Kîam 6 - ÎVUKU RÎA ÛVORO MWARO

Waganu wa andû

¹ Rîrîa andû maambîrîrie kwîngîva nthî, na magîciara erîtu,

² ciûmbe cia îgûrû nîcionire erîtu acio a andû marî athaka mûno. Ciûmbe icio nîciethuurîre erîtu amwe matuîke aka ao.

³ Nake Ngai-Mûnene nîwaugire atîrî, “Vinya wakwa wa kûvotithia mûndû gûtûûra tî wîkara ndaarî ya mûndû tene na tene; nîûndû mûndû nî kîûmbe gîa gûkua. Kuuma rîu gûtirî mûndû ûgatûûraga makîria ya mîaka îgana rîa mîrongo îrî (120).”

⁴ Mavindarî mau na marîa maarûmîrîre, nîkwagîre andû anene mûno arîa maarî njiarwa cia aka a gûkû nthî, na ciûmbe cia îgûrû. Acio nîo maarî andû a tene na maarî njamba.

⁵ Ngai-Mûnene nîwonire atî waganu wa andû warî mwîngî mûno gûkû nthî, na atî meciragia maûndû macûku vîndî cionthe.

⁶ Ngai-Mûnene nîweririre nîûndû wa kûmba andû na kûmaiga gûkû nthî. Nîweririre mûno ngororî yake na

⁷ akiuga atîrî, “Nie nîngûthiria andû aya naûmbire viû, vamwe na nyamû wana iconi, nîûndû nînîrirîte nî kîrîa gîatûmire nîmaûmba.”

⁸ Nwatî Ngai-Mûnene aarî mûkenie nî Nuhu.

Nuhu

⁹ Ino nîcio njiarwa cia Nuhu. Nuhu aarî mûndû mûthingu, na nwake wenga tu warî mwaro îvindarî rîu. Nuhu aarî na ngwatanîro na Ngai.

¹⁰ Nuhu aarî na anake athatû: Shemu; Hamu; na Jafethi.

¹¹ Andû acio engî onthe a nthî maarî aganu methorî ma Ngai, na mbaara yecûrîte kûndû kuonthe.

¹² Nake Ngai nîwaroririe na akîona nthî îrî njûku nîûndû andû onthe maatûûraga mevagia.

¹³ Ngai nîwerire Nuhu atîrî, “Nie nînduîte ciira atî nîngûthiria andû onthe. Nînîmathiria onthe nîûndû nthî îcûrîte mbaara nîûndû wao. Nînîmathiria vamwe na nthî yonthe.

¹⁴ Îîtumîre thabina na mbaû irîa mbaro, na ûmîgaanie kûu ndaarî. Ûcoke ûmîthinge na rami nja na ndaarî.

¹⁵ Thabina îo îkethîrwa îrî na ûraca wa mita îgana rîa mîrongo îthatû na ithatû (133), wariî wa mita mîrongo îîrî na igîrî (22) na kîrûngamo mita îkûmi na ithatû (13).

¹⁶ Imba thabina na ûtige ndirica ya cendimita mîrongo îna na inya (44). Mîtume îrî na ngorova ithatû na ûthondeke mûrango mwenarî wayo.

¹⁷ Nie nîngûtûma nthî yonthe îcûre manjî mathirie indo cionthe irîa itûûraga gûkû nthî.

¹⁸ Nwatî nîngûgîa na kîrîkanîro nawe. Thiî ûtonye thabinarî na mûkaguo na avîcî aku wa vamwe na aka ao.

¹⁹ Na ûtonyie thabinarî îo nyamû cia mîthemba yonthe ya nga na ya njamba nîguo itigakue.

²⁰ Na ûtonyie iconi cia mîthemba yonthe, nyamû cia mîthemba yonthe, ciûmbe cia mîthemba yonthe irîa ikurumaga, irî igîrî igîrî nîguo itigakue.

²¹ Na ûtonyie mîthemba yonthe ya irio ûciige îkûmbîrî irî ciaku na cia nyamû na iconi icio.”

²² Nake Nuhu nîwekire maûndû monthe marîa aathîtwe nî Ngai eke.