Kîam 43 - ÎVUKU RÎA ÛVORO MWARO

Aa mûrwang'ina na Josefu nîmaacokire Misiri marî na Benjamini

¹ Yûra nîrîanenevire mûno vûrûrirî wa Kanaani.

² Rîrîa andû a mûciî wa Jakovu maarîre irio irîa maarutîte Misiri makîthiria, Jakovu nîwerire avîcî ake atîrî, “Cokani kuo rîngî mûgatûgûrîre irio.”

³ Nwatî Juda nîwamwîrire atîrî, “Mûndû ûcio nîwevîtire agîtwîra atî tûtigeetîkîrua kûmwona twarega kûthiî na mûrwaiya.

⁴ Ethîrwa we nîwîtîkîrîte tûthiî na mûrwaiya, nîtûkûthiî gûkûgûrîra irio.

⁵ Nwatî ethîrwa tîwîtîkîra, tîtûthiî nîûndû mûndû ûcio aatwîrire tûtigeetîkîrua kûmwona rîngî tûtarî na Benjamini.”

⁶ Isiraeli nîwaugire atîrî, “Nîndûî gîatûmire mûmbîke naaî ûguo? Mwerire mûndû ûcio mûrî na mûrwanyûkwe wîngî nîkî?”

⁷ Nao nîmaamûcokerie atîrî, “Mûndû ûcio nîwatûririe maûndû matwîgiî na megiî mûciî wetû. Aatûragia atîrî, ‘Aguo arî mwoyo nginya rîu? Mûrî na mûrwanyûkwe wîngî?’ Nwanginya nîngîamûcokerie ciûria ciake. Tûngîamenyire na kî atî nîagûtwîra tûthiî na mûrwaiya?”

⁸ Juda nîwerire îthe Isiraeli atîrî, “Tiga nthiî na kamwana na nîtûkûthiî narua nîguo gûtikagîe mûndû wa cietû ûgaakua nî yûra.

⁹ Nîmbîthîrwa nîrî nako na narega gûgaacoka nako nînie ûkaaûria.

¹⁰ Kethîrwa tûtinekara mûno, tûngîrî athiîu kuo maita maîrî na tûgacoka.”

¹¹ Nake îthe nîwamerire atîrî, “Ethîrwa nwanginya mwîke ûguo, nîmwoca indo imwe cia irîa mbaro cia vûrûri ûyû mwîkîre nguniarî cienyu na mûvirîre mûndû ûcio irî kîveo. Nacio nî mînyamû mînungi waro, maguta ma kwîvaka, ûûkî mûnini, matunda ma mûthemba wa ngandamia, na maguta kuuma kûrî mûtî wa mare.

¹² Kuuani mbeca maita maîrî; mûthiî na mbeca irîa ciacokirue igîkîrwa nguniarî cienyu vîndî îrîa îngî, nîûndû nwa kwîthîrwa nîkwa kwagîîre na mavîtia.

¹³ Ocani wana mûrwanyûkwe mûthiî nake rîngî kûrî mûndû ûcio.

¹⁴ Ngai mwene vinya wonthe arotûma mûndû ûcio amwîguîre ntha na amûnengere Benjamini wa vamwe na mûrwanyûkwe ûcio wîngî. Nwatî ethîrwa ciana ciakwa nwanginya ciûre, nîimbûre.”

¹⁵ Kwoguo anake acio a îthe ûmwe nîmoocire iveo, mbeca maita maîrî, makiumagara mathiîte Misiri marî vamwe na Benjamini na makîthiî kûrî Josefu.

¹⁶ Nake Josefu ona Benjamini marî vamwe nao, nîwerire ndungata îrîa yamenyagîrîra gwake mûciî atîrî, “Oca andû aya ûmavire nyomba gwakwa. Ûcoke ûmathînjîre na ûvarîrie irio nîûndû ngaarîcanîra nao irio thaa thita.”

¹⁷ Nake mûndû ûcio nîwekire wata ûrîa Josefu aaugire. Nîwavirire andû acio kwa Josefu mûciî.

