Luka 10 - ÎVUKU RÎA ÛVORO MWARO

Jesû nîwatûmire arutwa mîrongo mûgwanja na aîrî

¹ Vuva wa ûguo, Mwathani nîwathuurire andû engî mîrongo mûgwanja na aîrî, na akîmatûma aîrî aîrî mathiî mbere yake matûûrarî monthe na kûndû kuonthe kûrîa ke aageerie kûthiî.

² Nake Mwathani nîwamerire atîrî, “Maketha nî meengî, nwatî aruti wîra nî anini. Thaithani mwene maketha atûme aruti wîra mûgûndarî wake.

³ Thiîni kûrîa namûtûma. Nie namûtûma ta ng'ondu irî gatagatî ga ciathi.

⁴ Mûtigakuue iveeti, mîvuko wana kana iratû; na mûtigakethie mûndû wana ûmwe njîrarî.

⁵ Mûciî wa wonthe ûrîa mûgaatonyaga ambagani kuga atîrî, ‘Thayû ûrogîa mûciîrî ûyû!’

⁶ Na angîthîrwa kûu mûciîrî ûcio kûrî na mûndû wîkaraga kuo wendete thayû, thayû ûcio wenyu ûgeekaraga nake. Nwatî angîthîrwa kûu mûciîrî ûcio gûtirî mûndû wîkaraga kuo wendete thayû, thayû ûcio wenyu ûkaamûcokagîrîra.

⁷ Îkaragani mûciîrî ûcio mûkîrîcaga na mûkînyunyaga kîndû wa kîonthe kîrîa andû akuo makamûnengagîra, nîûndû mûthûkûmi nîwagîrîrwe kûvewa mûcara wake. Mûtikaûrûrage kuuma mûciîrî ûmwe nginya ûrîa wîngî.

⁸ Îtûûrarî wa rîonthe rîrîa mûkaathiîcaga, na andû akuo mamûgwate ûgeni, rîcagani irio irîa makaamûvecaga.

⁹ Vonagiani arwaru arîa makethagîrwa marî kuo, na mwîrage andû akuo atî, ‘Ûthamaki wa Ngai ûrî vakuvî mûno namue.’

¹⁰ Nwatî îtûûra wa rîonthe rîrîa mûgaatonyaga na andû akuo marege kûmûgwata ûgeni, umagîrani tûvaravararî twa îtûûra rîu mûkiugaga atîrî,

¹¹ ‘Wana nginya rûkûngû rwa îtûûra rîenyu rûrîa rûraûmbîrîrîte magûrûrî metû, nîtwerivariva ruo nîguo rûmûcokerere. Nwatî ririkanani atî, Ûthamaki wa Ngai ûrî vakuvî mûno namue!’

¹² Nie nîramwîra na ma atî, mûthenya wa îtuîro Ngai nîakeeguîra andû a îtûûra rîa Sodomu ntha nyîngî gûkîra ûrîa akeeguîra andû a îtûûra rîu!

Andû a matûûra marîa matetîkîtie

¹³ “Mue andû a îtûûra rîa Korazini! Na kaî mûrî na thîna-î! Wa namue andû a îtûûra rîa Bethisaida! Na kaî mûrî na thîna-î! Nîûndû angîthîrwa ciama îrîa ciaringirwe matûûrarî menyu ciaringirwe matûûrarî ma Turo na Sidoni, andû akuo mangîekarire nthî tene, mageekîra nguo cia macakaya, na makeminjîria mûu nîguo monanie atî nîmeerirîte mevia mao!

¹⁴ Mûthenya wa îtuîro, Ngai nîakeeguîra andû a matûûra ma Turo na Sidoni ntha nyîngî gûkîra ûrîa ke akaamwîguîra.

¹⁵ Namue andû a îtûûra rîa Kaperinaumu, nîkwa mwendaga kwînenevia nginya mûkinye îgûrû? Mue nîmûgaaikua îcuarî!”

¹⁶ Jesû nîwacokire akîîra arutwa ake atîrî, “Mûndû wa wonthe ûrîa ûmûthikagîrîria, nînie athikagîrîria; na mûndû wa wonthe ûrîa ûmûregaga, nînie aregaga, na mûndû wa wonthe ûrîa ûndegaga, aregaga ûrîa wandûmire.”

Arutwa arîa mîrongo mûgwanja na aîrî nîmaacokire

¹⁷ Nao arutwa arîa mîrongo mûgwanja na aîrî nîmaacokire makenete na makîra Jesû atîrî, “Mwathani, wana nginya ngoma nîiratwathîkagîra rîrîa twaciatha na rîîtwa rîaku!”

¹⁸ Nake Jesû nîwamacokerie atîrî, “Nie nîronire Caitani akîgwa nthî wa rîmwe kuuma îgûrû wata ûrîa rûveni rûvenûkaga.

¹⁹ Rîu nie nînamûva ûvoti wa kûthiî mûgîkinyangaga ciîmvuva wana tûng'aurû, na ûvoti wa kûvoota maavinya monthe ma ngoma na gûtirî kîndû gîkaamwîka naaî.

²⁰ Mûtigakene nîûndû wa atî ngoma nîiramwathîkîra, nwatî mûkene nîûndû marîîtwa menyu nîmandîke îgûrû.”

Jesû nîwakenire

²¹ Vîndî îo Jesû nîwakenire ecûrîtwe nî Roho Mûtheru na akiuga atîrî, “Vava wa îgûrû na nthî, nînagûcokeria ngatho nîûndû we nîwonetie andû arîa enyivia maûndû marîa ûthithîte andû arîa aûgî na imenyi. Îni nîguo Vava, ûguo nîguo we wendaga gwîkîke.”

