Luka 11 - ÎVUKU RÎA ÛVORO MWARO

Jesû nîwathomithirie arutwa ake kûvoya

¹ Vîndî îmwe Jesû aarî vandû akîvoya. Na rîrîa aarîkirie kûvoya, mûrutwa ûmwe wake nîwamwîrire atîrî, “Mwathani, tûthomithie kûvoya ta ûrîa Johana aathomithirie arutwa ake.”

² Nake Jesû nîwamerire atîrî, “Vîndî îrîa mûkûvoya, ugagani atîrî, ‘Vava: Rîîtwa rîaku rîtheru rîrotîîwa; ûthamaki waku nî ûûke.

³ Tûvecage wa mûthenya wa mûthenya irio cietû cia gûtwîgana,

⁴ na ûtwovagîre mevia metû, nîûndû wa natue nîtwovagîra andû onthe arîa matûvîtagîria. Na ndûgatûvire mageriorî.’ ”

⁵ Nake Jesû nîwacokire akîîra arutwa ake atîrî, “Angwa mûndû ûmwe gatagatîrî kenyu angîthiî mûciî kwa mûrata wake, ûtukû gatagatî na amwîre atîrî, ‘Mûrata wakwa, mva mîgate îthatû nîûndû

⁶ nie nîrî na mûrata wararîrîra gwakwa na ndirî na kîndû gîa kûmûraîra!’

⁷ Na mûrata ûcio wake arî nyomba ndaarî amûcokerie atîrî, ‘We tiga kûnthînia! Mûrango nîmûvinge, na nie vamwe na ciana ciakwa tûrî ûrîrî tûmamîte. Kwoguo gûtirî kîndû nîngîûkîra gûkûva.’

⁸ Nie nîramwîra nama atî wana angîthîrwa mûrata ûcio ndangîûkîra na amûnengere mîgate îo nîûndû atî ke nî mûrata wake, nwatî ke nwa aûkîre na akamûva kîndû kîrîa kîonthe avatarîte nîûndû wa gûtinda akîmûvoya.”

⁹ “Kwoguo nîramwîra atî: Voyani na nîmûkûvewa, cariani na nîmûkwona, ringaringani mûrango na nîmûkûvingûrîrwa.

¹⁰ Nîûndû mûndû wa wonthe ûvoyaga nîavecagwa, ûrîa ûcaragia nîwonaga na ûrîa nake ûringaringaga mûrango, nîavingûragîrwa.

¹¹ Angwa kûrî mûciari ûngîîtua nthamaki nî mwana wake, nake akamûva njoka?

¹² Wana kana amwîtie îtumbî nake akamûva kang'aurû?

¹³ Ethîrwa mue wana mûrî acûku nîmûmenyaga kûva ciana cienyu indo mbaro, nî maita megana îthe wenyu ûrîa ûrî îgûrû angîvecana Roho Mûtheru kûrî andû arîa mamwîtagia!”

Jesû na Belizebuli

¹⁴ Vîndî îmwe Jesû nîwarutûrûraga ngoma kuuma kûrî mûndû ûmwe ûtaavotaga kwaria. Rîrîa ngoma îo yaumire kûrî ke, mûndû ûcio nîwambîrîrie kwaria na andû onthe nîmaamakire mûno.

¹⁵ Nwatî andû amwe gatagatîrî kao nîmaambîrîrie kuga atîrî, “Nî Belizebuli mûnene wa ngoma ûmûvecaga ûvoti wa kûrutûrûra ngoma.”

¹⁶ Nao andû engî makîmûgeria nîmaamûririe amaringîre Kîamma kuuma îgûrû nîguo onanie atî Ngai aarî vamwe nake.

¹⁷ Nwatî Jesû nîwamenyire ûrîa meeciragia, na kwoguo nîwamerire atîrî, “Ûthamaki wa wonthe ûngîîgaûkania, ndûngîîrûngamia kavinda karaca. Wana nginya mûciî ûngîîgaûkania, nîkwa ûvaraganaga.

¹⁸ Kwoguo ethîrwa ûthamaki wa Caitani nîwîgaûkanîtie, ûthamaki ûcio ûngîvota kwîrûngamia atîa? Nie nîrauga ûguo nîûndû mue mugaga atî Belizebuli nîke ûmvotithagia kûrutûrûra ngoma.

¹⁹ Angîthîrwa Belizebuli nîke ûmvotithagia kûrutûrûra ngoma-î, nao arûmîrîri enyu marutûrûraga ngoma mavotithîtue nû? Kwoguo wana nginya arûmîrîri enyu nîmaicî atî mue mûrî avîtiu!

