Luka 1 - ÎVUKU RÎA ÛVORO MWARO

¹ Kûrî mûgathe Theofilo: Andû eengî nîmarîkîtie kwandîka ûvoro wîgiî maûndû marîa mekîkîte gatagatîrî getû.

² Maandîkire kûringana na ûrîa twîrîtwe ûvoro nî andû arîa moonire maûndû mama kuuma wa Kîammbîrîria na andû arîa maavunjagia ndûmîrîri ya Ngai.

³ Kwoguo Theofilo, nie nîrona kwagîrîrîte ngwandîkîre na njîra mbaro mûtaratara wa ûrîa maûndû mau meekîkire, nîûndû nie nînaamarûmîrîre waro kuuma wa Kîammbîrîria Kîammo.

⁴ Nie nîrakwandîkîra nîguo ûmenye ûma wonthe wa maûndû marîa ûmenyithîtue.

Mûraika nîwanîrîre gûciarwa kwa Johana Mûvatithania

⁵ Vîndî îrîa Herode aarî mûthamaki wa Judea, kwarî na mûthînjîri-Ngai wetagwa Zakaria, ûrîa warî wa gîkundi Kîam athînjîri-Ngai Kîam Abija. Mûka eetagwa Elizabethi na aarî wa mûvîrîga wa Aroni.

⁶ Na oîrî nîmaatûûrîte marî athingu methorî ma Ngai. Nao nîmaathîkagîra mawatho wa vamwe na maathani ma Mwathani matarî na ûcuke.

⁷ Matiarî na ciana nî ûndû Elizabethi aarî nthata, na wa oîrî maarî akûrû mûno.

⁸ Mûthenya ûmwe Zakaria nîwarutaga wîra wa gûtungata hekarûrî arî mûthînjîri-Ngai vîndî ya gîkundi kîrîa aarî wakîo.

⁹ Rîrîa mîtî yaikirue kûringana na mûtugo wa athînjîri-Ngai, Zakaria nîwathuurirwe kuuma gîkundirî gîake nîguo atonye hekarûrî na avîvie ûbani.

¹⁰ Nao andû eengî nîmaavoyaga marî nja vîndî îrîa ûbani wavîvagua.

¹¹ Zakaria arî kûu hekarûrî ndarî, mûraika wa Mwathani nîwamumîrîre na akîrûngama mwenarî wa ûrîo wa metha ya kîgongoona îrîa yavîvagîrua ûbani.

¹² Vîndî îrîa Zakaria oonire mûraika ûcio nîwamakire na agîcûrwa nî guoya.

¹³ Nwatî mûraika ûcio nîwerire Zakaria atîrî, “Zakaria, ndûkegue guoya. Ngai nîwîguîte mavoya maku. Mûkaguo Elizabethi nîagûgûciarîra mwana wa kavîcî na ûkaagatuîra rîîtwa Johana.

¹⁴ We nîûgaakena na ûcanjamûke na andû engî eengî nîmagaakena vîndî îrîa agaaciarwa.

¹⁵ Nîûndû nîagaatuîka mûndû mûnene methorî ma Mwathani. Nake ndakaanyua ndivei wana kana anyue njovi. Kuuma gûciarwa gwake nîakethîrwa ecûrîtwe nî Roho Mûtheru.

¹⁶ Na nîakaagarûra andû eengî a Isiraeli nîguo macokerere Mwathani Ngai wao.

¹⁷ Nîakaathiî mbere ya Mwathani arî na Roho na vinya wata mûrathi Elija. Nîagaatûma methe mendane na ciana ciao; na acoke agarûre andû arîa aremi magîe na ûûgî wata wa andû arîa athingu na avarîrie andû nîguo meterere Mwathani.”

¹⁸ Zakaria nîwaûririe mûraika ûcio atîrî, “Ngaamenya atîa maûndû mau, nîûndû nie nîrî mûkûrû na mûndûmûka wakwa wa nake nî mûkûrû?”

¹⁹ Nake mûraika ûcio nîwamûcokerie atîrî, “Nie nînie Gaburieli na nûngamîte mbere ya Ngai ûrîa ûndûmîte mbûke ngûkinyîrie ûvoro ûyû mwaro.

²⁰ Na nîûndû nîwarega gwîtîkia ûvoro ûcio nakwîra, ndûkaavotaga kwaria nginya mûthenya ûrîa maûndû mama makaavingua mavinda mamo marîa magîrîrîte makinya.”

²¹ Vîndî îo andû arîa meetererete Zakaria aume hekarûrî, nîmaamakire mûno na makîrigwa nî kîrîa gîatûmîte atinde kûu mûno.

²² Rîrîa aaumire hekarûrî, nîmaamenyire atî nîwonete kîoneki nîûndû wana ageria kûmarîria, ndaavotaga. Nake nîwambîrîrie kûmarîria na ciîko na kuuma vingo îo agîkara atakûvota kwaria.

²³ Rîrîa kavinda gake ga gûtungata hekarûrî kaathirire, Zakaria nîwenûkire gwake mûciî.