²² “Vava nîmûnengeru maûndû monthe. Gûtirî mûndû wana ûmwe wîcî Mûriû tiga Îthe, na gûtirî mûndû wana ûmwe wîcî Vava tiga Mûriû na andû arîa Mûriû endaga kûmenyithia ke nû.”

²³ Jesû nîwacokire akîîvûgûra na kûrîa arutwa ake maarî akîmeera marî onga atîrî, “Na kaî mue mûrî arathime nîûndû wa kwona maûndû marîa mwonaga-î!

²⁴ Nie nîramwîra nama atî arathi eengî na athamaki nîmeendaga mûno kwona kîrîa mue mûrona nwatî matiakîona, na kwîgua kîrîa mue mûregua nwatî matiakîgua.”

Ngerekano ya Mûsamaria Mwaro

²⁵ Vîndî îmwe mwarimû ûmwe wa watho nîwarûngamire akîenda kûgeria Jesû na akîmûria atîrî, “Mwarimû, nie nîngîka atîa nîguo ngaagaîrwa mwoyo wa tene na tene?”

²⁶ Nake Jesû akîmûcokeria nîwamûûririe atîrî, “Mandîko matheru maugaga atîa? We ûmataûraga atîa?”

²⁷ Nake mûndû ûcio nîwacokirie atîrî, “‘Enda Mwathani Ngai waku na ngoro yonthe na mwoyo waku wonthe na vinya waku wonthe na meciria maku monthe na wende mûndû ûrîa mûtûûranîrîte nake wata ûrîa we wîyendete.’ ”

²⁸ Nake Jesû nîwamwîrire atîrî, “We nîwacokia waro. Îkaga ûguo na nîûgûtûûra mwoyo.”

²⁹ Nwatî mwarimû ûcio wa watho nîwendaga kwîyarîrîria, kwoguo nîwaûririe Jesû atîrî, “Mûndû ûrîa tûtûûranîrîte nake nî ûrîkû?”

³⁰ Nake Jesû nîwamûcokerie atîrî, “Vîndî îmwe kwarî na mûndû wanyûrûrûkîte aumîte Jerusalemu athiîte Jeriko. Vîndî îrîa aarî varavararî athiîte, nîwaumîrîrwe nî acunani arîa maamûcunire nguo ciake cionthe, makîmûriva na makîmûtiganîria arî vakuvî gûkua.

³¹ Na kavinda wa kau, mûthînjîri-Ngai ûmwe nîwanyûrûrûkîte varavararî wa îo. Nwatî rîrîa ke oonire mûndû ûcio nîwamwererekere na akîvîtûkîra mûkîra ûcio wîngî wa varavara.

³² Na njîra wata îo, Mûlawi ûmwe nîwakinyire varîa mûndû ûcio aarî na amwona akîvîtûkîra mûkîra ûcio wîngî wa varavara îo.

³³ Nwatî Mûsamaria ûmwe ûrîa warî rûgendorî nîwakinyire varîa mûndû ûcio aarî, na amwona akîringwa nî ntha.

³⁴ Nake Mûsamaria ûcio nîwathiîre varîa mûndû ûcio aarî akîmûthambia ironda na ndivei, akîivaka maguta na akîmwova cio. Nîwacokire agîtwîthia mûndû ûcio îgûrû rîa mvunda, akîmûvira mûkawarî kûrîa aamenyererwe.

³⁵ Mûthenya ûcio warûmîrîrîte, Mûsamaria ûcio nîwarutire sîlûva igîrî akînengera mwene mûkawa na akîmwîra atîrî, ‘Menyerera mûndû ûyû na vîndî îrîa ngaacokerera ava, nîngaakûrîva kîndû wa kîonthe kîrîa akeethîrwa avûthîrîte.’ ”

³⁶ Jesû akîrîkîrîria nîwaûririe mwarimû ûcio wa watho atîrî, “Kûringana na meciria maku, nî mûndû ûrîkû gatagatîrî ka andû acio athatû wekire ta mûndû watûûranîrîte na mûndû ûcio warivîtwe nî acunani?”

³⁷ Nake mwarimû ûcio wa watho nîwacokirie atîrî, “Nî mûndû ûrîa wamwîguîrîre ntha.” Nake Jesû nîwamwîrire atîrî, “Wanawe thiî na wîke wata ûguo.”

Jesû nîwathiîre gûcerera Maritha na Mariamu

³⁸ Vîndî îmwe Jesû na arutwa ake maathiîte na mbere na rûgendo, Jesû nîwatonyire gîcagirî kîmwe na mûndûmûka ûmwe wetagwa Maritha akîmûgwata ûgeni gwake mûciî.

³⁹ Nake Maritha aarî na mwarî wa ng'ina wetagwa Mariamu. Mariamu nîwekarire nthî vakuvî na Jesû na akîambîrîria kûmûthikîrîria akîaria.

⁴⁰ Nwatî Maritha nîwaritûvîrîtwe mûno nî wîra, kwoguo nîwathiîre kûrî Jesû atûmbîtwe nî marakara na akîmwîra atîrî, “Mwathani, anga ndûrona mwarwaiya andekereretie wîra wonthe? Ûngîenda tu mwîre aûke andethererie!”

⁴¹ Nwatî Mwathani nîwamûcokerie atîrî, “Maritha! Maritha! We nîûramakua na ûkathînua nî maûndû meengî mûno,

⁴² nwatî ûndû ûmwe tu nîguo ûravatarîka. Mariamu nîwethuurîra ûndû ûrîa wagîrîrîte na ke tî acunwa guo.”