Kûguû 10 - ÎVUKU RÎA ÛVORO MWARO

Mûraika na kavuku ka gîkûnjo

¹ Nînacokire ngîona mûraika wîngî warî na ûvoti akînyûrûrûka kuuma îgûrû. Ke nîwekîrîte îtu rîrî ta nguo na akathiûrûrûkîrua kîongorî gîake nî mûkûnga mbura. Ûthiû wake wekariî ta riûa, namo magûrû make magekara ta itugî cia mwaki.

² Ke aarî na kavuku ga gîkûnjo njararî yake karî kavingûre. Kûgûrû gwake kwa ûrîo aagûkinyithîtie îriarî, nakuo kwa ûmotho agagûkinyithia nthî nyûmû.

³ Nake mûraika ûcio nîwaugîrîrie na mûgambo mûnene ta wa mûnyambû ûkîrarama. Rîrîa aarîkirie kugîrîria, ngwa mûgwanja nîciagambire.

⁴ Nacio ngwa icio mûgwanja ciarîkia kûgamba, naarî vakuvî kwandîka. Nwatî nînegwire mûgambo ûkîaria kuuma îgûrû na ûkiuga atîrî, “Iga îrî nthitho ûrîa ngwa icio mûgwanja ciauga, na ndûkawandîke!”

⁵ Nake mûraika ûcio nonire arûngamîte îriarî na nthî nyûmû nîwaûkîrîrie njara yake îgûrû,

⁶ na akîîvîta na rîîtwa rîa Ngai ûrîa ûtûûraga tene na tene, na waûmbire îgûrû, nthî, îria na indo cionthe irîa irî kuo. Nake nîwaugire atîrî, “Gûtirî na kavinda kengî ka gweterera!

⁷ Nwatî kavinda karîa mûraika wa mûgwanja akaavuva karumbeta gake Ngai nîakaavingia mûvango wa nthitho yake, wata ûrîa aanîrîre kûrî ndungata ciake na nîcio arathi.”

⁸ Naguo mûgambo wa ûcio neguîte kuuma îgûrû nîwambarîrie rîngî ûkîmbîra atîrî, “Thiî woce îvuku rîu rîkûnjûre rîa gîkûnjo rîrî njararî ya mûraika ûcio ûrûngamîte îriarî na nthî nyûmû.”

⁹ Kwoguo nînathiîre kûrî mûraika ûcio na ngîmûria anengere kavuku kau ka gîkûnjo. Nake mûraika ûcio nîwambîrire atîrî, “Oca kavuku kau ka gîkûnjo na ûkarîe. Nako nîgatuîka karûrû karî îvurî rîaku, nwatî kanyuarî gaku kagîe mûrîo ta wa ûûkî.”

¹⁰ Nanie nînoocire kavuku kau ga gîkûnjo kuuma njararî ya mûraika na ngîkarîa. Nako kaarî na mûrîo ta wa ûûkî kanyuarî gakwa. Nwatî narîkia gûkameria nîgaatuîkire karûrû îvurî rîakwa.

¹¹ Nanie nînacokire ngîrwa atîrî, “We nwa nginya wanîrîre rîngî maûndû marîa Ngai avangîte nîûndû wa iruka nyîngî, mavûrûri meengî, nthiomi nyîngî na athamaki eengî.”