²⁴ Nayo mîthenya mînini yavîtûka, mûka Elizabethi nîwagîre îvu. Elizabethi nîwekarire ethithîte îvinda rîa mîeri îtano na akaugaga atîrî,

²⁵ “Rîu Mwathani nîandethetie na akanthengutîria gîconoko gîakwa mbere ya andû!”

Gûciarwa kwa Jesû nîkwanîrîrwe

²⁶ Mwerirî wa gatandatû wa Elizabethi kwîthîrwa arî îvu, Ngai nîwatûmire mûraika Gaburieli îtûûrarî rîa Nazarethi kûu Galili.

²⁷ Aamûtûmire kûrî mwîrîtu nthingi wetagwa Mariamu ûrîa maarîkanîrîte na mûndû wetagwa Josefu atî nîmakûvikania. Josefu aarî wa rûciaro rwa Daudi.

²⁸ Mûraika ûcio nîwathiîre kûrî Mariamu na akîmûkethia atîrî, “Wî mwaro? We wî mûrathime mûno! Mwathani arî vamwe nawe!”

²⁹ Nake Mariamu egua rûkethi rûu rwa mûraika, nîwatangîkire mûno na akîambîrîria gwîciiria ûrîa rûkethi rûu rwendaga kuga.

³⁰ Nwatî mûraika nîwamwîrire atîrî, “Mariamu, tiga kwîgua guoya; Ngai nîmûgûkinyîriu wega wake.

³¹ We nîûkûgîa îvu na ûciare mwana wa kavîcî ûrîa ûgatuîra rîîtwa Jesû.

³² Nake nîagaatuîka mûndû mûnene na nîagetagwa Mûrû wa Ûrîa ûrî Îgûrû Mûno. Mwathani Ngai nîakaamûtua mûthamaki wata Daudi, îthe wake wa tene.

³³ Nake nîagaatuîka mûthamaki wa andû a Isiraeli tene na tene. Naguo ûthamaki wake ndûkaathira!”

³⁴ Nake Mariamu nîwaûririe mûraika ûcio atîrî, “Ûguo kûngîvotekeka atîa na nie nîrî nthingi?”

³⁵ Nake mûraika nîwamûcokerie atîrî, “Roho Mûtheru nîagûka kûrî we, naguo vinya wa Ngai ûrîa ûrî Îgûrû Mûno nîûgaagûkunîkîra ta kîruru. Kwoguo mwana ûcio ûgaaciarwa akethîrwa arî mûtheru na ageetagwa Mûriû wa Ngai.

³⁶ Na rîu wana Elizabethi mûndûmûka ûrîa wa mbarî yenyu na ûrîa wîrîkanaga atî nî nthata, wa nake arî ûkûrûrî wake nîagîte îvu. Ûyû nîguo mweri wa gatandatû kuuma agîa îvu,

³⁷ nîûndû gûtirî ûndû Ngai atangîvota gwîka.”

³⁸ Nake Mariamu nîwerire mûraika ûcio atîrî, “Nie nîrî ndungata ya Mwathani, nîmbîkwe wata ûrîa we wauga.” Nake mûraika ûcio nîwamûtigire.

Mariamu nîwathiîre gûkethia Elizabethi

³⁹ Vuva wa ûguo Mariamu nîwevarîrie na akîthiî îtûûrarî rîmwe rîrîa rîarî vûrûrirî ûrîa ûrî irîma wa Judea.

⁴⁰ Rîrîa aakinyire kuo nîwatonyire nyomba kwa Zakaria na agîkethia Elizabethi.

⁴¹ Rîrîa Elizabethi egwire ngethi cia Mariamu, mwana ûrîa warî îvurî rîake nîwathagatire. Nake Elizabethi nîwecûrirwe nî Roho Mûtheru,

⁴² na akiugîrîria na mûgambo mûnene akiugaga atîrî, “We ûrî mûrathime gatagatîrî ga aka onthe, wana mwana ûrîa ûgaaciara nî mûrathime!

⁴³ Ûndû ûyû mûnene ûguo wekîka kûrî nie nîkî, atî ng'ina wa Mwathani wakwa aûke gwakwa kûngethia?

⁴⁴ Nîûndû kavinda karîa mbîgwire wangethia, mwana ûrîa ûrî îvurî rîakwa nîathagatire nî gûkena.

⁴⁵ Kûrathimwa nîwe nîûndû nîwetîkirie atî ndûmîrîri ya Mwathani kûrî we nî îkûvinga.”

Rwîmbo rwa Mariamu rwa kûgatha Ngai

⁴⁶ Nake Mariamu nîwaugire atîrî: “Ngoro yakwa nîragûkumia Mwathani:

⁴⁷ na roho wakwa nî ûkenete, nîûndû wa Ngai Mûvonokia wakwa,

⁴⁸ nîûndû nî andirikanîte nie mwînyivia ndungata yake! Kuuma rîu andû onthe makaambîtaga mûrathime,

⁴⁹ nîûndû wa maûndû manene marîa Ngai mwene vinya ambîkîrîte. Rîîtwa rîake nî rîtheru;

⁵⁰ nacio ntha ciake nî ikinyagîra arîa onthe mamûtîîte, kuuma rûciaro rûmwe nginya rûrîa rwîngî.

