Kûguû 5 - ÎVUKU RÎA ÛVORO MWARO

Îvuku rîa Gîkûnjo na Gatûrûme

¹ Nînaacokire ngîona îvuku rîa gîkûnjo rîrî njararî ya ûrîo ya ûrîa wekarîrîte gîtî Kîam ûthamaki. Îvuku rîu rîandîkîtwe mîena yoîrî na rîgatumwa na ndumo mûgwanja.

² Nanie nînoonire mûraika warî na vinya nyîngî na ngîgua akîûria na mûgambo mûnene atîrî, “Nû mwagîrîru wa gûtumûra ndumo na akûnjûre îvuku rîa gîkûnjo?”

³ Nwatî gûtiarî mûndû îgûrû kana nthî wana kana rungu rwa nthî ûngîavotire gûkûnjûra îvuku rîa gîkûnjo na arîthome.

⁴ Nie nînarîrire mûno nîûndû gûtiarî na mûndû warî mwagîrîru wa gûkûnjûra îvuku rîa gîkûnjo kana arîthome.

⁵ Nake ûmwe gatagatîrî ka athuuri acio nîwambîrire atîrî, “Tiga kûrîra. Ta roria! Mûnyambû wa mûvîrîga wa Juda; na wa nyomba ya Daudi, nîavootanîte, na ke nwa avote gûtumûra ndumo icio mûgwanja na akûnjûre îvuku rîu rîa gîkûnjo.”

⁶ Nanie nînaacokire ngîona Gatûrûme arûngamîte vau gatagatî ka gîtî Kîam ûthamaki kathiûrûrûkîrîtue nî ciûmbe icio inya irî mwoyo na athuuri acio mîrongo îîrî na ana. Gatûrûme kau koonekaga takwa kaarî kaûrage. Nako kaarî na mvîa mûgwanja na metho mûgwanja, marîa arî mo maaroho mûgwanja marîa maatungataga Ngai na matûmîtwe nthî yonthe.

⁷ Nako Gatûrûme nîkaathiîre na gagîoca Îvuku rîa gîkûnjo kuuma njararî ya ûrîo ya ûrîa wîkaragîra gîtî Kîam Ûthamaki.

⁸ Na vîndî îrîa Gatûrûme oocire îvuku rîu rîa gîkûnjo, ciûmbe inya irîa irî mwoyo nîciegwîthirie nthî vau mbere ya Gatûrûme. Wa kîûmbe Kîamrî na ngita na mbakûri ya thaavu îcûrîte ûbani, ûrîa aarî guo mavoya ma andû a Ngai. Wana nginya athuuri acio mîrongo îîrî na ana nîmeegwîthirie nthî vau mbere ya Gatûrûme na wa mûthuuri arî na ngita na mbakûri ya thaavu îcûrîte ûbani ûrîa arî guo mavoya ma andû a Ngai.

⁹ Nacio ciûmbe icio na athuuri acio nîmaainire rwîmbo rûcerû makiugaga atîrî: “We ûrî mwagîrîru wa gwoca îvuku rîa gîkûnjo na ûtumûre ndumo ciarîo. Nîûndû we nîwaûragirwe, na njîra ya nthakame yaku we nîwagûrire andû a Ngai kuuma mîvîrîga yonthe, nthiomi cionthe, mavûrûri monthe na iruka cionthe.

¹⁰ We nîûmatuîte rûrîrî rwa athînjîri-Ngai a gûtungatîra Ngai na nîmakaathana gûkû nthî.”

¹¹ Nie nînaacokire ngîroria rîngî na ngîgua mîgambo ya Araika maarî ngiri nyîngî mûno. Araika acio maarûngamîte mathiûrûrûkîrîtie gîtî Kîam Ûthamaki, ciûmbe icio inya irî mwoyo, na athuuri.

¹² Nao nîmaainaga maugîrîrîtie makiugaga atîrî: “Gatûrûme karîa kaaûragirwe nîkagîrîru ga kwamûkîra ûvoti, ûtonga, ûûgî, na vinya na gîtîîo, riiri na ngumo!”

¹³ Nînaacokire ngîgua ciûmbe cionthe irî mwoyo, irîa irî îgûrû, gûkû nthî, rungu rwa nthî, na îriarî na irîa irî kûndû kuonthe ikiuga atîrî: “Ngumo, gîtîîo, riiri na vinya irogîa kûrî ûrîa wîkaragîra gîtî Kîam ûthamaki na kûrî gatûrûme, tene na tene!”

¹⁴ Nacio ciûmbe inya irîa irî mwoyo nîciacokirie atîrî, “Ameni!” Nao athuuri nîmeegwîthirie nthî na makîgooca.