ûvatari wa kwîrira.

Ngerekano ya ciringi îmwe yûrîte

⁸ “Kana ethîrwa mûndûmûka arî na ciringi îkûmi cia sîlûva, na îmwe yacio yûre-î, ekaga atîa? Na kinthî ndagwatagia taa, na akavaata nyomba agîcaragia ciringi îo na vinya nginya rîrîa akaamîona?

⁹ Nake amîona, nîwîtaga arata ake wa vamwe na andû arîa matûûranîrîte nake na akameera atîrî, ‘Ûkani tûkenanîre nîûndû nînîronire ciringi yakwa îrîa îraûrîte!’

¹⁰ Nîramwîra atî, ûguo nwa guo araika a Ngai makenagîra mwîvia ûmwe ûrîa wîrirîte mevia make.”

Mwanake ûrîa waûrîte

¹¹ Jesû nîwacokire akiuga atîrî, “Vîndî îmwe kwarî na mûndû warî na anake ake aîrî.

¹² Mwanake ûrîa warî mûnini nîwerire îthe atîrî, ‘Vava, nengera îgai rîakwa wa rîu.’ Kwoguo mûndû ûcio nîwagaîre anake acio ake aîrî indo ciake.

¹³ Mîthenya mînini yavîtûka, mwanake ûcio warî mûnini nîwendirie îgai rîonthe rîake na akiuma kûu mûciî arî na mbeca. Nîwathiîre vûrûrirî ûmwe wa kûraca kûrîa anangire mbeca cionthe ciake na gwîka maûndû ma ûûra nthoni.

¹⁴ Na rîrîa avûthîre mbeca cionthe irîa aarî nacio, nîkwagîre na yûra rînene vûrûrirî ûcio nginya akîambîrîria kûthînîka.

¹⁵ Kwoguo mwanake ûcio nîwathiîre na akîûria wîra kwa mûndû ûmwe wa vûrûri ûcio. Nake mûndû ûcio nîwamûvere wîra wa kûrîthia ngûrwe mûgûndarî wake.

¹⁶ Mwanake ûcio nîwavûtire mûno nginya akîambîrîria kwîrirîria kûrîa makoro marîa maarîcagwa nî ngûrwe, nwatî gûtirî mûndû wamûvecaga kîndû.

¹⁷ Na mûthiiarî, mwanake ûcio nîwakirire na agîîciria atîrî, ‘Andû onthe arîa marutaga wîra kwa vava marîcaga, makavaa na magatigaria, nwatî nie nîrakuîra gûkû nî yûra.

¹⁸ Nie nîmbûkîra, nthiî kûrî vava na nîmwîre atîrî: Vava, nie nîmvîtîrîtie Ngai na ngakûvîtîria.

¹⁹ Na nie ndirî mwagîrîru wa gwîtwa mûvîcîguo. Ndua ta ûmwe wa aruti aku a wîra.’

²⁰ Kwoguo mwanake ûcio nîwaumire kûu na agîcoka kûrî îthe. “Na rîrîa mwanake ûcio aarî varaca na mûciî, îthe nîwamwonire na akîringwa nî ntha, agîcoka akîvinyûra, akîmûkumbatîria na akîmûmumunya.

²¹ Nake mwanake ûcio nîwerire îthe atîrî, ‘Vava, nie nîmvîtîrîtie Ngai na ngakûvîtîria. Nie ndirî mwagîrîru wa gwîtwa mûvîcîguo.’

²² Nwatî îthe nîwetire ndungata ciake na akîmeera atîrî, ‘Thiîni narua mûrete nguo îrîa mbaro viû na mûmwîkîre. Na mûcoke mûmwîkîre mbete Kîamra na mûmwîkîre iratû.

²³ Mûcoke mûthînje karegwa karîa kanoru viû nîguo tûkarîe tûkenete,

²⁴ nîûndû mwanake ûyû wakwa ararî mûkuû, nwatî rîu nîmûriûku; ararî mûru nwatî rîu nîmwoneku.’ Na kwoguo nîmaambîrîrie gûkenanîra.

²⁵ “Maûndû mama monthe magîkîka, mwanake wake ûrîa mûkûrû aarî mûgûndarî. Na rîrîa eenûkîte akinya vakuvî na mûciî nîwegwire andû makina makenete.

²⁶ Kwoguo nîwetire ndungata îmwe na akîmîûria atîrî, ‘Nîndûî kîrathiî na mbere?’

²⁷ Nayo ndungata îo nîyamûcokerie atîrî, ‘Nî mûrwanyûkwe ûrîa mûnini ûcokire mûciî. Nake aguo amûthînjîra karegwa karîa kanoru viû nîûndû nîamûcokerere arî mûgima.’

²⁸ “Mwanake ûcio mûkûrû nîwarakarire mûno na akîrega gûtonya nyomba. Kwoguo îthe nîwaumire nja na akîambîrîria kûmûthaitha atonye nyomba.

²⁹ Nwatî mwanake ûcio nîwacokerie îthe atîrî, ‘Vava tathikîrîria ngwîre! Ngûrutîrîte wîra mîaka îno yonthe ndagûkûvîtîria, nwatî ndwanamva wanarî koori kamwe nîguo tûrîcanîre na arata akwa tûkenete.

³⁰ Nwatî mûvîcîguo anangîte indo cionthe ciaku marî na maraa, na acoka mûciî wamûthînjîra karegwa karîa kanoru!’

³¹ Nake îthe nîwamûcokerie atîrî, ‘Mûvîcîwa, twîthagîrwa nawe vingo cionthe, na indo cionthe ciakwa nî ciaku.

³² Nwatî nîkûragîrîrîte tûkûngûîre na tûkene nîûndû mûrwanyûkwe ûyû ararî mûkuû nwatî rîu nîmûriûku, na ararî mûru na rîu nî mwoneku.’ ”