Kîam 7 - ÎVUKU RÎA ÛVORO MWARO

Mwîcûro wa manjî

¹ Ngai-Mûnene nîwerire Nuhu atîrî, “Tonya thabinarî mûrî na andû aku onthe. Nie nîmonete atî we ûrî mûndû mûthingu gûkû nthî yonthe.

² We nîûtonya thabinarî na nyamû irîa itarî mûgiro njamba mûgwanja na nga mûgwanja. Nacio nyamû irîa irî mûgiro ûtonyie njamba îmwe na nga îmwe.

³ Ûcoke ûtonyie iconi mûgwanja cia njamba na iconi mûgwanja cia nga. Nîwîka ûguo nîguo mbeû ya nyamû cionthe na iconi cionthe ndîkathire na igaaciarana rîngî gûkû nthî.

⁴ Mîthenya mûgwanja kuuma rîu nîngurithia mbura gûkû nthî matukû mîrongo îna mûthenya na ûtukû. Ngeeka ûguo nîguo nthirie ciûmbe cionthe irîa naûmbire irî mwoyo.”

⁵ Nake Nuhu nîwekire maûndû monthe marîa aathirwe nî Ngai-Mûnene eke.

⁶ Nuhu aarî na ûkûrû wa mîaka magana matandatû vîndî îrîa manjî meecûrire nthî.

⁷ Ke na mûka, anake ake na aka ao, nîmaatonyire thabinarî nîguo maûrîre mwîcûro wa manjî.

⁸ Nuhu nîwatonyirie thabinarî nyamû cionthe na iconi, irîa ntheru na irîa irî mûgiro na tûnyamû tuonthe tûrîa tûtambaga gûkû nthî,

⁹ igîrî igîrî, ya njamba na ya nga wata ûrîa Ngai aamwathîte.

¹⁰ Na mîthenya mûgwanja yavîtûka, mbura ya kîvovoto nîyaurire.

¹¹ Mûthenya wa îkûmi na mûgwanja mweri wa kaîrî, Nuhu arî na ûkûrû wa mîaka magana matandatû (600) ithima cia manjî monthe marîa marî rungu rwa nthî nîciavingûkire. Wana cio ivingo cionthe cia manjî ma îgûrû, nîciavingûkire.

¹² Nîkwaurire mbura nthî mîthenya mîrongo îna mûthenya na ûtukû.

¹³ Mûthenya wa ûcio Nuhu na mûka, wa vamwe na anake ake Shemu, Hamu na Jafethi na aka ao athatû, nîmaatonyire thabinarî.

¹⁴ Nao nîmaatonyire vamwe na nyamû cia mîthemba yonthe nini na nene, irîa irîthagua mîciî, na cia kîthaka, wana iconi cia mîthemba yonthe.

¹⁵ Nuhu nîwatonyire thabinarî vamwe na nyamû cionthe irîa ciatûûraga mwoyo nga na njamba,

¹⁶ wata ûrîa Ngai aathanîte. Ngai-Mûnene nîwavingire mîrango ya thabina Nuhu atonya.

¹⁷ Manjî nîmecûrire nthî kavinda ka mîthenya mîrongo îna, manjî nîmengîvire na magîûkîrîria thabina îkîerera.

¹⁸ Manjî nwa maathiîre na mbere gwîcûra nayo thabina îkîerera îgûrû rîamo.

¹⁹ Namo nîmecûrire nthî nginya magîkunîkîra irîma cionthe irîa ciarî ndaca;

²⁰ nîmaathiîre na mbere na gwîcûra nginya makîthîrwa marî ta mita mûgwanja îgûrû rîa irîma.

²¹ Ciûmbe cionthe cia nthî irîa ciarî mwoyo nîciakwire. Nacio ciarî; iconi cionthe, nyamû cionthe na andû onthe.

²² Kîndû kîonthe Kîamrî nthî na Kîamvevaga nîgîakuire.

²³ Ngai-Mûnene nîwathiririe ciûmbe cionthe irîa ciarî mwoyo gûkû nthî. Nîwathiririe andû, nyamû na iconi. Nuhu, andû arîa maarî nake thabinarî vamwe na nyamû nîo maavonokire.

²⁴ Manjî meekarire mîthenya îgana rîmwe rîa mîrongo îtano matavûîte.