¹⁸ Andû acio nîmaamakire mûno mavirwa kwa Josefu mûciî. Meeciragia atîrî, “Tûravirwa na gûkû nîûndû wa mbeca irîa ciacokirue nguniarî cietû vîndî ya mbere. Arenda gûtuîria mavîtia metû atûtharîkîre na oce mvunda cietû, acoke atûtue ngombo ciake.”

¹⁹ Kwoguo nîmaathiîre mûromorî kûrî ndungata îrîa yamenyagîrîra mûciî wa Josefu makîmîra atîrî,

²⁰ “Mwathi wetû, kûrî vîndî twaûkire gûkû rîa mbere kûgûra irio.

²¹ Na varîa twararîrîre tûkînûka mûciî nîtwatumûrire ngunia cietû, na wa mûndû akîthîra mbeca ciake irî mûromorî wa ngunia yake. Rîu nîtwarete mbeca icio,

²² na twacoka twaûka na mbeca ciîngî cia kûgûra irio. Tûtiîcî nî ûrîkû wacokirie mbeca cietû nguniarî cietû.”

²³ Ndungata îo nîyamerire atîrî, “Tigani gûtangîka kana kwîgua guoya. Ngai wenyu, na nîke Ngai wa îthe wenyu, nwanginya ethîrwe nîke wamwîkîrîre mbeca nguniarî cienyu. Nie nînaamûkîre kîveo kîenyu.” Josefu nîwacokire akîrete Simioni kûrî o.

²⁴ Ndungata îo nîyavirire anake acio a îthe ûmwe mûciî kwa Josefu. Nîyamavere manjî nîguo methambe magûrû, na akîva mvunda ciao irio.

²⁵ Nîmaacokire makîvarîria indo ciao nîguo mave Josefu thaa thita, nîûndû maarî eere atî nîmakûrîcanîra nake.

²⁶ Rîrîa Josefu aakinyire mûciî, nîmaatonyirie iveo irîa maamûvirîrîte nyomba ndaarî, na magîturumithia mothiû mao nthî vau mbere yake.

²⁷ Josefu nîwamaûririe kana nwa aro, na akîmaûria atîrî, “Mûthuuri ûcio mûkûrû, îthe wenyu ûrîa mwambîrire ûvoro wake arî wa vo na nî mwaro?”

²⁸ Nao nîmaamûcokerie atîrî, “Ndungata yaku na nîke vava arî vo na nî mwaro.” Nao nîmaaturirie ndu na magîturumithia mothiû mao nthî mbere yake.

²⁹ Rîrîa Josefu oonire mûrwang'ina Benjamini, nîwaugire atîrî, “Kwoguo ûyû nîke mûrwanyûkwe ûrîa mûnini, ûrîa mwambîrire ûvoro wake? Mûvîcîwa, Ngai arokûrathima.”

³⁰ Josefu nîwacokire akîthenguta vau wa rîmwe nîûndû ngoro yake nîyecûrîtwe nî gîkeno nîûndû wa mûrwang'ina. Nîwegucaga takwa angîrîra, kwoguo nîwatonyire nyomba kûrîa aararaga na akîrîrîra kuo.

³¹ Nîwethambire metho na akiuma nja akîyûmagîrîria na akiuga mavewe irio.

³² Josefu nîwekîrîrwe irio vandû mwanya, na aa mûrwang'ina vandû mwanya. Noa Amisiri arîa maarîcanagîra nake nîmekîrîrwe irio ciao mwanya, nîûndû nî mûgiro andû a Misiri kûrîcanîra irio na Ahibirania.

³³ Aa mûrwang'ina na Josefu nîmeekarire metharî maroranîtie na Josefu, kuuma ûrîa mûkûrû nginya ûrîa mûnini. Rîrîa maroranirie makîona ûrîa mekarîte nthî, nîmaaroranirie mamakîte.

³⁴ Nîmaaveerwe irio kuuma metharî ya Josefu, na Benjamini akîvewa irio maita matano ma irîa ciaverwe acio engî. Kwoguo nîmaarîre, makînyua na magîkenanîra na Josefu.