Kûguû 21 - ÎVUKU RÎA ÛVORO MWARO

Îgûrû Rîcerû na Nthî Njerû

¹ Nînacokire ngîona îgûrû rîcerû na nthî njerû. Îgûrû rîa mbere na nthî ya mbere nîciathengutire na îria rîkîthira.

² Nînoonire îtûûra rîrîa rînene rîtheru, na nîrîo Jerusalemu njerû, rîkînyûrûrûka kuuma îgûrû kwî Ngai. Narîo rîagemetue ta ûrîa mûviki egemagia nîguo agatûnge mûthuuriwe.

³ Nînegwire mûgambo mûnene ûkîaria kuuma gîtîrî Kîam ûthamaki ûkiuga atîrî: “Taroria, rîu mûciî wa Ngai ûrî vamwe na andû! Ke nîagaatûûrania nao, nao nîmagaatuîka andû ake. Ngai ke mwene agaatûûranagia nao, arî Ngai wao.

⁴ Ke nîakaamagiria methori monthe kuuma methorî mao. Gûtikethîrwa gîkuû, kîeva, kîrîro, kana ûrûrû rîngî. Maûndû marîa ma tene makethîrwa marî mathiru.”

⁵ Nake ûrîa wîkaragîra gîtî Kîam ûthamaki nîwaugire atîrî, “Taroria, nie nîrathondeka maûndû monthe matuîke macerû!” Wana rîngî nîwambîrire atîrî, “Andîka maûndû mama, nîûndû ciugo ino nî cia kwîvokeka na nî cia ma.”

⁶ Nake nîwaugire atîrî, “Maûndû nîmavinga! Nie nînie wa mbere na wa mûthiia, Kîambîrîria na Kîrîkîro. Mûndû wa wonthe mûnyondu nîngaamwîtîkîria anyue manjî kuuma ithimarî irîa ciumaga manjî marîa mavecanaga mwoyo atakûrîva.

⁷ Mûndû wa wonthe ûkavootana nîakaamûkîra maûndû mama kuuma kûrî nie. Nie nîngaatuîka Ngai wake, nake atuîke mwana wakwa.

⁸ Nwatî andû arîa iguoya, arîa matarî evokeku, arîa matarî atheru, mîtoi, arîa matharagia, arogi, arîa magoocaga mîvuanano, na arîa mavenanagia, nîmagaaikua îcuarî rîa mwaki ûrîa wakanaga na ûviriti, na nîkîo gîkuû gîa kaîrî.”

Jerusalemu Njerû

⁹ Ûmwe wa araika arîa mûgwanja maarî na mbakûri ciecûrîte mathîna marîa mûgwanja ma mûthiia nîwaûkire kûrî nie. Nîwambarîrie akîmbîra atîrî, “Ûka tûthiî, nanie nîngûkwonia mûviki, mûndûmûka wa Gatûrûme.”

¹⁰ Nînecûrirwe nî Roho nake mûraika akînguua na akîmvira îgûrû rîa kîrîma kîraca mûno. Nîwamonirie îtûûra rîrîa rînene îtheru rîa Jerusalemu na rînyûrûrûkîte riumîte îgûrû kwa Ngai,

¹¹ rîgîkengaga nî riiri wa Ngai. Îtûûra rîu rîakengete ta îthiga rîa goro, kana ta gîcicio na rîrî rîtheru ta îra.

¹² Îtûûra rîa Jerusalemu rîarî na rûthingo rûnene, na rûraca kûthiî na îgûrû, na rîarî na mîîrîga îkûmi na îîrî. Na wa mwîrîga nîwekaragua nî mûraika ûmwe. Mîîrîgarî îo yonthe nîkwandîkîtwe marîîtwa ma mbarî îkûmi na igîrî irîa ciarî cia Isiraeli.

¹³ Na wa mwena wa itûûra rîu kwarî na mîîrîga îthatû. Mwena wa rûgûrû mîîrîga îthatû, mwena wa îveti îthatû, mwena wa îrathîro îthatû, na mwena wa îthûîro îthatû.

¹⁴ Rûthingo rwa îtûûra rîu înene rîa Jerusalemu rwatumîtwe îgûrû rîa mathiga îkûmi na maîrî ma mûcingi. Namo marîîtwa ma atûmwa îkûmi na aîrî a Gatûrûme nîmandîkîtwe mathigarî mau, wa rîîtwa îthigarî rîarîo.

¹⁵ Nake mûraika ûrîa wambarîrîtie aarî na kamûtî kaathondeketwe na thaavu ga kûthima. Kamûtî kau kaarî ga kûthima îtûûra, mîîrîga yarîo na rûthingo rwarîo.

¹⁶ Mîena yonthe ya îtûûra rîu înene nî yeganene, ûraaca na wariî warîo. Rîrîa mûraika aarîthimire, rîarî rîa kilomita ngiri igîrî na magana mana (2,400), ûraaca, wariî, wana kûracava kuuma nthî kûthiî na îgûrû.

¹⁷ Mûraika nîwathimire rûthingo wa naruo. Rûthingo rwaracavîte na îgûrû mita mîrongo îtandatû kûringana na kîthimi kîrîa aatûmagîra.

¹⁸ Rûthingo rwathondeketwe na mathiga ma goro ma rangi njerû. Na kîndû kîonthe Kîamrî îtûûrarî rîu Kîamthondeketwe na thaavu na yarî ntheru ta gîcicio.

^19-20 Mathiga marîa maathondekete mûcingi wa rûthingo maagemetue na mathiga ma goro. Îthiga rîa mûcingi rîa mbere rîarî rîa rangi îkûmi na igîrî, rangi njerû, vururu, ngirini, marangi ma mîthemba mîîngî, ndune, mûtukanio wa marangi mîthemba mîîngî îkûvenavenia, ta wa thaaavu, vururu na ngirini, erûû, ngirini îtarî ngwatu waro, rangi ndune na erûû, na wa mûthiia wa njambarawe.

²¹ Nayo mîîrîga îo îkûmi na îîrî nî mathiga ma goro îkûmi na maîrî. Na wa mwîrîga wathondeketwe na îthiga rîmwe rîa goro. Njîra cionthe ciarî cia thaavu ntheru ta gîcicio.

²² Nie ndiona hekarû îtûûrarî rîu înene. Hekarû yarîo nî Mwathani Ngai mwene vinya wonthe na Gatûrûme.

²³ Îtûûra rîu înene rîtiarî na vata wa riûa kana mweri wa kûrîmûrîkîra, nîûndû riiri wa Ngai na wa Gatûrûme nîguo warîmûrîkagîra na taa warî Gatûrûme.

²⁴ Nao andû a mavûrûri monthe makaathiîcaga mamûrîkîrîtwe nî ûtheri ûcio, na athamaki onthe a nthî nîmakaaretaga ûtonga wao îtûûrarî rîu înene.

²⁵ Mîîrîga yarîo ndîkaavingwa wa naarî mûthenya ûmwe, nîûndû gûtikethagîrwa na ûtukû.

²⁶ Mavûrûri monthe nîmakaarete ûtonga wao na moonene mao kûu îtûûrarî.

²⁷ Nwatî gûtirî kîndû kîrî mûgiro gîgaatonya îtûûrarî rîu înene. Mûndû wa wonthe wîkaga maûndû macûku na marî nthoni, kana andû arîa maveenanagia matigaatonya kuo. Arîa magaatonya nî arîa marîîtwa mao mandîkîtwe îvukuurî rîa Gatûrûme rîa mwoyo.