Kîam 48 - ÎVUKU RÎA ÛVORO MWARO

Jakovu nîwarathimire Efiraimu na Manase

¹ Josefu ekaranga, nîwerirwe atî îthe nî mûrwaru. Kwoguo nîwocire avîcî ake aîrî Manase na Efiraimu na akîthiî kwona Jakovu.

² Rîrîa Jakovu eerirwe atî mûvîcî Josefu nîwaûka kûmwona, nîweyûmîrîrie na agîkara nthî ûrîrî.

³ Jakovu nîwerire Josefu atîrî, “Ngai mwene vinya wonthe nîwanyumîrîre nîrî Luzi vûrûrirî wa Kanaani na akîndathima.

⁴ Aambîrire atîrî, ‘Nîngaakûva ciana nyîngî, na njiarwa ciaku nîigaatuîka ndûrîrî nyîngî. Vûrûri ûyû nîngaûva njiarwa ciaku ûtuîke wao tene na tene.’

⁵ “Rîu avîcî aku aîrî Efiraimu na Manase, arîa wagîre nao ûrî vûrûrirî wa Misiri mbere ya mbûka nî akwa. Nîmataragwe marî akwa wata ûrîa Reubeni na Simeoni marî akwa.

⁶ Nwatî ethîrwa nîûkaagîa na ciana ciîngî vuva wa Efiraimu na Manase, matigaatuîka akwa. Makaagîa na îgai rîao na njîra ya Efiraimu na Manase.

⁷ Nîreka ûguo nîûndû vîndî îrîa naacokaga nyumîte Padani (Mesopotamia), Rakeli nîwakuîrîre vûrûrirî wa Kanaani vakuvî na Efiratha, na nîkîo nîrî na kîeva kîngî ûguo. Nînaamûthikire mûkîrarî wa njîra ya kûthiî Efiratha (na nîyo Bethilehemu.)”

⁸ Rîrîa Jakovu oonire avîcî a Josefu nîwaûririe atîrî, “Nî arîkû aya?”

⁹ Nake Josefu nîwerire îthe atîrî, “Aya nî avîcî akwa arîa Ngai amvete nîrî gûkû Misiri.” Jakovu nîwerire Josefu atîrî, “Marete ava nîrî nîguo nîmarathime.”

¹⁰ Metho ma Jakovu nîmaambîrîrîtie kûûra nîûndû wa gûkûra, kwoguo ndoonaga. Josefu nîwavirire tûvîcî tûu varî Jakovu na nîwamamumunyire na akîmarathima.

¹¹ Jakovu nîwerire Josefu atîrî, “Ndieciragia atî nîngaakwona rîngî, nwatî Ngai nîatûmîte mona nginya ciana ciaku.”

¹² Josefu nîwathengutirie ciana icio kuuma ciaûrî cia Jakovu na akînamîrîria agîturumithia ûthiû wake vau mbere yake.

¹³ Josefu nîwanyitire Efiraimu na njara yake ya ûrîo na akîmwiga mwena wa ûmotho wa Jakovu, agîcoka akînyita Manase na njara ya ûmotho na akîmwiga mwena wa ûrîo wa Jakovu na akîmavira vakuvî na Jakovu.

¹⁴ Jakovu nîwakîranirie njara ciake na akigîrîra njara yake ya ûrîo îgûrû rîa kîongo Kîam Efiraimu na agîcoka akigîrîra njara yake ya ûmotho îgûrû rîa kîongo Kîam Manase ûrîa warî îrikithathi.

¹⁵ Nîwacokire akîrathima Josefu na akiuga atîrî, “Ngai ûrîa methe makwa Iburahimu na Isaka maatungatagîra, na nîke Ngai ûrîa ûtwîre andongoretie nginya ûmûnthî arorathima twana tûtû!

¹⁶ Mûraika ûrîa wamvonokirie kuuma mîtinorî yonthe arotûrathima! Rîîtwa rîakwa na marîîtwa ma methe makwa Iburahimu na Isaka marotûûrua na njîra ya twana tûtû! Twana tûtû tûrogîa na ciana nyîngî na njiarwa nyîngî!”

¹⁷ Rîrîa Josefu oonire îthe aigîrîra njara yake ya ûrîo îgûrû rîa kîongo Kîam Efiraimu nîwarakarire. Nake Josefu nîwanyitire njara ya Jakovu akîenda kûmîruta kîongorî Kîam Efiraimu amigîrîre kîongorî Kîam Manase.

¹⁸ Josefu nîwerire îthe atîrî, “Ndûngîeka ûguo Vava, nîûndû kamwana gaka nîko gakûrû. Igîrîra nja yaku ya ûrîo kîongorî gîa ko.”

¹⁹ Nwatî îthe Jakovu nîwaregire na akiuga atîrî, “Mûvîcîwa, nîmbicî ûrîa nîreka. Njiarwa cia Manase wana cio nîigaatuîka rûrîrî rûnene. Nwatî mûrwang'ina ûcio mûnini nîagaatuîka mûnene kûmûkîra na njiarwa ciake nîigaatuîka ndûrîrî nyîngî.”

²⁰ Kwoguo mûthenya ûcio Jakovu nîwamarathimire na akiuga atîrî, “Aisiraeli makarathimanaga na marîîtwa menyu makiugaga atîrî, ‘Ngai arotûma wîkara ta Efiraimu na Manase.’ ” Ûguo nîguo Jakovu aaigire Efiraimu mbere ya Manase.

²¹ Jakovu nîwerire Josefu atîrî, “Tathikîrîria, nîrî vakuvî gûkua, nwatî Ngai akethagîrwa arî vamwe nawe na nîakaamûcokia vûrûrirî wa methe menyu.

²² Wana nîngûkûva gîcunjî gîa Shekemu îthenya rîa kûva aa mûrwanyûkwe. Vûrûri ûyû nî ûrîa naacunire Aamori nîrî na rûviû rwa njûra na ûta.”