Kûguû 6 - ÎVUKU RÎA ÛVORO MWARO

Ndumo

¹ Nînaacokire ngîona Gatûrûme gagîtumûra rûtumo rûmwe rwa icio mûgwanja, na ngîgua kîûmbe kîmwe Kîam irîa inya irî mwoyo gîkiuga na mûgambo wagambaga ta ngwa, “Ûka!”

² Nînaroririe na ngîona mbarathi ya rangi njerû. Nake ûrîa wathiîte amîkarîrîte nîwanyitîte ûta, nake nîwaverwe nthûmbî. Nake ûcio wathiîte amîkarîrîte aathiîte ta mûvootani athiîte kûvootana.

³ Nako Gatûrûme nîgaacokire gagîtumûra rûtumo rwa kaîrî, na ngîgua kîûmbe gîa kaîrî Kîam irîa irî mwoyo gîkiuga atîrî, “Ûka!”

⁴ Nayo mbarathi îngî ya rangi ndune nî yaumîrire. Nake ûrîa wathiîte amîkarîrîte nîwaverwe rûtha athengutie thayû gûkû nthî nîguo andû maûragane. Nake nîwaverwe rûviû rûnene

⁵ Rîrîa Gatûrûme gaatumûrire rûtumo rwa kathatû, nînegwire kîûmbe gîa kathatû Kîam irîa irî mwoyo gîkiuga atîrî, “Ûka!” Nînaroririe na ngîona mbarathi ya rangi mbirû. Nake ûrîa wathiîte amîkarîrîte nîwanyitîte ratiri ya mîena îîrî njararî yake.

⁶ Nînaacokire ngîgua kîndû kîeguîkaga gîkariî ta mûgambo waumaga gatagatîrî ga ciûmbe icio inya irîa irî mwoyo. Mûgambo ûcio waugaga atîrî: “Kilo îmwe ya mûtu wa ngano nîyendue dinarii îmwe, na kilo ithatû cia cairi nîciendue dinarii îmwe, nwatî ndûgacûkie maguta na ndivei!”

⁷ Rîrîa Gatûrûme aatumûrire rûtumo rwa kana, nînegwire kîûmbe gîa kana Kîam irîa irî mwoyo gîkiuga atîrî, “Ûka!”

⁸ Nînaroririe na ngîona mbarathi ya rangi îno nthererûku. Nake ûrîa wathiîte amîkarîrîte eetagwa Gîkuû na Vûrûri wa arîa akuû nîwamûrûmîrîrîte. Nao nîmaaveerwe ûvoti wa kwatha kîmwe gîa icunjî inya cia nthî nîguo maûrage andû na njîra ya mbaara, yûra, mîrimû, na nyamû cia kîthaka.

⁹ Rîrîa Gatûrûme gatumûrîre rûtumo rwa gatano, nînoonire mîoyo ya andû arîa maaûragîtwe îrî vau rungu rwa metha ya kûrutîra kîgongoona. Andû acio maaûragîtwe nîûndû wa kûvunjia kiugo Kîam Ngai na kûvecana ûira marî evokeku.

¹⁰ Nayo mîoyo îo nîyaugîrîrie na mûgambo mûnene atîrî; “Mwathani mwene vinya wonthe, Mûtheru na wa ma! Nîwîkara nginya rî ûtarî mûtuîru na ûkaverithia andû a nthî nîûndû wa gûtûûraga?”

¹¹ Wa ûmwe nîwaverwe nguo cia rangi njerû. Nao nîmeerirwe mavurûke kavinda kengî kanini, nginya rîrîa andû arîa maatungataga vamwe nao wa na etîkia acio engî makaaûragwa wata ûrîa o maaûragirwe.

¹² Rîrîa Gatûrûme gatumûrire rûtumo rwa gatandatû, nî kwagîîre na kîthingithia kînene. Riûa nîrîatigire kwara na gûkîgîa nduma. Naguo mweri nîwatunîvire ta nthakame.

¹³ Nacio njata cia îgûrû nîciagwîre nthî wata ûrîa mûkûyû ûgwîthagia ngûû irîa nthatu vîndî îrîa wainainua nî rûkûngi rûnene.

¹⁴ Narîo îgûrû nîrîekûnjire ta îvuku rîa gîkûnjo na rîkîthirîkîra. Nacio irîma cionthe na icîgîrîra nîciathengutirue varîa ciethagîrwa irî.

¹⁵ Nao athamaki a nthî, andû arîa marî îgweta, anene na athigari a mbaara, itonga, andû arîa marî vinya, na andû arîa engî onthe, ngombo na arîa matarî ngombo nîmeethithire ngurungarî na mathigarî ma irîma.

¹⁶ Nao nîmeetire irîma na mathiga makiugaga atîrî, “Tûgwîreni na mûtûthithe nîguo ûrîa wîkarîrîte gîtî Kîam ûthamaki ndagatwone na Gatûrûme ndakavote gûtûverithia!

¹⁷ Nîûndû mûthenya wao Mûnene wa marakara nîmûkinyu. Nû ûngîvota kûmîrîria îverithania rîu?”