Kûguû 18 - ÎVUKU RÎA ÛVORO MWARO

Kûgwa kwa Babuloni

¹ Vuva wa ûndû ûyû nînoonire mûraika wîngî akînyûrûrûka kuuma îgûrû. Mûraika ûcio aarî na vinya nyîngî. Riiri wake nîwatûmire nthî yonthe îgîe na ûtheri.

² Nake nîwaugîrîrie na mûgambo mûnene atîrî: “Nî rîgwîte, Babuloni îtûûra rîrîa rînene nî rîgwîte! Nî rîtuîkîte gîîkaro Kîam ndaimono na îkurungu rîa roho mûcûku, na iconi cionthe njûku na irî mûgiro itûûraga kuo.

³ Mavûrûri monthe matuîkîte mîrîu ya merirîria macûku ma mwîrî. Athamaki a nthî nîmatharîtie nake. Nao avûri a mbiacara, matuîkîte itonga kuumana na merirîria meengî mûcûku make ma mwîrî.”

⁴ Ngîcoka ngîgua mûgambo wîngî kuuma îgûrû ûkiuga atîrî: “Umani kûrî ke, andû akwa! Nîguo mûtikevie take, na mûtikaaverithue take.

⁵ Nîûndû mevia make maiganîrîrîtwe vamwe magakinya îgûrû, nake Ngai nîaririkanîte waganu wake.

⁶ Mwîke wata ûrîa ke agwîkîte, mûrîve maita maîrî ma ûrîa ke aagwîkire. Îcûria gîkombe gîake ndivei ndûrû maita maîrî ma îrîa ke amûthondekerete.

⁷ Mûve mathîna meengî na kîeva ciîgana ta riiri na ikeno irîa ke eeveere. Ke eeîraga atîrî, ‘Nie nî mûndûmûka mûthamaki! Nie ndirî mûndûmûka wa ndigwa, na ndikethîrwa na kîeva!’

⁸ Nîûndû wa ûguo, mûthenya ûmwe nîakaaverithua na mûrimû, kîeva na yûra, na acoke avîvue na mwaki, nîûndû Mwathani Ngai, ûrîa ûmûtucagîra ciira nî mwene vinya.”

⁹ Athamaki a nthî arîa meekire maûndû ma ûtharia na nîmaagwatanîre merirîria macûku nake nîmakaarîra na maugîrîrie mona ndogo îrîa yaumaga kûrî rîo rîkîvîa.

¹⁰ Nao nîmakaarûngama varaca, nîûndû nîmagetigagîra matikaverithue take. Nao nîmakaauga atîrî, “Uui! Uui! Babuloni îtûûra rîrîa rînene kavinda ka îthaa rîmwe tu nîrîaverithua!”

¹¹ Avûri mbiacara a nthî nîmarîragîra îtûûra rîa Babuloni na makarîguîra kîeva, nîûndû gûtirî mûndû ûgûraga indo ciao.

¹² Indo icio nî thaavu, sîlûva, na mathiga ma goro na ruru; indo cia nguo cia rangi wa njambarawe, nguo cia hariri, na irîa ndune ta ndûngûrû. Andû acio nwa mendagia mîtî îrîa mînungi waro, indo cionthe ithondeketwe na mîguongo na mîtî ya goro, indo cia gîcango, cuuma, na mathiga mengî mathaka.

¹³ Nî mendagia mîthemba yonthe ya maguta na mîtu ya goro yanungaga waro mûno. Nî mendagia indo cia kûrîwa na kûnyua ta ndivei, maguta, mûtu, ngano, ng'ombe, ng'ondu, na mbarathi, ikaari cia gûkuua andû kana mîrigo, na makendia ngombo. Indo icio cionthe itiagûragwa.

¹⁴ Nao avûri a mbiacara nîmakaamwîra atîrî, “Indo irîa cionthe mbaro wendete nîciaûra, naguo ûtonga waku na indo irîa ûregemagia nacio nîciathiî na ndûgaciona rîngî.”

¹⁵ Avûri a mbiacara arîa maatongire kuumana na wîra ûcio wao îtûûrarî rîu rînene, nîmakaarûngama varaca nîûndû wa gwîtigîra kûverithua marî nake. Nîmakaarîra na megue kîeva, makiugaga atîrî,

¹⁶ “Kaî wî na thîna-î! Kaî wî na thîna-î, we Îtûûra rîrîa rînene, rîrîa rîekagîra nguo cia itambaa mbaro, cia rangi wa njambarawe, na cia rangi ndune. Ke eegemagia na mathaga ma thaavu, mathiga ma goro na ma ruru!

¹⁷ Na kavinda ka îthaa rîmwe ûtonga ûcio wonthe watuîka wa mana.” Nao atwarithia a meri, andû arîa maathiîcaga rûgendo na meri, aruti wîra a meri, na andû arîa maarutaga wîra îriarî nîguo moone indo cia gwîtethia nacio nîmaarûngamire varaca.

¹⁸ Na moona ndogo îrîa yaumaga mwakirî ûrîa warîvîvagia, nîmaugîrîrie atîrî, “Gûtirî kwagîa îtûûra rîngî rînene ta rîrî!”

¹⁹ Nao nîmaaminjîrie ciongo ciao rûkûngû, na nîmaarîrire marî na kîeva makiugaga atîrî, “Uui, Uui! Îtûûra rîrîa rînene kûrîa andû onthe arîa marî meri maatongerete! Na kavinda ka îthaa rîmwe nîrîaûrwa nî indo cionthe!”

²⁰ Mue arîa onthe mûtûûraga îgûrû, kenani! Andû a Ngai, atûmwa na arathi Kenani! Nîûndû Ngai nîarîtuîrîrîte nîûndû wa maûndû marîa rîekire kûrî mue.

²¹ Ngîcoka ngîona mûraika warî na ûvoti oca îthiga rîgana ta rîa kîthîi na akîrikia îriarî. Na aikia îthiga rîu nîwaugire atîrî, “Ûguo nîguo Babuloni îtûûra rîrîa rînene rîkoomomorwa na vinya na rîtigacoka kwoneka rîngî.

²² Andû makîvûra ngita, na makina kana makîvuva mîtûrirû na tûrumbeta matikeguwa îtûûrarî rîu rîngî. Gûtirî mûndû ûkoonekana akîruta wîra wa mbiacara, kana kwîguwa mûgambo wa kîthîi gîkîthîa rîngî!

²³ Gûtirî vîndî andû makoona ûtheri wa taa ûkîmatherera kuuma kûrî we rîngî, na gûtirî vîndî mîgambo ya aviki na avikania îkeeguuwa kuuma kûrî we. Nîûndû avûri mbiacara aku nîo maarî itonga nene cia nthî, nwatî nîwaveenererie mavûrûri monthe na ûragûri waku!”

²⁴ Ngai nîwaverithirie Babuloni nîûndû nthakame ya arathi, na andû a Ngai na arîa onthe manaûragwa nthî, yonekire îtûûrarî rîu înene.