Kîam 39 - ÎVUKU RÎA ÛVORO MWARO

Josefu na Mûka wa Potifa

¹ Aishumaeli arîa maagûrire Josefu nîmaathiîre nake Misiri, na makîmwendia kûrî Potifa mûnene ûmwe wa arangîri arîa meekaragia mûthamaki wa Misiri.

² Ngai-Mûnene aarî vamwe na Josefu, na nîwatûmire ûtûûro wake wagîre. Josefu eekaraga nyomba kwa mwathi wake Mûmisiri.

³ Mwathi wake nîwonire atî Ngai-Mûnene aarî vamwe na Josefu na nîwatûmaga athatûkwe maûndûrî monthe marîa eekaga.

⁴ Kwoguo Potifa nîwakenirue nî Josefu na akîmûtua ndungata yake ke mwene, na mûrûngamîrîri wa indo ciake cionthe.

⁵ Kuuma Josefu aatuîka ndungata na mûrûngamîrîri wa indo cia Potifa, Ngai-Mûnene nîwarathimire mûciî wa Mûmisiri ûcio vamwe na indo ciake irîa ciarî mûciî na irîa ciarî mûgûndarî.

⁶ Potifa nîwarekerie Josefu indo ciake cionthe nîguo arûmbûyanagie nacio. Potifa nîwatigire kûrûmbûyania na indo ciake cionthe tiga irio irîa aarîcaga cionga. Josefu aarî na mwîrî mwaro na aarî mûthaka mûno.

⁷ Vuvarî, mûka wa mwathi wake nîwambîrîrie kûmwîrirîria na akîmwîra mamame nake.

⁸ Nwatî Josefu nîwaregire na agîcokeria mûka wa mwathi wake atîrî, “Nîwîcî atî mwathi wakwa ndarûmbûyanagia na ûndû wana ûrîkû wa mûciî nîûndû nîrî kuo. Nîanduîte mûmenyereri wa indo ciake cionthe.

⁹ Gûtirî mûndû wîngî mûnene kûngîra mûciî ûyû, na gûtirî kîndû angirîtie tiga we, nîûndû wî mûka. Nie ndingîka ûndû wa waganu mûnene ta ûyû nîûndû nî wîvia kûrî Ngai.”

¹⁰ Wana ethîrwa mûndûmûka ûcio nîwekarire akîraga Josefu ûndû ûcio mûthenya wa mûthenya, Josefu ndetîkîra kûmama nake.

¹¹ Nwatî mûthenya ûmwe, Josefu nîwathiîre nyomba kûruta wîra wake, na gûtiarî ndungata îngî kûu nyomba tiga ke.

¹² Mûka wa Potifa nîwanyitire nguo ya Josefu na akîmwîra atîrî, “Ûka ûmenyane kîîmwîrî nanie.” Nwatî Josefu nîwetigithirie, akiuma nja avinyûrîte, na agîtiga nguo yake njararî ya mûndûmûka ûcio.

¹³ Rîrîa mûndûmûka ûcio oonire atî Josefu nîwaûra na atiga nguo yake,

¹⁴ nîwetire ndungata ciake irîa ciamûtungataga kûu nyomba na agîciîra atîrî, “Taroriani! Tûrareterwe Mûhibirania nî mûthuuri wakwa na nîaratûconorithia. Atonyire gwakwa nyomba ageria kûnyita na vinya nîguo amenyane nanie kîîmwîrî, nwatî nauga mbu na vinya mûno.

¹⁵ Rîrîa egua nauga mbu auma nja avinyûrîte na andiga na nguo yake.”

¹⁶ Mûndûmûka ûcio nîwaigire nguo îo nginya rîrîa mwathi wa Josefu aaûkire mûciî,

¹⁷ na akîmwîra ûvoro wa ûrîa eerîte ndungata ciake atîrî, “Ndungata îrîa Mûhibirania watûretere yûkire nyomba na yanjonorithia.

¹⁸ Nwatî rîrîa mbugire mbu, nîyumire nja îvinyûrîte yandiga na nguo yayo.”

¹⁹ Rîrîa mwathi wa Josefu eegwire ûvoro ûrîa mûka aamwîrire, nîwarakarire mûno,

²⁰ na akîathana Josefu anyitwe na aikue njera kûrîa andû arîa ove a mûnene maaigagwa, na agîkara kuo.

²¹ Nwatî Ngai-Mûnene aarî vamwe na Josefu na nîwamwonagia wendo ûtathiraga na agîtûma endwe nî mûrûngamîrîri wa njera.

²² Mûrûngamîrîri ûcio wa njera nîwatuire Josefu mûmenyereri wa andû onthe arîa moovetwe njera, na mûrûngamîrîri wa maûndû monthe marîa meekagwa kûu njera.

²³ Mûrûngamîrîri wa njera ndaatindanagîra na ûndû wana ûrîkû wa marîa meethagîrwa makîmenyererwa nî Josefu, nîûndû Ngai-Mûnene aarî vamwe na Josefu. Ûndû wa wonthe ûrîa Josefu eekaga Ngai-Mûnene nîwatûmaga ûmûthatûke.