⁵¹ Nî ekîte maûndû manene na njara ciake, nîanyagarûkanîtie arîa etîi wa na mîvango yao.

⁵² Nî agwîthîtie athamaki makauma itîîrî ciao cia ûthamaki, na akanenevia arîa menyivagia.

⁵³ Arîa avûtu nî amavaithîtie na indo mbaro, na akengata itonga ithiî njara ntheri.

⁵⁴ Nîaigîte kîrîkanîro kîrîa erîîre methe metû, nî atethetie Isiraeli ndungata yake.

⁵⁵ Wa ta ûrîa erîîre methe metû, nîakeguîra Iburahimu na njiarwa ciake ntha tene na tene!”

⁵⁶ Nake Mariamu nîwekaranirie na Elizabethi kavinda ka mîeri ta îthatû na agîcoka akîînûka.

Gûciarwa kwa Johana Mûvatithania

⁵⁷ Kavinda ka Elizabethi ga kûgîa mwana nî gaakinyire na agîciara kavîcî.

⁵⁸ Rîrîa andû a îtûûra arîa maatûûranîrîte na Elizabethi wa vamwe na andû a mûciî wao meegwire ûrîa Mwathani aamwîkîte waro, nî maakenanîre nake.

⁵⁹ Rîrîa mwana ûcio aathiririe mîthenya înana kuuma aciarwa nîwaruithirue. Andû meendaga mwana ûcio atuîrîrwe rîîtwa etwe Zakaria wa ta ûrîa îthe eetagwa.

⁶⁰ Nwatî ng'ina nîwamerire atîrî, “Naarî! Mwana agetagwa Johana.”

⁶¹ Nao andû nîmaamwîrire atîrî, “Tatarania wone atî gûtirî mûndû wa na ûmwe wa mûciî wenyu wîtagwa ûguo!”

⁶² Nîmaacokire makîarîria îthe wa mwana ûcio na ciîko makîmûûria rîîtwa rîrîa ke eendaga mwana ûcio etwe.

⁶³ Nake Zakaria nîwetirie rûvaû rwa kwandîkîra na akîandîka atîrî, “Rîîtwa rîake nî Johana.” Nao andû onthe makîmaka mûno.

⁶⁴ Vîndî wa îo Zakaria nîwavotire kwaria na akîambîrîria gûkumia Ngai.

⁶⁵ Nao andû onthe arîa maatûûranîrîte nake nî meegwire guoya mûno. Naguo ûvoro ûcio nîwataambire kûndû kuonthe vûrûrirî ûrîa ûrî irîma wa Judea.

⁶⁶ Andû onthe arîa meegwire ûvoro ûcio nîmawîciragia na makîûria atîrî, “Angwa nîkwa mwana ûyû agaatuîka û?” Nîûndû nî kwonekanaga waro atî vinya wa Mwathani warî vamwe nake.

Ûrathi wa Zakaria

⁶⁷ Nake Zakaria îthe Johana, nîwecûrirwe nî Roho Mûtheru na akîratha atîrî:

⁶⁸ “Mwathani Ngai wa Isiraeli arokumua! Nîûndû nîacerere andû ake, na akamakûûra kuuma ûkomborî.

⁶⁹ Nîatûvete mûvonokia ûrî na vinya, ke nî njiarwa ya Daudi ndungata yake.

⁷⁰ Nîweranîre kuuma tene, na tûnyua twa arathi ake atheru,

⁷¹ atî nîagaatûvonokia kuuma kûrî nthû cietû, na nginya kuuma njararî cia andû onthe arîa matûmenete.

⁷² Ke nîwaugire atî nîakeeguîra methe metû ntha, na aririkane kîrîkanîro gîake kîtheru.

⁷³ Ke nîwevîtîre îthe wetû Iburahimu akîmwîra,

⁷⁴ atî nîagaatûvonokia kuuma njararî cia nthû cietû, na atwîtîkîrie tûmûtungatagîre tûtarî na guoya,

⁷⁵ na tûtûûre tûrî atheru na athingu methorî make, mîthenya yonthe ya ûtûûro wetû.

⁷⁶ “Nawe mwana ûyû wakwa ûgeetagwa mûrathi wa Ngai Ûrîa Ûrî Îgûrû Mûno. Nîûkaathiî mbere ya Mwathani, kûmûthondekera njîra ciake.

⁷⁷ Nîûkaamenyithia andû ake atî nî makaavonokua, na njîra ya kwoverwa mevia mao.

⁷⁸ Ngai wetû arî ntha na nî mûkirîrîria. Nîagaatûma tûthererwe nî ûtheri wa ûvonokio.

⁷⁹ Nîakaatherera arîa mekarîte ndumarî na ûgwatirî wa gîkuû, na atwerekerie njîrarî ya thayû.”

⁸⁰ Nake mwana ûcio nîwakûrire na roho wake ûkîgîa na vinya. Eekarire werûrî nginya mûthenya ûrîa eyonanithirie kûrî andû a Isiraeli.