Kûguû 14 - ÎVUKU RÎA ÛVORO MWARO

Gatûrûme na andû ake

¹ Ngîcoka ngîroria ngîona Gatûrûme arûngamîte kîrîmarî gîa Zayuni îgûrû. Na vau aarî vaarî na andû ngiri îgana na mîrongo îna na inya. Acio nî arîa maarî na rîîtwa rîake na rîa îthe mandîkîtwe mothiûrî mao.

² Nanie nînegwire mûgambo kuuma îgûrû wagambaga ta ndurumo ya manjî, na ta mûrurumo mûnene wa ngwa. Mûgambo ûcio wagambaga ta mûgambo ûrîa aini magambagia makîvûra ngita ciao.

³ Andû acio ngiri îgana na mîrongo îna na inya (144,000) nîmaarûngamîte mbere ya gîtî Kîam ûnene, mbere ya ciûmbe irîa irî mwoyo inya, na mbere ya athuuri. Nao nîmaainaga rwîmbo rûcerû rûrîa tu nwa o mangîarûmenyire. Acio nî arîa maarî akûûre.

⁴ Andû acio nî arîa mataanamenyana kîîmwîrî na aka; o nî athingu. Marûmagîrîra Gatûrûme kûrîa kuonthe akûthiî. Ngai nî amakûûrîte kuuma kûrî andû acio engî, na nîmaatuîkîte maciaro ma mbere kûvecanwa kûrî Ngai na kûrî Gatûrûme.

⁵ Matianaria maûndû ma maveeni, na matirî ûcuke.

Araika athatû

⁶ Nie nînaacokire ngîona mûraika wîngî agûrûkîte îgûrû rîerarî. Mûraika ûcio aarî na ûvoro mwaro wa tene na tene wa kûvunjia kûrî andû arîa matûûraga nthî, kûrî iruka cionthe, mbarî, nthiomi, na mavûrûri monthe.

⁷ Ke nîwaugire augîrîrîtie atîrî, “Tîîani Ngai na mûkumie ûnene wake! Nîûndû kavinda gake ga gûtuîra andû a nthî nîgakinyu. Goocani Ngai ûrîa waûmbire îgûrû, nthî, îria na kûrîa kuumaga manjî!”

⁸ Mûraika wa kaîrî nîwarûmîrîre ûrîa wa mbere. Nake nîwaugîrîrie atîrî, “Babuloni nî îgwîte, îtûûra rîrîa rînene rîa Babuloni nî rîgwîte. Nîyatûmire andû arîa matûûraga gûkû nthî mevia. Maavanire ta maavetwe ndivei manyue îrîa îgaatûma Ngai amaverithia.”

⁹ Nake mûraika wa kathatû nîwarûmîrîre arîa a mbere aîrî akiugagîrîria atîrî, “Mûndû wa wonthe ûgoocaga nyamû na mûvuanano wayo, na agekîrwa rûûri ûthiû kana njara ya ûrîo,

¹⁰ wa nake nîakaanyua ndivei ya mang'ûrîka ma Ngai, îkîrîtwe gîkomberî Kîam marakara make îtarî ndwekie! Andû onthe arîa mageeka ûguo nîmakaaverithua na mwaki na ûviriti marî mbere ya araika arîa atheru na mbere ya Gatûrûme.

¹¹ Nayo ndogo ya mwaki ûrîa ûkaamanyamaria yunûkagia na îgûrû tene na tene. Arîa magoocaga nyamû kana mûviano wayo na marî na rûûri rwa rîîtwa rîayo, magatûûra manyamaragua.”

¹² Ava varenda ûmîrîru wa andû a Ngai arîa mavingagia maathani make na mevokete Jesû.

¹³ Ngîcoka ngîgua mûgambo kuuma îgûrû ûkiuga, “Andîka atîrî: Kûrathimwa nî arîa kuuma rîu magaakucaga marî wîrarî wa Mwathani!” Nake Roho mûtheru arauga atîrî, “Na ma o nîarathime, nîguo manogoke kuuma kûrî mawîra marito, nîûndû ciîko ciao nîimaumaga vuva.”

Maketha ma nthî

¹⁴ Nie nînaacokire ngîroria na ngîona îtu rîcerû. Na vau îtuurî rîu rîcerû nîveekarîte kîndû gîekariî ta mûndû. Kîndû kîu Kîamvuana ta mûndû, Kîamrî na ngovia ya thaavu kîongo, na njararî yakîo nîkîagwete kaviû ga gûketha.

¹⁵ Nake mûraika wîngî nîwaumire hekarûrî na akîanîrîra na mûgambo mûnene kûrî ûrîa wekarîrîte îtu atîrî, “Oca kaviû gaku ga gûketha na wambîrîrie gûketha, nîûndû maketha ma nthî nî makûrû!”

¹⁶ Kwoguo ûrîa wekarîrîte îtu nîwaikirie kaviû ga gûketha nthî. Namo maketha ma nthî nîmaakethirwe.

¹⁷ Nake mûraika wîngî nîwaumire hekarûrî ya îgûrû, wa nake arî na kaviû kaûgî ga gûketha.

¹⁸ Nake mûraika ûrîa warî mûnene îgûrû rîa mwaki, nîwaumire metharî ya kîgongoona. Ke nîwaugîrîrie na akîîra mûraika ûrîa warî na kaviû kaûgî ga gûketha atîrî, “Tema thavibu kuuma mûgûndarî wa mîthavibu ya nthî, nîûndû thavibu nî ndune!”

¹⁹ Kwoguo mûraika nîwaikirie kaviû gake ga gûketha nthî, na nîwatemire thavibu kuuma kûrî mîthavibu. Nîwaikirie thavibu icio kîvivîrorî Kîam thavibu Kîam marakara ma Ngai.

²⁰ Thavibu icio nîciavivîrwe kîvivîrorî Kîamrî nja ya îtûûra. Nayo nthakame nîyaumire kîvivîrorî kîu Kîam thavibu îrî na ûriku wa mita îmwe, na nîyakinyire kûndû kwarî na ûraca wa kilomita magana mathatû.