Kîam 41 - ÎVUKU RÎA ÛVORO MWARO

Josefu nîwataûrire iroto cia Faraû

¹ Vuva wa mîaka îîrî, mûthamaki wa Misiri nîwarotire akîona arûngamîte rûtere rwa rûnjî rwa Nailo.

² Nîwonire ng'ombe mûgwanja ciumîte rûnjîrî rwa Nailo. Nacio ciarî mbaro na noru, na nîciambîrîrie kûrîa mûthanje.

³ Nîgwacokire gûkiumîra ng'ombe ciîngî mûgwanja itaarî mbaro na ng'înju ciumîte rûnjîrî rwa Nailo. Nacio nîciarûngamire varî icio ciîngî rûtererî rwa rûnjî.

⁴ Ng'ombe icio ciarî ng'înju nîciarîre irîa ciarî noru na mbaro. Mûthamaki nîwacokire akîramûka.

⁵ Nîwamamire rîngî na akîrota rîngî. Nîwonire igira mûgwanja cia ngano mbaro na ngûrû irî kamûtîrî kamwe ka ngano.

⁶ Nacio igira ciîngî mûgwanja njeke na nyûmagaru nîûndû wa rûkûngi rwa werûrî nîciamerire.

⁷ Nacio igira icio mûgwanja ng'înju nîciameririe igira irîa ciarî mbaro na ciecûrîtie ngano. Mûthamaki nîwaramûkire na akîmenya atî nîkwa aarotaga.

⁸ Kîraûko, mûthamaki aarî mûtangîku mûno ngororî yake. Kwoguo nîwatûmanîre aringi ciama onthe na andû onthe aûgî a vûrûri wa Misiri. Mûthamaki nîwamerire iroto irîa aarotete, nwatî gûtirî mûndû wavotire gûitaûra.

⁹ Mûnene wa amenyereri ndivei nîwerire mûthamaki atîrî, “Ûmûnthî nînaririkana mavîtia makwa.

¹⁰ Rîrîa warakarire nînie vamwe na mûnene wa arîa makûrugagîra mîgate, nîwatûvirithirie njeera nyomba kwa mûnene wa arangîri.

¹¹ Ûtukû ûmwe wa tuoîrî nîtwarotire, na wa kîroto Kîam mûndû Kîamrî na gîtûmi ngûrani.

¹² Kwarî na mwanake Mûhibirania kûu twarî, na aarî ndungata ya mûnene wa arangîri. Rîrîa twamwîrire iroto cietû nîwatûtaûrîre ûrîa ciaugaga, wa mûndû kûringana na kîroto gîake.

¹³ Na wa ûrîa aatûtaûrîre, nwa guo gwatuîkaga. Nînaacokirue wîrarî wakwa, nake mûrugi wa mîgate agîcurua.”

¹⁴ Mûthamaki nîwacokire agîtûmanîra Josefu, na Josefu nîwarutirwe njeera na îvenya mûno. Josefu arîkia kwenja nderu na gwîkîra nguo ciîngî, nîwathiîre mbere ya mûthamaki.

¹⁵ Nake mûthamaki nîwerire Josefu atîrî, “Nînîrarotire kîroto na gûtirî mûndû ûngîvota gûgîtaûra. Nîmbîguîte ûvoro waku atî ûkerwa kîroto nwa ûgîtaûre.”

¹⁶ Nake Josefu nîwacokerie mûthamaki wa Misiri atîrî, “Nie ndingîvota gûtaûra, nwatî Ngai nîagûkûva ûtaûri mwagîrîru.”

¹⁷ Mûthamaki nîwacokire akîra Josefu atîrî, “Nie nîrarotire ngîona nûngamîte rûtere rwa rûnjî rwa Nailo.

¹⁸ Ng'ombe mûgwanja noru na mbaro nîiraumîrire rûnjîrî rwa Nailo na ciambîrîria kûrîa mûthanje.

¹⁹ Vuva wa ûguo ng'ombe ciîngî mûgwanja ng'înju mûno nginya ikaumîra mavîndî nîiracokire ciaumîra. Ndianona ng'ombe ta icio Misiri kuonthe.

