Kûguû 2 - ÎVUKU RÎA ÛVORO MWARO

Ndûmîrîri kûrî kanitha ûrîa ûrî Efeso

¹ “Andîka kûrî mûraika wa kanitha ûrîa ûrî Efeso atîrî: “Îno nî ndûmîrîri kuuma kûrî ûrîa ûgwete njata irîa mûgwanja njararî yake ya ûrîo, na nîke ûceeraga gatagatî ka indo mûgwanja cia thaavu cia kwigîrîrwa taa.

² Nie nîmbicî ciîko cienyu, nîmenyete ûrîa mûrutîte wîra na vinya na mûkaûmîrîria mûkirîrîtie. Nie nîmbicî atî mue nîmûreganaga na andû arîa acûku. Mue nîmûtuîrîtie arîa maugaga atî o nî atûmwa na tî o, na nîmwonete ûguo maugaga nî kûveenania maveenanagia.

³ Mue nîmûmîrîrîtie mûkirîrîrîtie, na mûkanyamarua nîûndû wakwa, na mûtirî mwandiganîria.

⁴ Nwatî nîrî na ûndû nîramûcukîra: mue nîmwatiganîrie wendani ûrîa mwarî naguo mbere.

⁵ Taririkanani kûrîa mwarî mbere ya mûgwe! Îrireni na mwîke ciîko irîa mwekaga mbere. Na mwarega kwîrira nie nîngûka kûrî mue na ndute kîndû gîa kwigîrîrwa taa varîa kîthagîrwa kîrî.

⁶ Nwatî ûndû ûrîa mwîkaga mwaro nî atî nîmûmenete ciîko cia Anikolai, wata ûrîa wana nie nîimenete.

⁷ “Mûndû wa wonthe ûrî na matû ma kwîgua, nîathikîrîrie ûrîa Roho arera makanitha! “Arîa makaavootana nîngaametîkîria marîe matunda ma mûtî wa mwoyo ûrîa ûrî mûgûndarî wa Ngai.

Ndûmîrîri kûrî kanitha ûrîa ûrî Simurina

⁸ “Andîka kûrî mûraika wa kanitha ûrîa ûrî Simurina atîrî: “Îno nîyo ndûmîrîri kuuma kûrî ûrîa arî ke wa mbere na wa mûthiia, Ûrîa wakwire na akîriûka.

⁹ Nie nîmbîcî mathîna maku na nîmbicî maûndû macûku marîa andû amwe maragia mamwîgiî. O maugaga nî Ayahudi nwatî tî Ayahudi a ma. O nî gîkundi Kîam andû a Caitani!

¹⁰ Mue mûtigetigîre nîûndû wa ûndû wa wonthe ûrîa mûgeerie kûthînua naguo. Tathikîrîriani! Ngoma nî agaatûma amwe enyu maikue njeera nîguo mûgerue. Na îvinda rîa mîthenya îkûmi nîmûkaathînua nîguo mûgerue. Tuîkani evokeku kûrî nie wana ethîrwa nîkwa mûkûûragwa, na nie nîngaamûva mwoyo ûrî ta nthûmbî ya ûvootani.

¹¹ Mûndû wa wonthe ûrî na matû ma kwîgua, nîathikîrîrie ûrîa Roho arera makanitha! “Arîa makaavootana matigekwa ûndû mûcûku nî gîkuû gîa kaîrî.

Ndûmîrîri kûrî kanitha ûrîa ûrî Perigamoni

¹² “Andîka kûrî mûraika wa kanitha ûrîa ûrî Perigamoni atîrî: “Îno nîyo ndûmîrîri kuuma kûrî ûrîa ûrî na rûviû rûûgî mîena yoîrî.

¹³ Nie nîmbîcî we ûtûûraga kûrîa Caitani arî na gîtî gîake Kîam ûthamaki. We ûrî mwîvokeku kûrî nie, na ndwatiganîria wîtîkio waku kûrî nie wa na vîndî îrîa Anitipa aaûragirwe. Anitipa aarî mûira wakwa ûrîa waûragirwe arî îtûûrarî rîu rîenyu kûrîa Caitani atûûraga.

