Kûguû 11 - ÎVUKU RÎA ÛVORO MWARO

Aira aîrî

¹ Nie nînacokire ngîvewa mûtî wa kûthima wekariî ta mûragi na ngîrwa atîrî, “Thiî ûthime hekarû ya Ngai na metha ya kûrutîra kîgongoona na ûtare andû arîa magoocagîra kuo.

² Nwatî ndûkathime kîvaro kîrîa kîrî nja ya hekarû. Ndûgakîthime nîûndû nîkîvecanîtwe kûrî andû a ndûrîrî. Andû acio nîmakaathiga Îtûûra rîrîa rîtheru vandû va mîeri mîrongo îna na îîrî.

³ Nie nîngaava aira akwa aîrî ûvoti wa kwanîrîra ndûmîrîri yakwa kwa îvinda rîa mîthenya ngiri îmwe na magana maîrî ma mîrongo îtandatû. Nao makeethîrwa mekîrîte nguo cia macakaya.”

⁴ Aira acio aîrî nî mîtî îîrî ya mîtamaiyû îrîa îciaraga matunda na indo igîrî cia kwigîrîrwa taa irîa irî mbere ya Mwathani wa nthî.

⁵ Mûndû wa wonthe angîgeria kûmacûkangia, mwaki nî uumaga tûnyuarî twao na ûkavîvia nthû icio. Na njîra wata îo mûndû wa wonthe ûngîgeria kûmacûkangia nî akaaûragwa.

⁶ Aira acio marî na ûvoti wa kûgiria mbura yure kavindarî karîa methagîrwa makîanîrîra ndûmîrîri ya Ngai. O marî na ûvoti wa kûgarûra manjî magatuîka nthakame, na wa gûtûma kûgîe na mathîna ma mîthemba mîîngî gûkû nthî maita meengî wa ûrîa mangîenda.

⁷ Na marîkia kûvecana ûira wao, nyamû îrîa yumaga îrimarî îrikîru rîtarî mûthiia nîîkarûa nao îmavoote na îmaûrage.

⁸ Nacio ciimba ciao nîikaamama njîrarî ya îtûûra rîrîa rînene kûrîa Mwathani wao ambîîrwe. Na rîo rîîtwa rîa ngerekano rîa îtûûra rîu nî Sodomu, kana Misiri.

⁹ Nao andû a kuuma mavûrûrirî monthe, mîvîrîgarî yonthe, nthiomirî cionthe na irukarî cionthe nîmakaaroria ciimba cia aira acio vandû va mîthenya îthatû na nuthu, na matigeetîkîra ithikwe.

¹⁰ Andû arîa matûûraga gûkû nthî nîmagaakena na macanjamûke nîûndû wa gûkua kwa aira acio aîrî. Nao nîmakaavecana iveo nîûndû arathi acio aîrî nîmatûmîte andû arîa matûûraga gûkû nthî mathînîke mûno.

¹¹ Nwatî vuva wa mîthenya îo îthatû na nuthu Ngai nîwamavere mîvevû îrîa îtûmaga mûndû agîe na mwoyo. Nao nîmaarûngamire na andû onthe arîa mamoonire nîmaagîre na guoya nyîngî.

¹² Nao arathi acio aîrî nîmaacokire makîgua mûgambo mûnene kuuma îgûrû ûkîmera atîrî: “Unûkiani ava!” Na wa nthû ciao iroretie, nîmaaunûkirie îgûrû marî îtuurî.

¹³ Na kavinda wa kau nîkwagîre na kîthingithia kînene. Na gîcunjî kîmwe gîa îkûmi Kîam îtûûra rîu rînene nîkîagwîre, na andû ngiri mûgwanja makîûragwa. Andû arîa maatigarire nîmaagîre na guoya nyîngî na magîkumia ûnene wa Ngai wa îgûrû.

¹⁴ Thîna wa kaîrî nîwathira, nwatî thîna wa kathatû nîûgûka vuva wa kavinda kanini!

Karumbeta ka mûgwanja

¹⁵ Nake Mûraika wa mûgwanja nîwavuvire karumbeta gake. Nakuo îgûrû nîkwagîre na mîgambo mînene yaugaga atîrî, “Ûthamaki wa nthî nîûtuîkîte wa Mwathani wetû na wa Mesaya wake. Nake nîakaathana tene na tene!”

¹⁶ Nao athuuri mîrongo îîrî na ana arîa mekaragîra itî ciao cia ûthamaki vau mbere ya Ngai, nîmeegwîthirie, magîturumithia mothiû mao nthî na makîgooca Ngai,

¹⁷ makiugaga atîrî: “Tue nîtûracokia ngatho kûrî we, Mwathani Ngai mwene vinya wonthe, Ûrîa Ûrî kuo na warî kuo! Nîûndû we nîwonanîtie vinya waku mûnene na ûkambîrîria kwathana!

¹⁸ Andû a ndûrîrî nîmaang'ûrîkire nîûndû îvinda nîrîkinyu rîa kwonania marakara maku, na îvinda rîa gûtuîra arîa akuû. Îvinda nîrîkinyu rîa kûva ndungata ciaku iveo na nîo arathi, andû arîa atheru, arîa onthe magwîtigagîra anene wa na arîa anini. Îvinda nîrîkinyu rîa kûûraga arîa macûkangagia nthî!”

¹⁹ Nayo hekarû ya Ngai îrîa îrî kûu îgûrû nîyavingûrirwe, na îthandûkû rîa kîrîkanîro rîkîonekana kuo. Nakuo nîgwacokire gûkîgîa na mveni, mîgambo na mîrurumo ya ngwa, kîthingithia na mbura nene ya mbembe.