Luka 12 - ÎVUKU RÎA ÛVORO MWARO

Gûkaanua ûvinga

¹ Vîndî wa îo, rîrîa andû ngiri nyîngî maagomanîte nginya makambîrîria gûkinyangana magûrû, Jesû nîwambire kwarîria arutwa ake akîmeera atîrî, “Îîmenyagîrîreni kuumana na ûvinga wa Afarisai ûrîa wîkariî ta ndawa ya kwimbia mîgate.

² Ûndû wa wonthe mûkunîkîre nîûgaakunûrwa, na wa wonthe mûthithe, nîûkaamenyeka.

³ Kwoguo, ûndû wa wonthe mwanarîria ndumarî andû nîmakaawîgua ûtherirî, na ûndû wa wonthe mwanavevanîrîra mwîthithîte nyomba ndarî, nî ûkaanîrîrwa nî mûndû arûngamîte nyomba îgûrû.

Nî ûrîkû mwagîrîrwe nî gwîtigîra

⁴ “Arata akwa nîramwîra atîrî: mûtigetigîre andû arîa maûragaga mwîrî na marîkia gwîka ûguo, matirî na ûndû wîngî mangîvota gwîka.

⁵ Nie nîngûmwonia ûrîa mwagîrîrwe nî gwîtigîra. Îîtigagîreni Ngai ûrîa wîthagîrwa arî na ûvoti wa kûûraga mûndû na akamwikia îcuarî. Nîramwîra na ma atî, ûcio nîke mwagîrîrwe nî gwîtigîra!

⁶ “Na kinthî tûconi tûtano tûtiendagua thendi igîrî? Nwatî gûtirî gaconi wana kamwe ga tuo Ngai ariganagîrwa nîko.

⁷ Wana nginya njuîrî cionthe cia kîongo kîenyu nî ndare. Kwoguo tigagani gwîtigîra nîûndû mue mûrî a vata mûno gûkîra tûconi twîngî.

Kumbûra Kristû na kûmûkaana

⁸ “Nîramwîra na ma atî mûndû wa wonthe ûnyumbûraga mbere ya andû, wana Mûrû wa Mûndû nîakaamumbûra mbere ya araika a Ngai.

⁹ Nwatî mûndû wa wonthe ûngaanaga mbere ya andû, wana Mûrû wa Mûndû nîakaamûkaana mbere ya araika a Ngai.

¹⁰ “Mûndû wa wonthe ûcambagia Mûrû wa Mûndû nîakooverwa, nwatî mûndû wa wonthe ûrumaga Roho Mûtheru ndarî vingo akooverwa.

¹¹ “Vîndî îrîa andû mamûvira mûgacirithue mavoerorî, athamaki wana kana mbere ya anene, mûtikamake mûgîîciria ûrîa mûngîyarîrîria wana kana mûngiuga.

¹² Nîûndû îvinda rîu rîakinya, Roho Mûtheru nîakaamûthomithia ûrîa mwagîrîrwe nî kwîyarîrîria.”

Ngerekano ya gîtonga kîrîa kîarî kîritu

¹³ Mûndû ûmwe warî kîrîndîrî nîwerire Jesû atîrî, “Mwarimû, îra mûrwaiya etîkîre tûgaane nake îgai rîrîa vava aatûtigîre.”

¹⁴ Nwatî Jesû nîwamûcokerie atîrî, “Mûrata wakwa, nî ûrîkû ûmvete rûtha rwa gûtua ciira yenyu na rwa kûgaa indo cienyu?”

¹⁵ Nake Jesû nîwacokire akîra andû onthe atîrî, “Îîmenyagîrîreni na mwîgitagîre kuumana na maûndû monthe ma ûkoroku, nîûndû mûtûûrîre wa ma wa mûndû ndwîthagîrwa ûthondeketwe nî ûtonga wana angîthîrwa mûndû ta ûcio atongete atîa.”

¹⁶ Nake nîwacokire akîra kîrîndî ngerekano îno: “Vîndî îmwe kwarî na mûndû gîtonga warî na mûgûnda warî na kîmera Kîamro.

¹⁷ Nake nîwambîrîrie kwîyûria na ngoro atîrî, ‘Angwa rîu nie nîmbîka atîa, nîûndû ndirî na îkûmbî nîngîkethera irio ino cionthe?’

¹⁸ Mûndû ûcio nîwacokire akîîra atîrî, ‘Nie nîntharia makûmbî makwa na njoke ndume mengî manenanene kûrîa ngwiga irio cionthe ciakwa wa vamwe na indo irîa ciîngî ciakwa.

¹⁹ Na nîngûcoka nîîre atî nie nîrî na mûnyaka. Nîrî na indo nyîngî cia kûmbîgana mîaka mîîngî. Rîu nîmbîkara nthî nîguo ndîe na nyue ngenete!’

