Luka 14 - ÎVUKU RÎA ÛVORO MWARO

Jesû nîwavonirie mûndû warî mûrwaru

¹ Mûthenya ûmwe wa thavatû, Jesû nîwathiîre kûrîa irio mûciî kwa mûnene ûmwe Mûfarisai. Na arî kûu, andû nîmaamûroragia mûno.

² Mûndû ûmwe warwarîte mûrimû wa kwimba magûrû na njara nîwathiîre kûrî Jesû.

³ Nake Jesû nîwaûririe arimû a Watho na Afarisai atîrî, “Watho wetû-î, nîwîtîkîrîtie mûndû avonanie mûthenya wa thavatû kana ndwîtîkîrîtie?”

⁴ Nwatî arimû a watho na Afarisai nîmaakirire kivi. Kwoguo Jesû nîwocire mûndû ûcio warwarîte akîmûvonia na akîmwîtîkîria athiî.

⁵ Nake Jesû nîwacokire akîmaûria atîrî, “Mûndû ûmwe gatagatîrî kenyu angîthîrwa na mûvîcî ûvarûkîte kîthimarî mûthenya wa thavatû, wana kana ng'ombe, na kinthî ndangîiruta wa rîmwe mûthenya ûcio wa thavatû?”

⁶ Nao arimû a Watho na Afarisai nîmaarigirwe nî ûrîa makûmûcokeria.

Kwînyivia na kûgwata andû ûgeni

⁷ Jesû nîwonire ûrîa ageni amwe meethuuragîra itî cia mbere kîrugorî, na kwoguo akîva andû onthe ngerekano îno:

⁸ “Mûndû angîgwîtîra kîrugo Kîam ûviki tigaga kwîthuurîra gîtî Kîam mbere, nîûndû mûndû mûtîîkanu gûgûkîra nwa ethîrwe arî mwîtîre kîrugo kîu,

⁹ nake mûndû ûrîa ûmwîtîrîte kîrugo mûrî muoîrî aûke akwîre atîrî, ‘Nengera mûndû ûyû gîtî kîu wîkarîrîte.’ We nwa ûconoke mûno ûkîthiî gwîkarîra itî irîa cigîtwe vuva viû.

¹⁰ Vandû va ûguo ûngîtîrwa kîrugo, vandû va kwîthuurîra gîtî Kîam mbere îkaragîra gîtî kîrîa kigîtwe vuva nîguo mûndû ûrîa ûgwîtîrîte kîrugo kîu aûke na akwîre atîrî, ‘Mûrata wakwa, ûkîra ûthiî ûgekarîre gîtî kîîrîa kîrî vaarîa mbere.’ Na kwoguo we ûkeegua ûrî mûtîîkanu mûno mbere ya andû onthe arîa metîrîtwe kîrugo kîu.

¹¹ Nîûndû mûndû wa wonthe wînenevagia nîakaanyivua, na ûrîa wînyivagia nîakaanenevua.”

¹² Jesû nîwacokire akîra mûndû ûrîa wamwîtîrîte kîrugo atîrî, “Rîrîa wavarîria kîrugo tigaga gwîtîra arata aku kana aa mûrwanyûkwe kana andû a mûciî wenyu kana itonga irîa mûriganîtie nacio, atî nîûndû wa nao nîmagaagwîtîra kîrugo mûthenya ûmwe na kwoguo makûrîve nîûndû wa kûmetîra kîrugo gîaku.

¹³ Rîrîa wavarîria kîrugo îtagîra andû arîa athîni, cionje, ithua na atumumu;

¹⁴ nawe nîûkaarathimwa nîûndû o matingîvota gûkûrîva. Nake Ngai nîagaakûrîva vîndî îrîa andû arîa maakwire marî athingu makariûka.”

Ngerekano ya kîrugo kînene

¹⁵ Rîrîa mûndû ûmwe gatagatîrî ka arîa meekarîte vau metharî eegwire ûvoro ûcio, nîwerire Jesû atîrî, “Na kaî andû arîa makaarîa irio Ûthamakirî wa Ngai nîmakaarathimwa!”

¹⁶ Nake Jesû nîwerire mûndû ûcio atîrî, “Vîndî îmwe kwarî na mûndû wavarîrie kîrugo kînene na agîta andû eengî mûno.

¹⁷ Rîrîa kîrugo Kîamrî vakuvî kwambîrîria mûndû ûcio nîwatûmire ndungata yake îthiî îkeere andû arîa meetîrîtwe kîrugo kîu atîrî, ‘Ûkani, maûndû monthe rîu nîmavarîrie!’

