Kîam 5 - ÎVUKU RÎA ÛVORO MWARO

Njiarwa cia Adamu

¹ Ûyû nîguo mûtaratara wa rûciaro rwa Adamu. (Rîrîa Ngai aaûmbire andû, aamaûmbire mavana take.

² Aamaûmbire mûndûmûrûme na mûndûmûka, agîcoka akîmarathima akîmeta “Andû”.)

³ Rîrîa Adamu aakinyirie ûkûrû wa mîaka îgana rîa mîrongo îthatû (130), nîwaciarire kavîcî gekariî take viû na agîgatuîra rîîtwa Sethi.

⁴ Vuva wa gûciara Sethi, Adamu aatûûrire îvinda rîa mîaka magana manana (800) na akîgîa na ciana ciîngî.

⁵ Adamu aatûûrire îvinda rîa mîaka magana kenda ma mîrongo îthatû (930) agîcoka agîkua.

⁶ Rîrîa Sethi aarî na ûkûrû wa mîaka îgana rîmwe rîa îtano (105), nîwaciarire kavîcî getagwa Enoshi.

⁷ Sethi aatûûrire mîaka magana manana ma mûgwanja (807) arîkia gûciara Enoshi.

⁸ Sethi nîwacokire akîgîa na ciana ciîngî na agîkua arî na ûkûrû wa mîaka magana kenda ma îkûmi na îîrî (912).

⁹ Rîrîa Enoshi aakinyirie ûkûrû wa mîaka mîrongo kenda (90) nîwaciarire kavîcî getagwa Kenani.

¹⁰ Vuva wa kûgîa na Kenani, Enoshi aatûûrire mîaka magana manana ma îkûmi na îtano (815). Enoshi nîwacokire akîgîa na ciana ciîngî,

¹¹ na agîkua arî na ûkûrû wa mîaka magana kenda ma îtano (905).

¹² Rîrîa Kenani aakinyirie ûkûrû wa mîaka mîrongo mûgwanja (70), nîwaciarire kavîcî getagwa Mahalaleli.

¹³ Vuva wa kûgîa na Mahalaleli, Kenani aatûûrire îvinda rîa mîaka magana manana ma mîrongo îna (840).

¹⁴ Nîwacokire akîgîa na ciana ciîngî agîcoka agîkua arî na ûkûrû wa mîaka magana kenda ma îkûmi (910).

¹⁵ Rîrîa Mahalaleli aakinyirie ûkûrû wa mîaka mîrongo îtandatû na îtano (65), nîwaciarire kavîcî getagwa Jaredi,

¹⁶ na agîcoka agîtûûra îvinda rîa mîaka magana manana ma mîrongo îthatû (830).

¹⁷ Nîwacokire akîgîa na ciana ciîngî na agîkua arî wa ûkûrû wa mîaka magana manana ma mîrongo kenda na îtano (895.)

¹⁸ Rîrîa Jaredi aakinyirie ûkûrû wa mîaka îgana rîmwe rîa mîrongo îtandatû na îîrî (162) nîwaciarire Enoku.

¹⁹ Aarîkia gûciara Enoku nîwatûûrire îvinda rîa mîaka magana manana (800).

²⁰ Jaredi nîwacokire agîciara ciana ciîngî na agîkua arî na ûkûrû wa mîaka magana kenda ma mîrongo îtandatû na îîrî (962).

²¹ Rîrîa Enoku aakinyirie ûkûrû wa mîaka mîrongo îtandatû na îtano (65) nîwaciarire Methusela.

²² Vuva wa gûciara Methusela Enoku nîwekarire marî ngwatanîro na Ngai îvinda rîa mîaka magana mathatû (300) na agîcoka agîciara ciana ciîngî.

²³ Enoku aatûûrire îvinda rîa mîaka magana mathatû ma mîrongo îtandatû na îtano (365).

²⁴ Aatûûrire arî na ngwatanîro mbaro na Ngai. Nîwacokire akîûra kuuma methorî ma andû, nîûndû Ngai nîwamwocire.

²⁵ Rîrîa Methusela aakinyirie ûkûrû wa mîaka îgana rîa mîrongo înana na mûgwanja (187), nîwaciarire Lameki.

²⁶ Methusela aciara Lameki nîwatûûrire îvinda rîa mîaka magana mûgwanja ma mîrongo înana na îîrî (782).

²⁷ Nîwacokire akîgîa ciana ciîngî na agîkua arî na ûkûrû wa mîaka magana kenda ma mîrongo îtandatû na kenda (969).

²⁸ Rîrîa Lameki aakinyirie ûkûrû wa mîaka îgana rîmwe rîa mîrongo înana na îîrî (182), nîwaciarire kavîcî,

²⁹ na agîgatuîra rîîtwa Nuhu. Nîwacokire akiuga atîrî, “Kumana na nthî îrîa Ngai-Mûnene aarumire, mwana ûyû nîagaatûvurûkia kuumana na wîra wonthe mûrito.”

³⁰ Vuva wa gûciara Nuhu, Lameki atûûrire îvinda rîa mîaka magana matano ma mîrongo kenda na îtano (595). Lameki nîwaciarire ciana ciîngî,

³¹ na agîkua arî na ûkûrû wa mîaka magana mûgwanja ma mîrongo mûgwanja na mûgwanja (777).

³² Vuva wa Nuhu gûtûûra mîaka magana matano (500), nîwaciarire ciana ithatû; nacio nî Shemu, Hamu na Javethi.