²⁰ Nwatî Ngai nîwamwîrire atîrî, ‘We kîrimû gîkî! Ûtukû wa ûmûnthî nî ûkûnenganîra mwoyo ûcio waku. Kwoguo, nî ûrîkû ûkûnyita îgai rîu rîa indo ciaku?’ ”

²¹ “Ûguo nwa ta guo gwîkaraga vîndî îrîa mûndû eigîra mûthithû ûrîa ûtarî wa ndûmîrîri ya Ngai.”

Îîvokeni Ngai

²² Jesû nîwacokire akîra arutwa ake atîrî, “Nie nîramwîra atî mûtikamakue nî ûvoro wîgiî irio irîa mûvatarîte kûrîa nîguo mûtûûre, wa na kana nguo irîa mûvatarîte gwîkîra mîîrîrî yenyu.

²³ Nîramwîra ûguo nîûndû mwoyo ûrî vata mûno gûkîra irio, naguo mwîrî ûrî vata mûno gûkîra nguo.

²⁴ Tathiîni mûkaaroria mogogo: mativandaga na matikethaga; matirî nyomba cia kwiga maketha na matirî makûmbî; na Ngai nîamavecaga gîa kûrîa. Mue mûrî vata mûno gûkîra iconi!

²⁵ Kûrî na mûndû wana ûmwe gatagatîrî kenyu ûngîyongerera mûthenya wana ûmwe ûtûûrorî wake wana akamaka atîa?

²⁶ Angîthîrwa mûtingîvota gwîîkîra wana kaûndû kanini ûguo, nîndûî kîratûma mûmakue nî ûvoro wîgiî maûndû mau mengî?

²⁷ Tathiîni mûkaaroria ûrîa maûa ma kîthakarî makûraga; matiîrutagîra wîra wana kana metumîre nguo. Nwatî nie nîramwîra atî wana ethîrwa mûthamaki Solomoni aarî mûtongu mûno, ke ndangîonire riiri ta wa riûa wana rîmwe rîa mama.

²⁸ Angîthîrwa Ngai nîke ûvecaga nyaki ya kîthakarî riiri, nyaki îrîa îrî vo ûmûnthî na rûyû îgaikua riiko, na kinthî tî ke ûngîmwîkîra nguo mûno makîria mue andû aya a wîtîkio mûnini!

²⁹ “Kwoguo mûtigatangîke mûkîûria kîrîa mûkaarîa na mûkaanyua.

³⁰ (Nîûndû wana andû onthe a nthî îno arîa matetîkîtie matangîkaga magîcaria maûndû mau. Ngai îthe wenyu nî wîcî nîmûvatarîte maûndû mau.)

³¹ Vandû va ûguo, cariani Ûthamaki wake, nake nîakaamûva maûndû mama monthe.”

Îigîreni ûtonga îgûrû kwa Ngai

³² “Tigani gwîtigîra mue ndîthia îno nini nîûndû Ngai îthe wenyu nîwonete kûrî kwagîrîru amûve ûthamaki.

³³ Endiani indo cionthe cienyu na mûcoke mûve athîni mbeca icio. Îîthondekereni tûveeti twa mbeca tûrîa tûtangîthira. Îigîreni mûthithû wenyu îgûrû kwa Ngai, kûrîa ûtangînyiva nîûndû gûtirî mwîi ûngîûkinyîra wana kana mûthûa ûngîûcûkia.

³⁴ Nîûndû kûrîa kuonthe mûthithû waku ûrî, nîkuo ngoro yaku îthagîrwa îrî.

Ndungata irîa ciîkaraga ciîvarîrîtie

³⁵ “Îkaragani mwîvarîrîtie vingo cionthe na mwîna taa cienyu igîakanaga.

³⁶ Tuîkani ta ndungata irîa cietererete mwathi wacio akiuma kîrugorî Kîam ûviki. Ciîkaraga ciîvarîrîtie nîguo vîndî wa yonthe îrîa angîûka na aringaringa mûrango, nwa imûrugûrîre wa rîmwe.

³⁷ Kûrathimwa nî ndungata irîa ciîthagîrîrua nî mwathi wacio itamamîte vîndî îrîa acoka. Nie nîramwîra na ma atî vîndî îrîa mwathi wacio agaacoka akamba kûruta îgooti, ameete mathiî mekare metharî na acoke amaraîre.

³⁸ Kûrathimwa nî ndungata irîa mwathi wacio akeethîrîria ciîvarîrîtie vîndî îrîa agaakinya, wana angîthîrwa ke agaakinya thaa thita kana thaa kenda cia ûtukû.

³⁹ Nwatî mue mwagîrîrwe nî kûmenya atî kethîrwa mwene mûciî nîwecî vîndî îrîa mwîi agaaûka ndangîarekererie mwîi ûcio avunje nyomba yake.

