Kîam 42 - ÎVUKU RÎA ÛVORO MWARO

Aa mûrwang'ina na Josefu nîmaathiîre kûgûra irio Misiri

¹ Rîrîa Jakovu aamenyire atî Misiri kwarî na irio, nîwaûririe avîcî ake atîrî, “Nîndûî kîratûma mwîkare mûroranîtie mûtagwîka ûndû?

² Nîregua atî Misiri kûrî na irio; ûkîrani mûthiî kuo mûkagûre irio nîguo tûtigakue nî yûra.”

³ Kwoguo anake îkûmi arîa maaciaranîrîtue na Josefu nîmaathiîre Misiri kûgûra irio.

⁴ Nwatî Jakovu ndetîkîra gûtûma Benjamini mûrwang'ina na Josefu, nîûndû nîwetigagîra avota kwona ûgwati.

⁵ Avîcî a Jakovu, vamwe na andû arîa engî nîmaathiîre kûgûra irio, nîûndû kwarî na yûra vûrûrirî wa Kanaani.

⁶ Vîndî îo Josefu nîke warî mûnene wa maûndû monthe vûrûrirî wa Misiri na nîke wendagîria andû onthe a vûrûri ûcio irio. Kwoguo aa mûrwang'ina nîmaathiîre mbere yake na magîturumithia mothiû mao nthî.

⁷ Rîrîa Josefu oonire aa mûrwang'ina nîwamamenyire, nwatî nîwamerigithirie na akîmarîria na rûtûrîko na akîmaûria atîrî, “Mumîte kû?” Nao nîmaacokirie atîrî, “Tumîte vûrûrirî wa Kanaani na tûkîte kûgûra irio.”

⁸ Wana ethîrwa Josefu nîwamenyire aa mûrwang'ina, o matiamûmenyaga.

⁹ Nîwaririkanire iroto irîa aarotete imegiî na akîmera atîrî, “Mue mûrî athigani na mûkîte gûtuîria nîguo mwone varîa vûrûri wetû ûtarî na vinya.”

¹⁰ Nao nîmaacokirie atîrî, “Naarî mwathi wetû. Tûkîte kûgûra irio twîkariî ta ngombo ciaku.

¹¹ Tuonthe tûrî a îthe ûmwe na tûrî andû evokeku. Mwathi wetû, tûtirî athigani.”

¹² Nake Josefu nîwamerire atîrî, “Naarî! Mûkîte gûtuîria mwone varîa vûrûri wetû ûtarî na vinya.”

¹³ Nao nîmaamwîrire atîrî, “Mwathi wetû, tue tûrî anake îkûmi na aîrî, tûrî a mûthuuri ûmwe wa vûrûri wa Kanaani. Mûrwaiya ûrîa mûnini matigirwe marî na vava mûciî na ûmwe ndarî vo nîwakwire.”

¹⁴ Josefu nîwamerire wa rîngî atîrî, “Mue mûrî athigani wata ûrîa nîmwîrire.

¹⁵ Ûndû ûcio nîguo mûkaagerua naguo. Nîngwîvîta na rîîtwa rîa mûthamaki wa Misiri atî mûtingiuma gûkû mûrwanyûkwe ûrîa mûnini atarî gûkû.

¹⁶ Tûmani ûmwe wenyu athiî akamûgîre. Nao acio engî matigwe marangîrîtwe nginya rîrîa ûma wa ûvoro ûcio mûraria ûkaamenyekana waro. Ethîrwa tîguo, nînîvîta na rîîtwa rîa mûthamaki wa Misiri atî mue mûrî athigani.”

¹⁷ Josefu nîwacokire akîmavingîrithia onthe njeera îvinda rîa mîthenya îthatû.

¹⁸ Mûthenya wa kathatû Josefu nîwamerire atîrî, “Nie nîrî mûndû wîtigîrîte Ngai, kwoguo nîmûgûtûûra mwoyo mweka ûndû ûyû ûmwe.

¹⁹ Ethîrwa mûrî andû evokeku, ûmwe wenyu nîagûtigwa njeera gûkû mûrî, nao acio engî mathiî mavirîre andû enyu arîa marî na yûra irio.

²⁰ Mûcoke mûndetere mûrwanyûkwe ûrîa mûnini. Ûndû ûcio ûkoonania atî ûvoro ûcio mwarîtie nî wa ma, na tînîmûragithia.” Nao nîmeetîkîre ûvoro ûcio,

²¹ na makîrana atîrî, “Nî ma tûrathînîka nîûndû wa maûndû marîa twekire mûrwaiya. Nîtwonire arî na thîna nyîngî na agîtûthaitha tûmûtethie tûkîrega. Kîu nîkîo gîtûmîte twîthîrwe tûrî na thîna ûyû rîu.”

