Kîam 8 - ÎVUKU RÎA ÛVORO MWARO

Manjî nîmaavûîre

¹ Nake Ngai nîwaririkanire Nuhu, nyamû cia kîthakarî, na ndîthia cionthe irîa aarî nacio thabinarî. Nîwatûmire rûkûngi rûvurutane nginya nyûnjî ikîambîrîria kûvwa.

² Nacio ithima cia manjî marîa maarî rungu rwa nthî na ivingo cia manjî ma îgûrû nîciavingirwe, na mbura îgîtiga kuura.

³ Manjî nîmaathiîre makîvûcaga kavora mûthenya wa mûthenya, na vuva wa mîthenya îgana rîa mîrongo îtano, nîmaanyivîte mûno.

⁴ Na mûthenya wa îkûmi na mûgwanja mweri wa mûgwanja, thabina nîyarûngamire îgûrû rîa irîma cia Ararati.

⁵ Manjî nîmaathiîre na mbere kûvwa nginya mûthenya wa mbere wa mweri wa îkûmi rîrîa tûcûmbîrî twa irîma twambîrîrie kuumîra.

⁶ Vuva wa mîthenya mîrongo îna, Nuhu nîwavingûrire ndirica ya thabina,

⁷ na akîrekereria gîkûngûrû. Gîtiacoka nwatî gîekarire gîkîgûrûkaga kûu îgûrû nginya rîrîa manjî maavwîre viû.

⁸ Nuhu nîwacokire agîtûma îcîa rîkone kana manjî nîmavwîu.

⁹ Nwatî îcîa rîu rîathiî nîrîaturire vandû wanarî vamwe rîngîrûngama nîûndû manjî nîmaakunîkîte nthî. Kwoguo nîrîacokire thabinarî. Nuhu nîwatambûrûkirie njara akînyita îcîa rîu na akîrîcokia thabinarî.

¹⁰ Vuva wa mîthenya mûgwanja, Nuhu nîwatûmire îcîa rîu rîngî kuuma thabinarî.

¹¹ Îcîa rîu nîrîacokire kûrî Nuhu kîvwaî rîkuuîte îthangû rîa mûtamaiyû rîtuîtwe warîo. Rîakuuîte îthangû na mûromo. Kwoguo Nuhu nîwamenyire atî manjî maarî mavwîu nthî.

¹² Nuhu nîweterere mîthenya îngî mûgwanja na agîtûma îcîa rîu rîngî. Narîo îcîa rîu rîtiacoka kûrî ke rîngî.

¹³ Nuhu arî na ûkûrû wa mîaka magana matandatû na ûmwe, mûthenya wa mbere mweri wa mbere, manjî maarî mavwîu. Nuhu nîwakunûrire thabina, na aarorereria nîwonire atî nthî nîyanyaraga.

¹⁴ Na mûthenya wa mîrongo îîrî na mûgwanja mweri wa kaîrî, nthî yarî nyaru viû.

¹⁵ Nake Ngai nîwerire Nuhu atîrî,

¹⁶ “Umani thabinarî, we na mûkaguo, avîcî aku na aka ao.

¹⁷ Ruta thabinarî ciûmbe cionthe cia mîthemba yonthe irîa itûûraga mwoyo na ûtûûraga nacio: iconi, nyamû, na ciûmbe cionthe irîa ikurumaga. Irekererie nîguo igaciarane ciîcûre nthî.”

¹⁸ Nake Nuhu nîwaumire thabinarî marî na avîcî ake vamwe na aka ao.

¹⁹ Nyamû cia kîthaka na ciûmbe irîa ikurumaga cionthe, iconi cionthe na kîndû kîonthe kîthiîcagîrîra nthî, nîciaumire thabinarî wa nyamû kûringana na kîruka Kîamyo.

Nuhu nîwarutire îgongoona

²⁰ Nuhu nîwatumîre Ngai-Mûnene metha ya kîgongoona. Kuuma kûrî nyamû cionthe cia mîthemba yonthe irîa itarî mûgiro, nîwocire nyamû îmwe îmwe wa vamwe na mûthemba wa iconi, na akîiruta irî îgongoona rîa kûvîvua metharî îo ya kîgongoona.

²¹ Ngai-Mûnene nîwegwire mûcingû mwaro ûkiuma îgongoonarî rîu, na akiuga atîrî ngororî yake, “Nie ndikaaruma nthî rîngî nîûndû wa ciîko cia mûndû, nîûndû meciria ma mûndû methagîrwa marî macûku kuuma ûninirî wake. Ndigaacoka kûthiria ciûmbe cionthe irîa itûûraga mwoyo ta ûrîa mbîkîte.

²² Vîndî îrîa yonthe nthî îkethagîrwa îrî vo, gûkethagîrwa na îvinda rîa mavanda na îvinda rîa maketha, îvinda rîa mvevo na îvinda rîa ûrugarî, îvinda rîa riûa na îvinda rîa mbura, îvinda rîa mûthenya na îvinda rîa ûtukû.”