Luka 13 - ÎVUKU RÎA ÛVORO MWARO

Mwarega kwîrira mevia menyu, nîmûgûkua

¹ Kavinda wa kau, andû amwe nîmaakinyire na makîra Jesû ûvoro wîgiî andû a Galili arîa Pilato aaûragire vîndî îrîa aamethîrîrie makîrutîra Ngai îgongoona.

² Nake Jesû nîwacokerie andû acio atîrî, “Nîkwa mwîciragia atî andû a Galili arîa maaûragirwe maarî evia gûkîra andû arîa engî onthe a Galili?

³ Naarî, ûguo tîguo kwarî! Nîramwîra na ma atî mwarega kwîrira mevia menyu, nîmûkua muonthe wata ûrîa andû acio maakwire.

⁴ Î nao andû arîa îkûmi na anana maakwire vîndî îrîa maagwîrîrwe nî nyomba îrîa yarî ndaca mûno îtûûrarî rîa Siloamu; nîkwa mwîciragia ûguo kwonanirie atî maarî evia gûkîra andû arîa engî onthe maatûûraga îtûûrarî rîa Jerusalemu?

⁵ Naarî, ûguo tîguo kwarî! Nîramwîra na ma atî mwarega kwîrira mevia menyu, nîmûkua muonthe wata o.”

Ngerekano ya mûkûyû ûrîa wathatîte

⁶ Jesû nîwavecanire ngerekano îno: “Vîndî îmwe kwarî na mûndû wavandîte mûkûyû mûgûndarî wake wa mîthavibu. Nake mûndû ûcio nîwathiîre gûcaria ngûyû mûtîrî ûcio, nwatî ke ndoona ngûyû wana îmwe.

⁷ Kwoguo nîwerire mûruti wa wîra wa mûgûnda ûcio wake atîrî, ‘Rîu mîaka îthatû nî mîthiru wa mbûkaga gûcaria ngûyû mûkûyûrî ûyû, nwatî ndianona wanarî îmwe. Ûteme, nîûndû nîûragînjia mûgûnda wakwa mana!’

⁸ Nake mûruti wa wîra nîwamûcokerie atîrî, ‘Mwathani! Tigana naguo! Wana nî kava ûûve mwaka wîngî ûmwe tu. Nie nîngûûrîmîra na nîwîkîre thumu.

⁹ Angîthîrwa mûkûyû ûyû nîûgûciara mwaka mûku nî waro, nwatî angîthîrwa tîûciara, thiî ûkaambîra nîûteme.’ ”

Jesû nîwavonirie mûndûmûka kîonje mûthenya wa thavatû

¹⁰ Jesû nîwathomithagia andû îvoerorî mûthenya wa thavatû.

¹¹ Nakuo kûu kwarî na mûndûmûka warî na ngoma yatûmîte arware îvinda rîa mîaka îkûmi na înana. Mûndûmûka ûcio aatûûrîte enamîrîrîte na atakûvota kwînamûka.

¹² Rîrîa Jesû oonire mûndûmûka ûcio nîwamwîtire na akîmwîra atîrî, “We mûndûmûka ûyû, nîwavonua!”

¹³ Nake Jesû nîwamwigîrîre njara na wa rîmwe mûndûmûka ûcio akînamûka na agîkumia Ngai.

¹⁴ Nake mûnene wa îvoero rîu nîwarakarire nîûndû Jesû nîwavonanirie mûthenya wa thavatû, kwoguo nîwerire andû atîrî, “Twagîrîrwe nî kûruta wîra mîthenya îtandatû; kwoguo ûkagani mîthenyarî îo na mûkavonua, nwatî mûtigaûkage mûthenya wa thavatû!”

¹⁵ Nake Mwathani nîwamûcokerie atîrî, “Mue mvinga ino! Kûrî mûndû wana ûmwe gatagatîrî kenyu ûtathaûraga ng'ombe kana mvunda yake nîguo amîvire îthiî îkanyue manjî mûthenya wa thavatû?

¹⁶ Mûndûmûka ûyû wa rûciaro rwa Iburahimu arathirîtie mîaka îkûmi na înana ovetwe nî Caitani. Anga tî kwagîrîru mûndûmûka ûyû wa nake avonue mûthenya wa thavatû?”

¹⁷ Rîrîa Jesû aaugire ûguo, nthû cionthe ciake nîciaconokire. Nao andû acio engî onthe nîmaakenire nîûndû wa ciîko cia magegania irîa ke eekire.

Ngerekano ya mvîndî ya mûtî wa karatarî

¹⁸ Jesû nîwacokire akiuga atîrî, “Ûthamaki wa Ngai nîngîûgerekania na ndûî? Nîndûî nîngîûringithania nakîo?

