Kûguû 15 - ÎVUKU RÎA ÛVORO MWARO

Mavera ma mûthiia

¹ Nînaacokire ngîona ûrirû wîngî mûnene na wa magegania ûrî îgûrû. Kwarî na araika mûgwanja maarî na ûvoti wa gûtûma nthî îgîe na mavera mûgwanja ma mûthiia. Namo makoonania mûthiia wa marakara ma Ngai.

² Na nînoonire kîndû kîonekaga gîkariî ta îria rîa gîcicio rîtukanîtue na mwaki. Wana nînonire arîa maavootete nyamû, mûvuanano wayo, na makavoota ûrîa namba yarûngamagîrîra rîîtwa rîake. Andû acio maarûngamîte mwenarî wa îria rîu rîa gîcicio manyitîte ngita irîa Ngai aamaveere,

³ nao nîmaainire rwîmbo rûrîa Musa, ndungata ya Ngai aainire, na rûrîa Gatûrûme aainire, akiuga atîrî: “We Mwathani Ngai mwene vinya wonthe, ciîko ciaku nî nene na nî cia magegania! Mûthamaki wa mavûrûri monthe, maûndû monthe marîa wîkaga nî ma kîvooto na nî ma ma!

⁴ Nîûrîkû ûtagagûtîîa na akumie rîîtwa rîaku, Mwathani? We nîwe wenga Mûtheru. Mavûrûri monthe nîmagaaûka na makûgooce, nîûndû ciîko ciaku cia kîvooto nîcionagwa nî andû onthe.”

⁵ Vuva wa ûguo, nînaroririe, na ngîona hekarû ya îgema rîa ûira îrîa îrî îgûrû îvingûrîtwe.

⁶ Nao araika mûgwanja arîa maarî na ûvoti wa gûtûma nthî îgîe na mavera mûgwanja, nîmaaumire kûu hekarûrî. Araika acio meekîrîte nguo ntheru ciakengaga na ciarî na mîcivi ya rangi wa thaavu yovetwe ithûrirî ciao.

⁷ Nakîo kîûmbe kîmwe Kîam irîa inya îrî mwoyo nîkîanengere araika mûgwanja mbakûri mûgwanja cia thaavu ciîcûrîte marakara ma Ngai ûrîa ûtûûraga tene na tene.

⁸ Nayo hekarû nîyecûrirwe nî ndogo kuuma kûrî riiri na vinya wa Ngai. Gûtirî mûndû ûngîavotire gûtonya hekarûrî îo nginya rîrîa mavera mau mûgwanja marîa maaretirwe nî araika acio mûgwanja maathirire.