⁴⁰ Wa namue îkaragani mwîvarîrîtie nîûndû Mûrû wa Mûndû agaaûka îthaarî rîrîa mûtamwîrîgîrîrîte.”

Ndungata îrîa îvokekete na îrîa îtevokekete

⁴¹ Petero nîwaûririe Jesû atîrî, “Mwathani, ûravecana ngerekano îno nîûndû wetû kana nîûndû wa andû onthe?”

⁴² Nake Jesû nîwamûcokerie atîrî, “Ndungata îrîa îvokekete na mbûgî, nî îrîkû? Nî îrîa îvecagwa nî mwathi wayo wîra wa kûrûngamîrîra ndungata irîa ciîngî na wa kûigaîra irio mathaa marîa magîrîrîte.

⁴³ Kûrathimwa nî ndungata îrîa îthagîrîrua nî mwathi wayo îgîka ûguo!

⁴⁴ Nîramwîra na ma atî mwene mûciî nî akaava ndungata îo wîra wa kûrûngamîrîra indo cionthe ciake.

⁴⁵ Nwatî ndungata îo îngîîra atîrî, ‘Mwathi wakwa nîagwîkara kavinda karaca ma agîgaacoka,’ na yambîrîrie kûriva ndungata cia arûme na cia aka irîa irî kuo, na îcoke yambîrîrie kûrîa na kûnyua ndivei nginya îkarîwa,

⁴⁶ mwathi wa ndungata îo agaacoka amiumîrîre mûthenya ûmwe ûrîa îtamwîrîgîrîrîte na îthaarî rîrîa yo îtaicî. Mwathi wa ndungata îo nîagaacoka amîverithie mûno na amîngate îthiî îgekaranie na andû arîa matetîkîtie.

⁴⁷ “Nayo ndungata îrîa îcî ûndû ûrîa mwathi wayo endaga îke, nwatî ndîvaragîria wana kana îîke ûndû ûcio, nîkaavewa îvera rîa kûrivwa mûno na kîvoko.

⁴⁸ Nwatî ndungata îrîa îtaicî ûrîa mwathi wayo endaga na îkaga ûndû ûrîa ûngîtûma îverithue, nîkaavewa îvera rîa kûrivwa vanini na kîvoko. Mûndû ûrîa wîvoketwe na indo nyîngî nîageetua indo nyîngî; na ûrîa nake wîvoketwe na nyîngî makîria, nîageetua nyîngî makîria.

Jesû aûkîte kûrete ngaûkano

⁴⁹ “Nie mbûkîte kûrete mwaki gûkû nthî; naarî kethîrwa nîmwambîrîriu gwakana!

⁵⁰ Nie nîrî na ûvatithio ngeerie kûvatithua naguo. Nîrathînîka ngîyûria rîrîa ûndû ûyû ûkaavingua.

⁵¹ Mûreciria mbûkîte kûrete thayû gûkû nthî? Naarî! Nie ndiûkîte kûrete thayû, nwatî mbûkîte kûrete ngaûkano.

⁵² Kwambîrîria rîu andû atano a mûciî ûmwe makethagîrwa magaûkanîte, athatû mathûre aîrî, nao acio aîrî mathûre acio athatû.

⁵³ Mûndû akathûûraga mûvîcî, nake mwanake akathûûra îthe; mûndû akathûûraga mwarî, nake mwîrîtu akathûûra ng'ina; mwîrîtu aavika akathûûraga naciarawe, na naciara akathûûra mwarî ûcio ûvikîte gwake.”

Gûkûrûkania mavinda

⁵⁴ Jesû nîwacokire akîva kîrîndî ngerekano îno: “Mûngîona matu mairû mambîrîria kuumîra mwena wa îthûîro, mugaga wa rîmwe atî nî gûkura na gûkaura.

⁵⁵ Na mwegua rûkûngi rûkîvurutana rumîte mwena wa îveti mûkauga atî nî gûkûgîa ûrugarî mwîngî na nîgûkaagîa naguo.

⁵⁶ Mue mvinga ino! Nwa mûrorie nthî na îgûrû na mûgataûra ûrîa gûgwîkara. Nîndûî vi kîratûma mûrigwe nî vata wa mavinda mama?

Geragiani kwîgucana na nthû cienyu

⁵⁷ “Nîndûî kîgiragia mûtue ciira ya ûndû ûrîa mwagîrîrwe nî gwîka?

⁵⁸ Mûndû angîkûthitanga, amba ûgerie wa ûrîa ûngîvota mwîgucane nake mbere ya mûgakinya îgootirî. Warega gwîka ûguo, mûndû ûcio nîagûkûvira kûrî mûcirithania, nake mûcirithania akûnenganîre kûrî athigari nao makûvingîre njeera.

⁵⁹ Nîrakwîra na ma atî, ndûkaauma njeera ûtambîte kûrîva nginya gatururu ka mûthiia ka thendi irîa ûtuîrîrîtwe.”