¹⁹ Ûthamaki wa Ngai nîûgerekania na mvîndî ya mûtî wa karatarî. Mûndû angîoca mvîndî îo na amîvande mûgûndarî wake, nî îmeraga na îgatuîka mûtî, nacio iconi nîthiîcaga na igatuma ciomba ciacio mvûarî cia mûtî ûcio.”

Ngerekano ya ndawa ya kwimbia mîgate

²⁰ Wana rîngî Jesû nîwaugire atîrî, “Nîndûî nîngîringithania Ûthamaki wa Ngai nakîo?

²¹ Nie nîngîringithania Ûthamaki wa Ngai na ndawa îrîa imbagia mûtu vîndî îrîa mûndû akûruga mîgate. Mûndûmûka angîoca ndawa îo na amîtukanie na mîkeve îthatû ya mûtu wa ngano, ndawa îo nîimbagia mûtu ûcio wonthe.”

Mûromo ûrîa mûceke

²² Jesû nîwavîtûkîrîre icagirî na matûûrarî akîthomithagia andû vîndî îrîa aathiîte îtûûrarî rîa Jerusalemu.

²³ Nake mûndû ûmwe nîwamûûririe atîrî, “Mwathani, anga atî nî andû anini tu makaavonokua?” Nake Jesû nîwacokerie mûndû ûcio atîrî,

²⁴ “Geragiani mûno gûtonyerera mûromorî ûrîa mûceke. Nîûndû nîramwîra na ma atî, andû eengî nîmakaageria gûtonya na matikaavota.

²⁵ Kavinda nîgagaakinya karîa mwene nyomba agaaûkîra na avinge mûrango. Namue nîmûgaacoka mûke na mwambîrîrie kûringaringa mûrango mûkiugaga atîrî, ‘Mwathani! Tûvingûrîre.’ Nake Mwathani nîakaamûcokeria atîrî, ‘Nie ndiîcî mumîte na kû!’

²⁶ Namue nîmûgaacoka mûmûcokerie atîrî, ‘Vîndî îmwe nîwarîcanîre na ûkînyunyanîra natue, na ûgîcoka ûkîthomithia andû ûrî njîrarî cia matûûra ma gwetû.’

²⁷ Nake Mwathani nîakaamûcokeria rîngî atîrî, ‘Nie ndiîcî mumîte na kû. Nthengutîrani ava ndûrîka ino!’

²⁸ Mue nîmûkoona Iburahimu, Isaka, Jakovu na arathi onthe marî Ûthamakirî wa Ngai, namue mwikîtue na nja. Na kaî vîndî îo mûkoona ûguo nîmûkaarîra na mûrîe magego-î!

²⁹ Andû nîmagaakinya maumîte mwena wa îrathîro wana wa îthûîro, na maumîte mwena wa rûgûrû na wa îveti, na macoke mekare metharî na marîcanîre kîrugorî Kîam ûthamaki wa Ngai.

³⁰ Andû amwe arîa marî vuva rîu nîmagaatuîka a mbere nao amwe arîa marî mbere rîu matuîke a vuva.”

Wendo wa Jesû kûrî andû a îtûûra rîa Jerusalemu

³¹ Vîndî wa îo, Afarisai amwe nîmaathiîre varîa Jesû aarî na makîmwîra atîrî, “Nî kava ume gûkû nîûndû Herode nîarenda gûkûûragithia.”

³² Nake Jesû nîwamacokerie atîrî, “Tathiîni mwîre mbwe îo atî ûmûnthî wana rûyû nîmbîthîrwa nîrî gûkû ngîrutûrûraga ngoma kuuma kûrî andû na ngîmavonagia mîrimû yao. Narîo aûke nîngarîkia wîra wakwa.

³³ Nwatî ûmûnthî, rûyû na aûke nwa nginya mbîthîrwe nîrî rûgendorî rwakwa. Nîûndû tî kwagîrîru mûrathi aûragwe arî kûndû kwîngî tiga îtûûrarî rîa Jerusalemu.

³⁴ “Jerusalemu, Jerusalemu! Atî wa rîrîa rîonthe Ngai agûtûmîra arathi nîkwa ûmaûragaga! Nî maita megana nanenda gûcokanîrîria andû aku vamwe wata ûrîa ngûkû îcokanagîrîria tûciiû rungu rwa mathagu mayo, nwatî ndûmbîtîkagîria!

³⁵ Kwoguo nîngûtiganîria hekarû yaku. Nîrakwîra na ma atî, we ndûkaamona nginya rîrîa kavinda gagaakinya karîa ûkaauga atîrî, ‘Ngai arorathima ûrîa ûûkîte na rîîtwa rîa Mwathani!’ ”