Kîam 9 - ÎVUKU RÎA ÛVORO MWARO

Ngai nîwarîkanîre na Nuhu

¹ Ngai nîwarathimire Nuhu na avîcî ake na akîmeera atîrî, “Ciaranani, mwîngîve, na mwîcûrie nthî yonthe.

² Nyamû cionthe, iconi, nthamaki, nîitûûra imwîtigagîra. Nîmue mûgaciathaga cionthe.

³ Nie nînamûva nyamû cionthe ituîke irio cienyu, wata ûrîa namûveere mîmera îtuîke irio cienyu.

⁴ Kîndû kîrîa tu mûtakaarîcaga nî nyamû îrîa yonthe yûragîtwe îtagwîtûrûra nthakame nîûndû mwoyo wayo ûrî nthakamerî.

⁵ Mûndû wa wonthe ûkaaûraganaga, akaaûragagwa. Nyamû wa yonthe îkaaûragaga mûndû, îkaûragagwa.

⁶ Mûndû wa wonthe ûkaûraga mûndû ûrîa wîngî, wanake akaûragwa nî mûndû nîûndû Ngai aaûmbire mûndû na mûvano wake.

⁷ “Kwoguo ciaranani mwîngîve na mwîcûrie nthî yonthe.”

⁸ Ngai nîwerire Nuhu na avîcî ake atîrî,

⁹ “Rîu nie nîngûrûtha kîrîkanîro wa vamwe na njiarwa cienyu,

¹⁰ wana nginya na ciûmbe cionthe irîa itûûraga mwoyo, irîa irî vamwe namue; ta: iconi, ndîthia cionthe, nyamû cia kîthakarî irîa irî vakuvî namue wana irîa cionthe mwaumire nacio thabinarî.

¹¹ Kîrîkanîro gîakwa namue nî gîkî: atî gûtirî vîndî ciûmbe irîa irî mwoyo ikathirua na mwîcûro wa manjî na ndigaatûma manjî mecûre mathirie nthî rîngî.

¹² Rûûri rwa kîrîkanîro gîa tene na tene, kîrîa nîrarûtha namue, wa vamwe na ciûmbe irîa irî mwoyo nî rûrû;

¹³ nîngwiga mûkûngambura wakwa matuurî na ûkethagîrwa ûrî rûûri rwa kîrîkanîro gîakwa na nthî.

¹⁴ Vîndî îrîa narete matu ma mbura naguo mûkûngambura wonekana matuurî,

¹⁵ vîndî îo ngaririkanaga kîrîkanîro kîrîa naarûthire namue wana nginya ciûmbe cionthe irîa itûûraga mwoyo, atî gûtikethîrwa kûrî na manjî ma kûthiria indo cionthe irîa itûûraga mwoyo rîngî.

¹⁶ Vîndî îrîa mûkûngambura waumîra matuurî, ngawonaga ngaririkana kîrîkanîro gîakwa gîa tene na tene kîrîa naarûthire na ciûmbe cionthe irîa irî mwoyo gûkû nthî.

¹⁷ Rûu nîruo rûûri rwa kîrîkanîro kîrîa narûtha na ciûmbe cionthe irîa irî gûkû nthî.”

Nuhu na avîcî ake

¹⁸ Ariû a Nuhu arîa maaumire thabinarî maarî Shemu, Hamu na Jafethi. (Hamu nîke warî îthe wa Kanaani.)

¹⁹ Ariû acio athatû a Nuhu nîo maatuîkire methe ma andû onthe arîa marî nthî.

²⁰ Nuhu aarî mûrîmi, na nîke warî wa mbere kûvanda mûgûnda wa mîthavibu.

²¹ Nuhu nîwanyuire ndivei ya mîthavibu îo, akîrîwa na akîruta nguo na akîmama îgemarî rîake arî njaga.

²² Na rîrîa Hamu, îthe wa Kanaani oonire atî îthe aarî njaga, nîwetire aa mûrwang'ina arîa maarî vau nja.

²³ Nwatî Shemu na Jafethi nîmoocire Nguo, makîmînyitanîra makîmigîrîra iturorî ciao, makîthiî na vuva magîtonya îgemarî na makîmûkunîkîra. Maamûkunîkîre maroretie na kûrîa maaumîte nîguo matikone njaga yake.

²⁴ Rîrîa Nuhu aaramûkire, na akîmenya ûrîa mûvîcî ûrîa warî mûnini aamwîkîte,

²⁵ nîwaugire atîrî, “Kanaani aronyitwa nî kîrumi! Ke nîatuîka ngombo ya aa mûrwang'ina.

²⁶ Ngai-Mûnene, Ngai wa Shemu arokumua, Kanaani arotuîka ngombo ya Shemu.

²⁷ Ngai arotûma njiarwa cia Jafethi ciîngîve! Njiarwa ciake irotûûranîra na ciana cia Shemu! Kanaani arotuîka ngombo ya Jafethi.”

²⁸ Vuva wa manjî marîa meecûrire nthî, Nuhu eekarire mîaka magana mathatû ma mîrongo îtano (350).

²⁹ Nuhu agîkua arî na ûkûrû wa mîaka magana kenda na mîrongo îtano (950).