Kûguû 20 - ÎVUKU RÎA ÛVORO MWARO

Mîaka ngiri îmwe

¹ Nînacokire ngîona mûraika akînyûrûrûka kuuma îgûrû. Njararî yake nîwanyitîte mvungûro cia îrima rîrîa rîtarî mûthiia na akanyita nyororo nene.

² Nake nîwanyitire njûnamatu, njoka îrîa ya tene, na nîyo îtagwa Ngoma kana Caitani. Nîwocire nyororo na akîova njûnamatu îo kavinda ka mîaka ngiri îmwe.

³ Nîwacokire akîmikia îrimarî rîu rîtarî mûthiia, akîvinga mûrango warîo na mvungûro na agîkîra mûvûûri. Mûraika eekire ûguo nîguo njûnamatu îkare kuo îvingîrîtwe nginya mîaka ngiri îmwe îthire, nîguo ndakaavîtithie andû a nthî rîngî. Kavinda kau kathira nî akoovorwa gwa kavinda kanini.

⁴ Ngîcoka ngîona itî cia ûthamaki kûu îgûrû. Nao arîa maaciîkarîrîte nîmaaveetwe ûvoti wa gûtucanîra. Wana nînoonire mîoyo ya andû arîa maaûragirwe nîûndû nîmaanîrîre ûvoro wa Ngai na ûma ûrîa waguûrirue nî Jesû. Acio matianagooca nyamû kana mûvuanano wayo, na matianekîrwa rûûri rwa nyamû ûthiû kana njararî ciao. Andû acio nîmaagîre na mwoyo rîngî na makîathana marî athamaki vamwe na Kristû kavinda ka mîaka ngiri îmwe.

⁵ (Arîa engî onthe maakuîte matiacoka mwoyo nginya rîrîa mîaka ngiri îmwe yathirire.) Kûu nîkuo kûriûkua kwa mbere.

⁶ Gûkena na kûrathimwa nî arîa makethîrwa marî vamwe na arîa Ngai akariûkia vîndî ya kûriûka kwa mbere. Acio matigaakua gîkuû gîa kaîrî, nîûndû makethîrwa marî athînjîri-Ngai a Ngai na Mesaya, na matuîke aathani vamwe nake mîaka ngiri îmwe.

Caitani nîwavootirwe

⁷ Mîaka ngiri îmwe yathira, Caitani nîakaarekererua kuuma njeera yake.

⁸ Arekererua nîagaaûka nîguo avîtithie mavûrûri monthe marîa marî nthî, na nîmo Gogu na Magogu. Caitani nî akaamagomania vamwe nîguo marûe mbaara. Nao makethîrwa mengîvîte ta mûthanga ûrîa ûrî rûtererî rwa îria.

⁹ Nao nîmaathiîre nthî yonthe na makîrigicîria îtûûra rînene rîrîa Ngai eendeete, kûrîa andû ake matûûraga. Nwatî mwaki nîwanyûrûrûkire kuuma îgûrû ûkîmacûkangia.

¹⁰ Nake Ngoma ûrîa wamavîtithîtie, nîwaikirue îriarî rîa mwaki na ûviriti, kûrîa nyamû na mûrathi wa maveeni maaikîtue. Nao nîmagatûûra maverithagua ûtukû na mûthenya tene na tene.

Îtuîro rîa Mûthiia

¹¹ Nînacokire ngîona gîtî kînene Kîam ûthamaki Kîam rangi njerû, na ûrîa ûgîkaragîra. Îgûrû na nthî nîciathengutire mbere yake, itianacoka kwoneka rîngî.

¹² Na nînoonire andû arîa maakuîte, anene na anini, marûngamîte mbere ya gîtî Kîam ûthamaki. Namo mavuku nîmaavingûrirwe. Na îvuku rîngî narîo nîrîavingûrirwe na nî îvuku rîa mwoyo. Andû arîa maakuîte nîmaatuîrîrwe kûringana na ûrîa mekîîte, wata ûrîa kwandîkîtwe mavukurî mau.

¹³ Îria nîrîanenganîre arîa maakuîrîrîte kuo. Gîkuû na îcua nacio nîcianenganîre akuû arîa ciarî nao. Na onthe nîmaatuîrîrwe ciira kûringana na ûrîa meekîte.

¹⁴ Nakîo gîkuû na îcua nîciaikirue îriarî rîa mwaki. (Îria rîîrî rîa mwaki nî gîkuû gîa kaîrî.)

¹⁵ Na mûndû wa wonthe ûrîa rîîtwa rîake rîtaarî rîandîke îvukuurî rîa mwoyo nîwaikirue îriarî rîa mwaki.