Kîam 4 - ÎVUKU RÎA ÛVORO MWARO

Kaini na Abili

¹ Adamu nîwamenyanire kîîmwîrî na mûka. Mûka nîwagîre îvu na agîciara Kaini. Nake nîwaugire atîrî, “Nie nîrîmûgîu na mûndûmûrûme nîûndû wa gûtethua nî Ngai-Mûnene.”

² Awa nîwacokire agîciara Abili mûrwang'ina wa Kaini. Abili aarî mûrîthi nake Kaini aarî mûrîmi.

³ Mûthenya ûmwe Kaini nîwavirîre Ngai-Mûnene gîcunjî Kîam maketha kuuma mûgûndarî wake.

⁴ Abili nîwavirîre Ngai îrikithathi rîmwe rîa ndîthia yake. Nîwarîthînjire na agîtegera Ngai-Mûnene nyama irîa noru. Ngai-Mûnene nîwakenirue nî Abili na agîkenua nî matega make,

⁵ nwatî nîwaregire Kaini wa vamwe na matega make. Kwoguo Kaini nîwarakarire mûno na agîtukia ûthiû.

⁶ Ngai-Mûnene nîwaûririe Kaini atîrî, “Ûrakarîte na ûgatukia ûthiû nîkî?

⁷ Ethîrwa nîûrekîte ûndû mwaro, ûngîrî mûkenu; nwatî nîûndû wîkîte ûndû mûcûku, mevia marî mûrangorî makîenda gûkwatha, nwatî nwanginya ûmatorie.”

⁸ Kaini nîwerire mûrwang'ina Abili atîrî, “Tiga tûthiî mûgûndarî.” Na rîrîa maarî mûgûndarî, Kaini nîwarakarîre mûrwang'ina Abili na akîmûraga.

⁹ Ngai-Mûnene nîwaûririe Kaini atîrî, “Mûrwanyûkwe Abili arîkû?” Kaini nîwacokirie atîrî, “Nie ndiîcî. Nîkwa arî nie menyagîrîra mûrwaiya?”

¹⁰ Ngai-Mûnene nîwamûririe atîrî, “Wîkîte ûguo nîkî? Nthakame ya mûrwanyûkwe nîîrandîrîrîra îrî gûkû mûtheturî.

¹¹ We nîwanyitwa nî kîrumi na ndûkaarîma mûtheturî ûrîa wathamirie na wanyua nthakame ya mûrwanyûkwe ûrîa we ûragire.

¹² Wana warîma mûtheturî icio, gûtirî kîndû gîgaakûraga kuo. Ndûkaagîa na wîkaro na nîûtûûra ûrûûraga gûkû nthî.”

¹³ Kaini nîwerire Ngai-Mûnene atîrî, “Îvera rîu nî rînene mûno ndingîrîvota.

¹⁴ Nîwamîngata nyume gûkû nthî wana nyume kûrî we. Nie ndikaagîa na wîkaro. Nîndûûra nthiûrûrûkaga na mbûrûraga gûkû nthî. Mûndû wa wonthe ûkaamona nîakaambûraga.”

¹⁵ Nwatî Ngai-Mûnene nîwerire Kaini atîrî, “Ûguo tîguo. Ûngîkaaûragwa nî mûndû, nîûkaarîvîrîrua maita mûgwanja.” Kwoguo Ngai-Mûnene nîwekîrire Kaini rûûri rwa gûkaania mûndû wa wonthe ûrîa ûgaatûngana nake ndakaamûrage.

¹⁶ Nake Kaini nîwathengutîre Ngai-Mûnene na akîthiî gûtûûra vûrûrirî wetagwa Nodi mwena wa îrathîro wa Edeni.

Njiarwa cia Kaini

¹⁷ Kaini nîmaamenyanire kîîmwîrî na mûka. Mûka nîwagîre îvu na agîciara Enoku. Kaini nîwatumire îtûûra na akîrîtania na mûvîcî Enoku.

¹⁸ Enoku nîwaciarire Iradi, ûrîa warî îthe wa Mehujaeli. Mehujaeli aarî îthe wa Methushaeli, nake Methushaeli aarî îthe wa Lameki.

¹⁹ Lameki aavikirie aka aîrî, ûmwe eetagwa Ada, na ûcio wîngî Zila.

²⁰ Ada nîke waciarire Jabali. Jabali nîke warî îthe wa andû onthe arîa matûûraga marîthagia na matûûraga magemarî.

²¹ Mûrwang'ina eetagwa Jubali na nîke îthe wa andû arîa onthe mainaga na inanda na mîtûrirû.

²² Zila nîke waciarire Tubali Kaini. Tubali Kaini nîke warî mûturi wa indo cionthe cia gîcango na cia cuuma. Mwarwang'ina na Tubali Kaini eetagwa Naama.

²³ Nake Lameki nîwerire aka ake atîrî, “Ada na Zila, tanthikîrîriani, nie nîmbûragire mûndû nîûndû nîaningire.

²⁴ Ethîrwa Kaini akaarîvîrîrua maita mûgwanja kûrî mûndû ûrîa ûkaamûraga, nie ngaarîvîrîrua maita mîrongo mûgwanja na mûgwanja.”

Sethi na Enoshi

²⁵ Adamu nîwamenyanire kîîmwîrî na mûka na akîgîa îvu na agîciara kaana kengî ga kavîcî. Nake Awa nîwaugire atîrî, “Ngai nîmûmveu mwana wîngî wa kavîcî vandûrî va Abili, ûrîa waûragirwe nî Kaini.” Kwoguo nî wagetire Sethi.

²⁶ Sethi nîwagîre na kamwana na agîgeta Enoshi. Vîndî îo nîrîo andû maambîrîrie kûgwetaga rîîtwa Ngai-Mûnene makîgooca.