Kûguû 17 - ÎVUKU RÎA ÛVORO MWARO

Mûmaraa warî ngumo

¹ Ûmwe wa araika arîa mûgwanja maarî na mbakûri mûgwanja nîwaûkire kûrî nie na akîmbîra atîrî, “Ûka, nanie nîngaakwonia ûrîa Ngai akaaverithia mûmaraa ûcio ûrî ngumo. Mûmaraa ûcio nî îtûûra rîrîa rîtumîtwe vakuvî na nyûnjî nyîngî.

² Athamaki a nthî nîmatharîtie nake. Nao andû a nthî nîmaatuîkire mîrîu ya ûtharia.”

³ Nînecûrirwe nî Roho Mûtheru, nake mûraika nîwanguire akîmvira werûrî. Kûu nînoonire mûndûmûka ekarîrîte nyamû ya rangi ndune. Nyamû îo yarî na marîîtwa mwîrîrî wonthe marîa maarumaga Ngai. Yarî na ciongo mûgwanja na mvîa îkûmi.

⁴ Mûndûmûka ûcio eekîrîte nguo cia rangi wa njambarawe na rangi ndune. Nîwegemetie mwîrî na mathaga ma thaavu, mathiga ma goro, na ciûma cia goro cia mîthemba mîîngî. Njararî yake nîwagwete gîkombe Kîam thaavu gîcûrîte maûndû macûku na mîtugo îtarî mîaro ya ûmaraa.

⁵ Ûthiûrî wake nîvaandîkîtwe rîîtwa, na ûrîa rîîtwa rîu riugîte warî nthithorî. Rîîtwa rîu rîandîkîtwe atîrî: “Babuloni îrîa nene, ng'ina wa maraa monthe na kiumo Kîam maûndû marîa macûku mekagwa nthî.”

⁶ Nanie nînoonire atî mûndûmûka ûcio aarî mûrîu nîûndû wa kûnyua nthakame ya andû arîa atheru a Ngai. Andû acio maaûragirwe nîûndû maarî evokeku kûrî Jesû. Rîrîa namwonire nînamakire mûno.

⁷ Nwatî mûraika nîwambûririe atîrî, “Ûmakîtue nîndûî? Nie nîngaakwîra ûrîa nthitho îo yugîte ya mûndûmûka na ya nyamû îrîa îmûkuuaga, na îrî na ciongo mûgwanja na mvîa îkûmi.

⁸ Nyamû îo vîndî îmwe yarî mwoyo, nwatî rîu ndîrî mwoyo. Nyamû îo nî îkunûkia yume îrimarî rîrîa rîtarî mûthiia îthiî îgacûkangue. Nîkûrî andû marî mwoyo na marîîtwa mao mataanandîkwa kuuma rîrîa nthî yambîrîrie kûmbwa. Andû acio onthe nîmakaamaka rîrîa makoona nyamû îo, nîûndû vîndî îmwe yarî mwoyo, na rîu ndîrî mwoyo, nwatî nîgaacoka yûke rîngî.

⁹ “Ava varenda ûûgî na ûtaûku. Ciongo icio mûgwanja nî irûngamîrîrîte irîma mûgwanja irîa mûndûmûka ûcio ekaragîra. Wana nî athamaki mûgwanja.

¹⁰ Atano ao nîmarîkîtie gûkua, ûmwe nîke ûrathana rîu, na wa mûthiia ndarî araûka. Na rîrîa agaaûka nîagetîkîrua athane kavinda kanini tu.

¹¹ Nayo nyamû îrîa yarî mwoyo nwatî rîu ndîrî mwoyo, nî mûthamaki wa kanana. Ke nî ûmwe wa arîa mûgwanja, nake nîakaathiî kûaragwa.

¹² “Nacio mvîa îkûmi irîa wonire nî athamaki îkûmi arîa matarî marambîrîria kwathana. Na rîrîa makaambîrîria kwathana, magetîkîrua mathane kavinda ka îthaa rîmwe marî vamwe na nyamû îo.

¹³ Athamaki acio îkûmi methagîrwa marî na mworoto ûmwe, na nîmanenganagîra vinya wao na wathani kûrî nyamû îo.

¹⁴ Athamaki acio na nyamû nîmakaarûa na Gatûrûme. Nake Gatûrûme arî vamwe na arîa Ngai etîte, akamathuura na nî arûmîrîri evokeku, nî akaamavoota, nîûndû ke nî Mwathani wa aathani na Mûthamaki wa athamaki.”

¹⁵ Nake mûraika nîwambîrire rîngî atîrî, “Nyûnjî irîa wonire mûmaraa ekarîrîte, nî mavûrûri, andû, iruka, na nthiomi.

¹⁶ Mvîa irîa îkûmi wonire, na nyamû nîikaathûûra mûmaraa ûcio na nîigooca indo ciake cionthe irîa arî nacio na imûtige arî njaga. Nîikaarîa nyama cia mwîrî wake na imûvîvie na mwaki athire.

¹⁷ Ngai nîatûmîte magîe na wendi wa kûvingia mworoto wake marî na ngoro îmwe. Na nîûndû wa ûguo nîmakaanenganîra vinya wao wa kwathana kûrî nyamû nginya rîrîa ciugo cia Ngai ikaavingua.

¹⁸ “Mûndûmûka ûrîa wonire nî îtûûra rîrîa rînene rîrîa rîathaga athamaki a nthî.”