Kûguû 12 - ÎVUKU RÎA ÛVORO MWARO

Mûndûmûka na Njûnamatu

¹ Naguo ûrirû mûnene na wa magegania nîwaumîrire kûu îgûrû. Nî kwarî na mûndûmûka wekîrîte riûa rîrî ta nguo, na akinyithîtie magûrû make mwerirî. Na aarî na nthûmbî ya njata îkûmi na igîrî kîongorî gîake.

² Mûndûmûka ûcio aarî na îvu, na nîwarîrire nîûndû wa ûrûrû ûrîa eegucaga nîûndû aarî vakuvî gûciara.

³ Naguo ûrirû wîngî na wa magegania nîwaumîrire kûu îgûrû. Nî kwarî na njûnamatu nene ya rangi ndune na yarî na ciongo mûgwanja na wa kîongo Kîamyo Kîamrî na nthûmbî. Wana nîyarî na mvîa îkûmi.

⁴ Njûnamatu îo nîyagucirie gîcunjî kîmwe Kîam ithatû Kîam njata cia îgûrû na mûkiia wayo, na îgîcikia nthî. Nayo nîyarûngamire mbere ya mûndûmûka ûcio warî vakuvî gûciara nîguo îrîe kaana gaciarwa warîo.

⁵ Nake mûndûmûka ûcio nîwaciarire kaana ga kamwanake. Nako nîgakaatha mavûrûri monthe na rûthanju rwa cuuma. Nwatî kaana kau nîgoocirwe wa rîmwe gakîvirwa îgûrû kûrî Ngai na gîtîrî gîake Kîam Ûthamaki.

⁶ Nake mûndûmûka ûcio nîwaûrire na akîthiî werûrî. Kûu nîkuo Ngai aamûthondekerete vandû nîguo ekare akîmenyagîrîrwa vandû va mîthenya ngiri îmwe na magana maîrî ma mîrongo îtandatû (1,260).

⁷ Nakuo îgûrû nîgwacokire gûkîgîa na mbaara. Mikaeli na araika ake nîmaarûire na njûnamatu îrî vamwe na araika a yo.

⁸ Nwatî njûnamatu nîyavootirwe, nayo vamwe na araika a yo matietîkîrua gwîkara îgûrû rîngî.

⁹ Nayo njûnamatu îo nene na araika a yo nîmaaikirue nthî kuuma îgûrû - îo nîyo njoka ya tene, îrîa îtagwa Ngoma, kana Caitani ûrîa ûveenagia andû onthe a nthî.

¹⁰ Nînacokire ngîgua mûgambo mûnene kuuma îgûrû ûkiuga atîrî, “Ûvonokio, ûvoti, Ûthamaki wa Ngai wetû na wathani wa Mesaya wake rîu nîûrîkîtie gûka! Nîûndû mûcukani ûrîa warûngamaga mbere ya Ngai wetû na agacuka ariû na aarî a îthe wetû ûtukû na mûthenya nîaikîtue nthî

¹¹ Ariû na aarî a îthe wetû nî maavootire Ngoma na nthakame ya Gatûrûme na njîra ya ndûmîrîri îrîa maavunjirie. O matietigagîra gûkua, nîmeevarîrîtie kûvecana mîoyo yao.

¹² Kwoguo kenani mue muonthe arîa mûtûûraga îgûrû! Nwatî kaî arîa matûûraga gûkû nthî na îriarî nîmakethîrwa na thîna-î! Nîûndû Ngoma nîanyûrûrûkîte kûrî mue. Ke nî mwîcûre nî marakara, nîûndû nîaicî atî kavinda gake karîa gatigarîte nî kanini.”

¹³ Rîrîa njûnamatu îo yamenyire atî yo nîyaikîtue nthî, nîyambîrîrie kûrûmîrîria mûndûmûka ûrîa waciarîte kaana ga kamwanake.

¹⁴ Nwatî mûndûmûka ûcio nîwaverwe mathagu maîrî ma nderi nene, nîguo avote kûgûrûka athiî vandû varîa aathondekeretwe werûrî. Kûu nîkuo akaamenyererwa kwa îvinda rîa mîaka îthatû na nuthu, na agitîrwe kuumana na njûnamatu.

¹⁵ Nayo njûnamatu nîyaminjire manjî maarî meengî ta ma rûnjî kuuma kanyuarî ka yo yamaminjire nîguo makinyîre mûndûmûka ûcio mamûtware.

¹⁶ Nwatî nthî nîyatethererie mûndûmûka ûcio. Nayo nîyathamirie na îkîmeria manjî mau maaumîte kanyuarî ka njûnamatu îo.

¹⁷ Njûnamatu îo nîyarakarirue mûno nî mûndûmûka ûcio na îkîthiî kûrûa na njiarwa icio ciîngî ciake, nacio nî irîa ciathîkagîra maathani ma Ngai na irî na wîvokeku kûrî ûma ûrîa waguûrirue na njîra ya Jesû.

¹⁸ Nayo njûnamatu îo nîyarûngamire rûtererî rwa îria.