²² Reubeni nîwamerire atîrî, “Na kinthî ndiamûkaanirie mûtigeke mwanake ûcio naaî na mûkîrega kwîgua? Kîu nîkîo kîratûma tûrîvue nthakame yake.”

²³ Josefu nîwataûkîrwe nî ûrîa maaugaga, nwatî o matiamenyaga kana Josefu nîwataûkagîrwa nîûndû makîmwarîria nîkwa maataûragîrwa nî mûndû.

²⁴ Josefu nîwamatigire na akîambîrîria kûrîra. Na rîrîa eegwire atî nwa avote kwaria rîngî, nîwathiîre agîoca Simeoni kuuma kûrî arîa engî na akîmwovithia acio engî makîonaga.

Aa mûrwang'ina na Josefu nîmaacokire Kanaani

²⁵ Josefu nîwathanire akiuga ngunia cia aa mûrwang'ina ciîcûrue irio, na mbeca cia wa mûndû icokue nguniarî yake na matumwe rîgu. Nao nîmeekirwe guo.

²⁶ Aa mûrwang'ina na Josefu nîmaaîkire mvunda ciao mîrigo yao ya irio na makîambîrîria rûgendo.

²⁷ Marî varîa maararire, ûmwe wao nîwatumûrire ngunia yake nîguo arûmie mvunda yake irio. Rîrîra aaroririe, nîwonire mbeca ciake irî vau mûromorî wa ngunia.

²⁸ Nîwerire aa mûrwang'ina atîrî, “Nînîracokerue mbeca ciakwa. Ino ava mûromorî wa ngunia yakwa!” Nao nîmegwire matuîka nda na makîgua guoya nyîngî na makîûrania atîrî, “Nî atîa Ngai atwîkîte?”

²⁹ Rîrîa maakinyire kûrî îthe wao Jakovu, vûrûrirî wa Kanaani, nîmaamwîrire maûndû monthe marîa meekîkîte kûrî o. Maamwîrire atîrî,

³⁰ “Mûnene wa vûrûri wa Misiri aratwarîrie arî na marakara meengî mûno agîtwîraga atî nîkwa tûrathiîte kûthigana vûrûri wake.

³¹ Natue nîtwamwîrire atî tûtirî athigani, tûrî andû aro na evokeku.

³² Tûrî anake îkûmi na aîrî a îthe ûmwe. Ûmwe wetû nîwakwire, na ûrîa mûnini arî Kanaani marî na vava.

³³ Nake mûtongoria wa vûrûri ûcio wa Misiri nîwatwîrire atîrî, ‘Kîrîa gîgaatûma mbîtîkia atî mûraria ûma nî gîkî; ndigani na mwanake ûmwe wenyu, acio engî makuue irio mavirîre andû enyu arîa marî na yûra.

³⁴ Mwathiî mûndetere mwanake wenyu ûcio mûnini. Vîndî îo nîrîo ngaamenya atî mûtirî athigani nwatî mûrî andû evokeku, nanie nîngaamûcokeria mûrwanyûkwe na nîmûve rûtha rwa kûgûra indo mûkîendagia gûkû vûrûrirî ûyû.’ ”

³⁵ Rîrîa moonoragia irio kuuma nguniarî ciao, wa mûndû nîwonire kîmanja gîake Kîam mbeca nguniarî yake. Rîrîa maacionire nîmaamakire mûno vamwe na îthe Jakovu.

³⁶ Nake Jakovu îthe wao nîwamaûririe atîrî, “Nîkwa mûrenda kûnthirîria ciana ciakwa cionthe? Josefu ndarî vo, Simeoni ndarî vo! Na rîu mûrenda kûthiî na Benjamini. Maûndû mama monthe nîmaratûma nthînîke!”

³⁷ Nake Reubeni nîwacokire akîra îthe atîrî, “Wona narega gûgûcokeria Benjamini, ûkaaûraga anake akwa aîrî. Nengera Benjamini na nînie ngaagûcokeria ke.”

³⁸ Nwatî Jakovu nîwaugire atîrî, “Tîmûthiî na mûvîcîwa, nîûndû mûrwang'ina nîwakwire. Benjamini nîke tu ndigîrîtwe. Avota kwona mûtino rûgendorî rûu mûthiîte na nwa ngue nîûndû wa kîeva na nî mûrona nîrî mûkûrû.”