²⁰ Ng'ombe icio ng'înju nî iraarîre irîa irarî noru.

²¹ Nwatî wana ciairîa gûtirî mûndû ûngîamenyire atî ciarî ndîu kîndû, nîûndû ciagînjîte wata mbere. Nînacokire ngîramûka.

²² Ngîcoka ngîrota rîngî ngîona igira mûgwanja cia ngano irî ngûrû na irî mbîcûru. Ngano icio ciarî mûtîrî ûmwe wa ngano.

²³ Nînacokire ngîona igira ciîngî mûgwanja cia ngano ikiuma vuva wa icio. Nacio ciarî njeke na irî njûku nîûndû wa kûvîvua nî rûkûngi rwa werû.

²⁴ Igira icio mûgwanja ciarî njeke nîciameririe icio mûgwanja ciarî mbaro. Nînîrerire aringi ciama ûvoro ûcio, nwatî gûtirî ûravotire kûndaûrîra iroto icio.”

²⁵ Josefu nîwerire mûthamaki atîrî, “Iroto icio cioîrî irauga ûndû ûmwe. Ngai nîakûguûrîrîtie ûrîa agerie gwîka.

²⁶ Ng'ombe mûgwanja icio mbaro nî mîaka mûgwanja, na igira icio mûgwanja cia ngano mbaro, wana yo nî mîaka mûgwanja. Kwoguo iroto icio irauga ûndû ûmwe.

²⁷ Ng'ombe icio mûgwanja ng'înju na njûku irîa iraumîte rûnjîrî irûmîrîrîte icio ciîngî, na igira icio mûgwanja njeke na mvîvie nî rûkûngi rwa werû, nî mîaka mûgwanja ya yûra.

²⁸ Ûguo nwa ta ûrîa ngwîrire atî Ngai nîakûguûrîrîtie ûrîa agerie gwîka.

²⁹ Gûkethîrwa kûrî na mîaka mûgwanja ya maketha meengî vûrûrirî wonthe wa Misiri.

³⁰ Nwatî vuva wa ûguo nîgûkethîrwa na mîaka îngî mûgwanja ya yûra. Narîo yûra rîu nîrîkaaneneva mûno vûrûrirî wonthe wa Misiri na andû mariganîrwe nî maketha marîa methîrîtwe namo.

³¹ Yûra nî rîkethîrwa rîrî îcûku mûno nginya andû mariganîrwe nî mîaka îrîa yarî ya maketha vûrûrirî ûcio.

³² Ûvoro ûcio wa gûcokera kîroto maita maîrî nî wa kwonania atî Ngai nîke ûtuîte gwîkare ûguo na agerie kûvingia ûndû ûcio.

³³ “Kwoguo nwanginya ûthuure mûndû wî na ûûgî na ûmenyo, atuîke mûmenyereri wa vûrûri wa Misiri.

³⁴ Nwanginya ûthuure atongoria engî vûrûrirî wonthe matuîke a kûngania gîcunjî Kîam ithano Kîam maketha ma îvinda rîu rîa mîaka mûgwanja.

³⁵ Kwoguo maathe maûnganie irio icio cionthe mîaka îo ya maketha yûkîte na maciige matûûrarî na mairangîre.

³⁶ Irio icio ikethîrwa irî mûthithû nîguo ikaavûthîrwa vûrûrirî Misiri mîaka îrîa mûgwanja îgaaûka ya yûra. Weka ûguo andû a vûrûri wa Misiri matikaagîa na yûra.”

Josefu nîwatuîkire mûnene wa vûrûri wa Misiri

³⁷ Mûthamaki wa Misiri na ndungata ciake nîmoonire ûndû ûcio ûrî mwaro,

³⁸ na akîra ndungata icio atîrî, “Nwatwone mûndû wîngî mwaro ta ûyû ûrî na Roho wa Ngai ndaarî yake?”

³⁹ Kwoguo mûthamaki nîwerire Josefu atîrî, “Nîûndû Ngai nîakwonetie maûndû mama monthe, gûtirî mûndû wîngî ûngîthîrwa arî na ûmenyo na ûûgî tawe.