²⁰ Nwatî ethîrwa Ngai nîke ûmvotithagia kûrutûrûra ngoma, ûguo nî kwonania atî Ûthamaki wa Ngai nîûrîkîtie gûka kûrî mue.

²¹ “Mûndû ûrî na vinya angîgitîra mûciî wake evotorete viû na indo cia mbaara, indo cionthe ciake ciîthagîrwa irî menyerere.

²² Nwatî mûndû ûcio angîtonyererwa na akîrue vinya nî mûndû wîngî, mûndû ûcio mûmûkîriu vinya nî amûcunaga indo cionthe ciake cia mbaara irîa egitîrîte nacio na agacoka agakuua indo imwe kuuma kûu mûciîrî wa mûndû ûcio aakîria vinya.

²³ “Mûndû wa wonthe ûtethagîrwa arî vamwe nanie na ma ke nî nthû yakwa. Na mûndû wa wonthe ûtacokanagîrîria vamwe nanie na ma ke nîkwa anyagarûkanagia.”

Gûcoka kwa Ngoma

²⁴ “Vîndî îrîa ngoma yauma kûrî mûndû, nî yûrûraga werûrî îgîcaria vandû varîa îngîvurûka. Na yatura vandû îngîvurûka nî îîraga atîrî, ‘Nie nîngûcoka kûrî mûndû ûrîa ûraarî nyomba yakwa.’

²⁵ Kwoguo ngoma îo yacoka kuo, nîîthagîrîria nyomba îo îrî mvate na irî njokanîrîrie waro.

²⁶ Ngoma îo nîîcokaga îkagîîra ngoma ciîngî mûgwanja na nthûku kûmîkîra, na ciaûka igekara kûrî mûndû ûcio. Nake mûndû ûcio nîacûkagîrwa mûno makîria ya ûrîa ke arekariî vau mbererî.”

Kîrathimo kîa ma

²⁷ Rîrîa Jesû aarîkirie kuga ûguo, mûndûmûka ûmwe warî kîrîndîrî nîwaugîrîrie atîrî, “Kûrathimwa nî mûndûmûka ûrîa wagûciarire na agîkûrera!”

²⁸ Nwatî Jesû nîwamûcokerie atîrî, “Kûrathimwa makîria nî andû onthe arîa megucaga kiugo Kîam Ngai na magakîathîkîra!”

Andû nîmeerire Jesû amaringîre kîama

²⁹ Vîndî îrîa andû maambîrîrie kwîngîva, Jesû nîwamerire atîrî, “Na kaî andû a rûciaro rûrû nî aganu-î! Atî marauga maringîrwe Kîamma. Kîama kîrîa mangîringîrwa nî kîrîa Kîam Jona tu.

³⁰ Nîûndû wata ûrîa Jona aatuîkire kîmenyithia kûrî andû a îtûûra rîa Nineve, ûguo nwaguo Mûrû wa Mûndû agûtuîka kîmenyithia kûrî andû a rûciaro rûrû.

³¹ Mûthenya wa îtuîro wakinya, mûndûmûka ûrîa warî mûthamaki wa vûrûri wa Sheba nîakaarûngama na athitange andû a rûciaro rûrû, nîûndû ke nîwathiîre rûgendo rûraca mûno rwa kuuma vûrûrirî wake na akîthiî kûthikîrîria ûûgî wa Solomoni. Nwatî rîu nîramwîra nama atî ava varî na mûndû mûnene gûkîra Solomoni.

³² Mûthenya wa îtuîro wakinya, andû a îtûûra rîa Nineve nîmakaarûngama na mathitange andû a rûciaro rûrû nîûndû nîmeeririre vîndî îrîa Jona aamavunjîrie. Nwatî rîu nîramwîra nama atî, ava varî na mûndû mûnene gûkîra Jona.

Ûtheri wa mwîrî

³³ “Gûtirî mûndû ûgwatagia taa akînamîthitha Mûndû agwatagia taa na akamigîrîra vandû îgûrû nîguo îmûrîkîre andû magîtonya nyomba.

³⁴ Metho maku nîmo taa ya mwîrî waku. Vîndî îrîa metho maku marona waro, wana nginya mwîrî waku wîthagîrwa ûrî mwîcûre nî ûtheri, nwatî vîndî îrîa metho maku matakwona waro, wana nginya mwîrî waku wîthagîrwa ûrî mwîcûre nî nduma.

³⁵ Kwoguo îîmenyerere nîguo ûtheri ûrîa ûrî ndarî yaku ndûgatuîke nduma.

³⁶ Angîthîrwa mwîrî wonthe waku nîmwîcûre nî ûtheri na ndûrî na gîcunjî wana kîmwe kîrî na nduma mwîrî ûcio waku wîthagîrwa ûgîkenga vingo cionthe, wa ta ûrîa ûtheri wa taa ûkûtheragîra.”

