Kûguû 7 - ÎVUKU RÎA ÛVORO MWARO

Andû ngiri îgana rîa mîrongo îna na inya a Ngai

¹ Vuva wa ûguo nînoonire araika ana marûngamîte mîthiiarî îna ya nthî. Araika acio maarigîrîrîtie ngûngi cia mîthiia wa yo îna ya nthî itikavurutane nthî nyûmû, îriarî kana mûtîrî wana ûrîkû.

² Nînaacokire ngîona mûraika wîngî akiunûkia aumîte mwena wa îrathîro na arî na rûtumo rwa Ngai mûtûûra mwoyo. Nake nîwetire araika acio ana na mûgambo mûnene. Araika acio ana nîo maavetwe nî Ngai vinya wa gûcûkangia nthî nyûmû na îria.

³ Nake mûraika ûcio nîwamerire atîrî, “Mûtigacûkangie nthî nyûmû, îria, kana mîtî. Etererani nginya rîrîa tue tûgekîra ndungata cia Ngai wetû rûûri ithithiirî ciao.”

⁴ Nanie nînerirwe atî mwîgana wa andû arîa onthe meekîrirwe rûûri maarî ngiri îgana rîa mîrongo îna na inya (144,000). Nao maarî a kuuma mîvîrîgarî îrîa îkûmi na îîrî ya Isiraeli.

^5-8 Nao andû ngiri îkûmi na igîrî kuuma Kûrî wa mûvîrîga nîmeekîrirwe rûûri. Nayo mîvîrîga îo nî: Juda, Reubeni, Gadi, Asheri, Nafutali, Manase, Simioni, Lawi, Isakaru, Zebuluni, Josefu, na Benjamini.

Kîrîndî kînene kîa andû

⁹ Vuva wa ûguo nie nînaroririe na ngîona kîrîndî Kîam andû gûtarî mûndû ûngîavotire kûmatara. Andû acio maaumîte mavûrûrirî monthe, mîvîrîgarî yonthe, irukarî cionthe, na nthiomirî cionthe. Nao onthe maarûngamîte vau mbere ya gîtî Kîam ûthamaki na ya Gatûrûme, mekîrîte nguo cia rangi njerû na manyitîte mathîgî ma mîkîndû njararî ciao.

¹⁰ Andû acio nîmaaugagîrîria na mûgambo mûnene atîrî: “Ûvonokio uumaga kûrî Ngai wetû, ûrîa wîkarîrîte gîtî Kîam ûthamaki, na kûrî Gatûrûme!”

¹¹ Araika onthe maarûngamîte mathiûrûrûkîrîtie gîtî Kîam ûthamaki, athuuri na ciûmbe inya irîa irî mwoyo. Nao araika acio nîmeegwîthirie magîturumithia mothiû mao nthî mbere ya gîtî Kîam Ûthamaki na makîgooca Ngai,

¹² makiugaga atîrî, “Ameni! Ngumo, riiri, ûûgî, ngatho, na gîtîîo, vinya na ûvoti nî cia Ngai wetû tene na tene! Ameni!”

¹³ Nake ûmwe gatagatîrî ka athuuri acio nîwambûririe atîrî, “Andû aya mekîrîte nguo cia rangi njerû nî arîkû na nî a kuuma kû?”

¹⁴ Nanie nînamûcokerie atîrî, “Mwathani, nie ndiîcî, we nîwe wîcî.” Nake nîwambîrire atîrî, “Andû aya nîo marîkîtie kûvîtûkîra mathînarî meengî. Nao nîmathambîtie nguo ciao na nthakame ya Gatûrûme igatuîka cia rangi njerû.

¹⁵ Kîu nîkîo gîtûmaga marûngame vau mbere ya gîtî Kîam Ûthamaki Kîam Ngai na mamûtungatîre ûtukû na mûthenya marî hekarûrî yake. Nake ûcio wîkarîrîte gîtî Kîam ûthamaki akaamagitagîra nîûndû akethagîrwa arî vamwe nao.

¹⁶ Nao matikaavûta kana manyonde. Na matigaacoka kûvîvua nî riûa rîngî kana ûrugarî wa rîo

¹⁷ nîûndû Gatûrûme, karîa karî vau gatagatî ka gîtî Kîam ûthamaki nîgagaatuîka mûrîthi wao. Nake nîakaamatongoria amavire ithimarî cia manjî marîa mavecanaga mwoyo. Nake Ngai nîakagiria methori monthe kuuma methorî mao.”