Kûguû 9 - ÎVUKU RÎA ÛVORO MWARO

¹ Nake mûraika wa gatano nîwavuvire karumbeta gake. Nanie nînoonire njata îrîa yagwîte nthî. Nayo nîyanengerwe cavi cia îrima îrikîru rîtarî na mûthiia.

² Njata îo nîyavingûrire îrima rîu rîtarî mûthiia. Nayo ndogo yekariî ta ndogo ya mwaki wa îcua nîyaumire kûu îrimarî rîu. Nayo ndogo îo yaumaga îrimarî rîu îrikîru rîtarî mûthiia nîyecûrire rîerarî na îkîvingîrîria ûtheri wa riûa.

³ Nacio ngige nîciaumire ndogorî îo ikînyûrûrûka nthî na ikîvewa ûvoti ta wa tûng'aurû.

⁴ Nacio nîcierirwe itigacûkie nyaki, kana mîtî, wana kana mûmera wa wonthe. Cierirwe icûkie tu andû arîa mataarî na mûvûûri wa Ngai ithithiirî ciao.

⁵ Ngige icio nîciaverwe rûtha inyamarie andû acio vandû va mîeri îtano nwatî itikamaûrage. Naguo ûrûrû ûrîa maarî naguo nî ta ûrûrû ûrîa mûndû egucaga arathîtwe nî kang'aurû.

⁶ Vandû va mîeri îo îtano andû nîmagaacaria gîkuû, nwatî matigakîona. Nîmakeerirîria gûkua, nwatî gîkuû nîgîkaûra kuuma kûrî o.

⁷ Ngige icio cionekaga ciîkariî ta mbarathi ciîvarîrîtie kûthiî mbaararî. Ciongorî ciacio ciarî na kîndû gîekariî ta nthûmbî ya thaavu. Namo mothiû ma cio moonekaga mekariî ta mothiû ma andû.

⁸ Nacio njuîrî cia cio ciekariî ta njuîrî cia aka. Namo magego ma cio mekariî ta magego ma mînyambû.

⁹ Ngige icio nîciekîrîtwe indo cia kûgitîra ithûri cia cio ciekariî ta ngo cia cuuma. Nayo mîgambo îrîa yaumaga mathagurî ma cio igûrûkîte yagambaga ta înegene rîa ikaari nyîngî cia mbarathi ivinyûrîte mbaararî.

¹⁰ Nacio ciarî na mîkia yarathanaga ta ya tûng'aurû, na mîkiarî îo yacio nîkuo kwarî na ûvoti wa kûnyamaria andû vandû va mîeri îtano.

¹¹ Ngige icio ciarî na mûthamaki waciathaga, na nîke mûraika wa îrima rîrikîru rîtarî mûthiia. Rîîtwa rîake na rûthiomi rwa Kîhibirania nî Abandoni; na rûthiomi rwa Kîngiriki agetwa Apolioni (ûguo nîkuga “Mûcûkangia.”)

¹² Thîna wa mbere nî mûthiru, nwatî nîkûrî na mathîna meengî maîrî magûka.

¹³ Nake mûraika wa gatandatû nîwavuvire karumbeta gake. Nanie nînegwire mûgambo ûkiuma mîthiiarî îna ya metha ya kûrutîra kîgongoona ya thaavu îrîa yarî vau mbere ya Ngai.

¹⁴ Naguo mûgambo ûcio nîwerire mûraika wa gatandatû atîrî, “Rekereria araika ana arîa movetwe vau rûnjîrî rûnene rwa Efarati.”

¹⁵ Kwoguo araika acio ana nîmaarekererue. Araika acio maaigîtwe mavarîrîtue nîûndû wa îthaa rîîrî, mûthenya ûyû, mweri ûyû, na mwaka ûyû nîguo mavote kûûraga gîcunjî kîmwe Kîam ithatû Kîam andû arîa marî gûkû nthî.

¹⁶ Nanie nînerirwe atî mbûtû ya athigari arîa maathiîte mekarîrîte mbarathi yarî na athigari milioni ngiri magana maîrî.

¹⁷ Nakîo kîonekirî gîakwa nînoonire mbarathi na arîa maathiîte maciîkarîrîte: nao maarî na ngo cia cuuma cia mbaara ithûrirî cia kwîgitîra nacio. Na ngo cia rangi ndune ta mwaki, rangi ya vururu na ya erûû ta ya ûviriti. Ciongo cia mbarathi icio ciekariî ta ciongo cia mînyambû. Natuo tûnyuarî twacio nîkwaumaga mwaki, ndogo na ûviriti.

¹⁸ Gîcunjî kîmwe Kîam ithatû Kîam andû arîa marî gûkû nthî nîmaaûragirwe nî mathîna mathatû marîa maaumaga tûnyuarî twa mbarathi: namo nî mwaki, ndogo na ûviriti.

¹⁹ Vinya wa mbarathi icio warî tûnyuarî twacio na mîkiarî yacio. Mîkia yacio yekariî ta njoka irî na ciongo, na nîciavûthagîra mîkia îo kûnyamaria andû.

²⁰ Nao andû acio engî mataakua na njîra ya mathîna mau mathatû, matiatigana na maûndû marîa o ene meethondekerete. Matiatiga kûgooca ndaimono, kana mîvuanano ya thaavu, ya sîlûva, gîcango, kana mathiga na mîtî. Mîvuanano îo ndîavotaga kwona, kwîgua kana kûthiî na magûrû.

²¹ Andû acio matierira ûûragani wao, ûragûri wao, maûndû mao ma ûtharia kana wîi wao.