Jesû nîwengîrîre Afarisai na Arimû a Watho

³⁷ Vîndî îrîa Jesû aarîkirie kwaria, Mûfarisai ûmwe nîwamwîtire nîguo mathiî nake gwake makarîe. Kwoguo Jesû nîwatonyire nyomba ndarî na agîkara metharî kûrîa irio.

³⁸ Nake Mûfarisai ûcio nîwamakire mûno rîrîa oonire Jesû ambîrîria kûrîa irio atambîte kwîthambia njara.

³⁹ Jesû nîwamwîrire atîrî, “Mue Afarisai aya! Mûthambagia ikombe na thaani cienyu îgûrû, nwatî ngororî cienyu mwîcûrîtwe nî ûkoroku na waganu.

⁴⁰ Mue irimû ino! Na kinthî Ngai ûrîa waûmbire mwena wa îgûrû wa gîkombe na wa thaani twake waûmbire mwena wa ndarî?

⁴¹ Vandû va gwîka ûguo, vecagani athîni ûtethio na indo cionthe cienyu nî igûtuîka ntheru.

⁴² “Kaî mue Afarisai mûrî na thîna-î! Nîûndû mue mûrutagîra Ngai gîcunjî gîa îkûmi Kîam manyenyi ta ma rwoga, karîmî ka nthiia na nderamûkîa, nwatî mûgatiganîria ûthingu wa vamwe na kwenda Ngai. Maûndû mama mwagîrîrwe mûmekage mûtagûtiganîria marîa mengî.

⁴³ “Kaî mue Afarisai mûrî na thîna-î! Nîûndû mue mwendaga gwîkara itîîrî cia mbere mavoerorî wa vamwe na gûkethua na njîra îrî na gîtîîo rîrîa mûrî thokorî!

⁴⁴ Na kaî mue mûrî na thîna-î! Nîûndû mue mwîkariî ta mbîrîra irîa itarî na rûûri na irîa andû makinyangaga matakûmenya.”

⁴⁵ Nake mwarimû ûmwe wa watho nîwerire Jesû atîrî, “Mwarimû, vîndî îrîa ûkuga ûguo, wa natue nî ûratûruma!”

⁴⁶ Nwatî Jesû nîwacokirie atîrî, “Na kaî wa namue arimû a watho mûrî na thîna-î! Nîûndû mue mwaîkaga andû mîrigo mîrito, nwatî mûkarega kûmîvutia wa naaî na Kîamra kîmwe kîenyu mûkîmatethia kûmîkuua.

⁴⁷ Na kaî mûrî na thîna-î! Nîûndû mue mûthondekagîra arathi mbîrîra mbaro arathi wa arîa methe menyu maaûragire.

⁴⁸ Kwoguo mue nîmwîtîkagîra atî methe menyu nîmeekire waro nîûndû o nîo maaûragithirie arathi, namue mûkîmathondekera mbîrîra.

⁴⁹ Nîûndû wa ûguo, ke ûrîa wîtagwa Ûûgî wa Ngai nîwaugire atîrî, ‘Nie nîngaamatûmîra arathi wana atûmwa. Nîmakaaûraga amwe ao na manyarire arîa engî.’

⁵⁰ Kwoguo andû a rûciaro rûrû nîmakaaverithua nîûndû wa kûûraga arathi onthe arîa maanaûraga kuuma rîrîa nthî yaûmbirwe.

⁵¹ Nîmakaaverithua nîûndû wa arathi onthe arîa maanaûraga kuuma vîndî ya Habili nginya ya Zakaria ûrîa waûragirwe arî gatagatî ka metha ya kîgongoona kîtheru na hekarû. Îni nie nîramwîra na ma atî, andû a rûciaro rûrû nîmakaaverithua nîûndû wa kûûraga andû acio onthe.

⁵² “Na kaî mue arimû a watho mûrî na thîna-î! Nîûndû mue mûrî aigu cavi îrîa îrugûraga mûrango wa gûtonya nyombarî îrîa andû magîcagîra ûmenyo. Mue mûtirî atonyu nyombarî îo na nwakwa mûragirîrîria andû arîa marenda gûtonya!”

⁵³ Rîrîa Jesû aaumire kûu, arimû a watho na Afarisai nîmaamwîngîrîre na vinya mûno na makîmûûria ciûria ciîgiî maûndû meengî. Arimû acio a watho na Afarisai meekire ûguo

⁵⁴ marî na mworoto wa kûmûtega nîguo megue kana vaarî na ûndû mûcûku angîaugire.