¹⁸ Nao andû onthe arîa meetîrîtwe kîrugo kîu nîmaambîrîrie kûvecana itûmi cia kûgiria mathiî kîrugorî kîu. Mûndû wa mbere nîwerire ndungata îo atîrî, ‘Thiî ûkeere mûnene waku angirîrîrie nîûndû nie nîragûrire mûgûnda na nwa nginya nthiî ngawone.’

¹⁹ Mûndû wîngî nîwerire ndungata îo atîrî, ‘Thiî ûkeere mûnene waku angirîrîrie nîûndû nie nîragûrire ndegwa îkûmi cia kûrîma na nthiîte kûigeria.’

²⁰ Mûndû wîngî nîwerire ndungata îo atîrî, ‘Thiî ûkeere mûnene waku angirîrîrie nîûndû nie nîravikanirie na kwoguo tîmvota kûthiî.’

²¹ “Nayo ndungata îo nîyacokire mûciî kwa mûnene wayo na îkîmwîra maûndû mau monthe. Nake mûnene ûcio nîwarakarire mûno na akîra ndungata îo atîrî, ‘Îîvîke ûthiî varavararî na tûcîrarî twa îtûûra rîîrî, ûke na athîni, cionje, atumumu, na ithua.’

²² Vuva wa kavinda kanini ndungata îo nîyacokire mûciî na îkîra mûnene wayo atîrî, ‘Mwathani nînavingia ûrîa ûrandûmîte, nwatî nyomba twa mbîcûru andû.’

²³ Mûnene wa ndungata îo nîwamîrire atîrî, ‘Thiî varavararî wa na tûcîrarî tûrîa tûrî nja ya îtûûra rîîrî ûringîrîrie andû maûke nîguo nyomba yakwa îcûre.

²⁴ Nîramwîra atî, gûtirî mûndû wana ûmwe wa arîa meetîtwe mbere ûgaacama irio cia kîrugo gîakwa!’ ”

Îrîvi rîa gûtuîka mûrutwa wa Jesû

²⁵ Vîndî îmwe andû eengî maathiîcanîtie na Jesû. Nake nîwavûgûkire na akîmera atîrî,

²⁶ “Mûndû wa wonthe ûkaga kûrî nie na nwa ende gûtuîka mûrutwa wakwa nwa nginya amende makîria ya ûrîa endete îthe na ng'ina, mûka na ciana, aa mûrwang'ina na aa mwarwang'ina, na amende makîria ya ûrîa eyendete ke mwene.

²⁷ Mûndû wa wonthe ûtakuuaga mûtharava wake na akanûmîrîra, ndangîtuîka mûrutwa wakwa.

²⁸ “Mûndû ûmwe gatagatîrî kenyu angîthîrwa nîaravanga gûtuma nyomba, mbere ambaga agekara nthî na agatara matûmîri nîguo avote kûmenya kana arî na mbeca mbîganu cia kûmîrîkia.

²⁹ Nwatî angîtuma mûcingi na acoke aremwe nî kûrîkia nyomba îo, andû onthe arîa makonaga nyomba îo makamûnyûrûragia

³⁰ makiugaga atîrî, ‘Mûndû ûyû aambîrîrie gûtuma nyomba nwatî nîwaremirwe nî kûrîkia!’

³¹ “Mûthamaki ûmwe angîthîrwa nîarenda kûthiî kûrûa na mûthamaki wîngî, mbere ambaga agekara nthî, akeyûria kana arî na mbûtû ya athigari ngiri îkûmi nwa avoote mûthamaki ûcio wîngî wîna mbûtû ya athigari ngiri mîrongo îîrî.

³² Nwatî angîthîrwa nîarona waro atî ndangîvoota mûthamaki ûcio wîngî, nîamûtûmanagîra arî wa varaca na akamûûria ûrîa mangîvota kwîgucana.

³³ Kwoguo gûtirî mûndû wana ûmwe gatagatîrî kenyu ûngîtuîka mûrutwa wakwa atambîte gûtiga indo cionthe irîa arî nacio.

Cumbî îrîa îtarî vata

³⁴ “Cumbî nî mbaro. Nwatî ethîrwa nwa îthire mûcamo wayo, nîndûî kîngîtûma îgîe na mûcamo rîngî?

³⁵ Cumbî ta îo ndîrî vata mûtheturî wana kana thumurî; nîkwa îtecagwa. Mûndû ûrîa ûrî na matû ma kwîgua, nîegue!”