⁴⁰ We nîwe ngûtua mûrûngamîrîri wa vûrûri wakwa. Andû onthe akwa magekaga ûrîa wathana. Gûtirî mûndû wîngî ûkethagîrwa arî mûnene gûgûkîra tiga nie.

⁴¹ Nînagûtua mûnene wa vûrûri wa Misiri wonthe.”

⁴² Mûthamaki nîwarutire mbete îrîa yarî Kîamrarî gîake na yarî na mûvûri wake, akîmîkîra Kîamrarî Kîam Josefu. Nîwacokire akîmwîkîra nguo mbaro mûno na akîmwîkîra mûkathî wa thaavu ngingo.

⁴³ Nîwacokire akîmûva ngari ya mbarathi ya kûmûkuua îrîa yarî ya kaîrî. Nîwamûvere andû a kûmûrangagîra nîguo mathiîcage nake makîanagîrîra atîrî, “Thengutani njîrarî! Thengutani njîrarî!” Kwoguo Josefu nîwatuirwe mûrûngamîrîri wa vûrûri wonthe wa Misiri.

⁴⁴ Mûthamaki nîwamwîrire atîrî, “Nie nînie mûthamaki wa Misiri, na gûtirî mûndû wana ûrîkû wagîrîrwe nî gwîka ûndû gûkû Misiri kuonthe atarî na rûtha rwaku.”

⁴⁵ Mûthamaki nîwatuîrîre Josefu rîîtwa akîmwîta Zafenathi-panea. Nîwacokire akîmûva Asenathi, mwarî wa Potifera, mûthînjîri-Ngai wa Oni (Heliopoli) atuîke mûka.

⁴⁶ Josefu aambîrîrie wîra kwa mûthamaki wa Misiri arî na ûkûrû wa mîaka mîrongo îthatû (30). Nîwaumire kûu kwa mûthamaki na akîthiî akîthiûrûrûka vûrûri wonthe wa Misiri.

⁴⁷ Mîakarî îo mûgwanja ya maketha, vûrûri wa Misiri nîwagîre na irio nyîngî.

⁴⁸ Nake Josefu nîwaûnganagia irio icio agaciga matûûrarî marîa manene. Wa îtûûrarî nîwaigaga irio cia kuuma mîgûndarî îrîa îrî vakuvî narîo.

⁴⁹ Josefu nîwaûnganirie irio nyîngî mûno nginya agîtiga kûithima nîûndû itingîathimîkire, ciengîvîte ta mûthanga ûrîa ûrî rûtere rwa îria.

⁵⁰ Mbere ya îvinda rîa yûra rîkinya, Josefu aarî na tûvîcî twîrî tûrîa mûka Asenathi mwarî wa Potifera mûthînjîri-ngai aaciarîte.

⁵¹ Kaana ka mbere gaciarwa, Josefu nîwaugire atîrî, “Ngai nîatûmîte ndiganîrwe nî mathîna makwa na ndiganîrwe nî andû etû.” Kwoguo nîwatuîrîre kana kau rîîtwa Manase.

⁵² Nîwacokire akiuga atîrî, “Ngai nîamvete ciana nîrî vûrûrirî ûyû wa mathîna.” Kwoguo nîwetire kaana ga kaîrî Efiraimu.

⁵³ Mîaka mûgwanja ya maketha vûrûrirî wa Misiri nîyathirire.

⁵⁴ Nayo mîaka mûgwanja ya yûra nîyambîrîrie wata ûrîa Josefu aaugîte. Nîkwagîre na yûra mavûrûrirî monthe, nwatî Misiri kuonthe kwarî na irio.

⁵⁵ Rîrîa andû a Misiri maambîrîrie kûvûta, nîmaakaîre mûthamaki amave irio. Mûthamaki nîwerire andû onthe a Misiri mathiî kûrî Josefu na meke wa ûrîa angîmeera.

⁵⁶ Yûra nîrîanenevire na rîgîtamba vûrûrirî wonthe, kwoguo Josefu nîwavingûrire makûmbî monthe na akîenderia andû a Misiri irio.

⁵⁷ Andû kuuma nthî yonthe nîmaathiîcaga Misiri kûrî Josefu kûgûra irio nîûndû kwarî na yûra înene nthî yonthe.