¹⁴ Nwatî nîrî na maûndû manini ngûmûcukîra: atî kûrî andû amwe gatagatîrî kenyu marûmagîrîra maûndû marîa Balaamu aathomithanagia. Balaamu ûcio nîke wathomithirie Balaki ûrîa agûtûma andû a Isiraeli mevie na njîra ya kûrîa irio irîa ciarutîrîtwe mîvuanano na mevia na ciîko cia ûmaraa.

¹⁵ Kwoguo wa namue mûrî na andû amwe gatagatîrî kenyu marûmagîrîra maûndû marîa mathomithanagua nî Anikolai.

¹⁶ Rîu îrireni! Ethîrwa mue tîmwîrira, nie nîngûka kûrî mue narua na ndûe na andû acio na rûviû rûrîa rumaga kanyuarî gwakwa.

¹⁷ “Mûndû wa wonthe ûrî na matû ma kwîgua, nîathikîrîrie ûrîa Roho areera makanitha! “Arîa makaavootana nie nîngaamava mamwe ma maana marîa mathithe. Nie nîngaava wa ûmwe wa ciao îthiga rîa rangi njerû rîandîkîtwe rîîtwa rîcerû. Rîîtwa rîu rîtikethîrwa rîcîkene nî mûndû wîngî tiga ûrîa ûkaarîamûkîra.

Ndûmîrîri kûrî kanitha ûrîa ûrî Thîatira

¹⁸ “Andîka kûrî mûraika wa kanitha ûrîa ûrî Thîatira atîrî: “Îno nîyo ndûmîrîri kuuma kûrî Mûriû wa Ngai, ûrîa ûrî na metho makanîte ta mwaki mûkengu mûno. Nacio nyarîrî ciake ikengaga ta cuuma ya gîcango.

¹⁹ Nie nîmbîcî ciîko cienyu. Nie nîmbîcî wendani wenyu, wîtîkio wenyu, ûtungatîri wenyu, na kûmîrîria kwenyu mûkirîrîrîtie. Nie nîmbîcî atî ciîko cienyu irîa mwîkaga rîu nî nyîngî gûkîra irîa mwekaga mbere.

²⁰ Nwatî nîrî na ûndû nîramûcukîra: Mue nîmwîtîkagîria mûndûmûka ûcio wîtagwa Jezebeli atambie kîthomo Kîam maveeni. Ke etucaga nî mûrathi wa Ngai, nwatî na njîra ya kîthomo kîu gîake, nîavîtithagia ndungata ciakwa igeka ciîko cia ûmaraa na ikarîa irio irîa irutîrîtwe mîvuanano.

²¹ Nie nînîmûvete kavinda ga kwîrira, nwatî ke ndendaga gûtiga ciîko ciake cia ûmaraa.

²² Kwoguo nîngaatûma arware. Nao andû onthe arîa mekaga ciîko cia ûmaraa nake nîngaatûma mathînîke mûno, ethîrwa tîmatiga gwîka ciîko icio njûku nake.

²³ Wana nîngaaûraga arûmîrîri ake. Namo makanitha monthe nîmakaamenya atî nie nînie nduîragia meciria ma andû na ngamenya merirîria mao. Nie nîngaaverithia wa ûmwe wa cienyu kûringana na mevia marîa ekîte.

²⁴ “Nwatî acio engî gatagatîrî kenyu arîa marî kûu Thîatira matiîthîrîtwe makîrûmîrîra kîthomo kîu Kîam maveeni na matimenyete maûndû marîa andû amwe metaga ‘nthitho irîa ndikîru cia Caitani.’ Nie nîramwîra atî ndikûmwigîrîra mûrigo wîngî.

²⁵ Nwatî nwa nginya mwîkarage mûrî evokeku nginya rîrîa ngaaûka.

²⁶ Arîa makûvootana, arîa makûthiî na mbere gwîka wendi wakwa nginya mûthiia nîngaamava wathani wa kwatha ndûrîrî.

²⁷ Nîakaamatha na mûragi wa cuuma na nîagaicûkangia wata ûrîa nyûngû ya yûmba îcûkangagua îgatuîka icunjî.

²⁸ Nîngaamûva njata îrîa îkengaga kîraûko.

²⁹ Mûndû wa wonthe ûrî na matû ma kwîgua nîathikîrîrie ûrîa Roho areera makanitha!