Kîam 36 - ÎVUKU RÎA ÛVORO MWARO

Njiarwa cia Esaû

¹ Ino nîcio njiarwa cia Esaû na nîke wîtagwa na rîîtwa rîngî Edomu.

² Esaû nîwavikirie aka Akanaani. Nao nî: Ada mwarî wa Eloni ûrîa Mûhiti, Oholibama mwarî wa Ana. Ana aarî mûvîcî wa Zibeoni ûrîa Mûhivi,

³ Basemathi mwarî wa Ishumaeli na mwarwang'ina wa Nebaiothi.

⁴ Ada nîwaciarire Elifazi, Basemathi agîciara Reueli;

⁵ nake Oholibama nîwaciarire Jeushi, Jalamu na Kora. Avîcî aya onthe a Esaû maaciarîrwe Kanaani.

⁶ Esaû nîwacokire agîoca aka ake, ciana ciake, andû onthe a gwake mûciî, ndîthia yake yonthe, na indo cionthe ciake irîa aagîte arî Kanaani, na akîthiî vûrûrirî wîngî kûraca na mûrwang'ina Jakovu.

⁷ Aaumire kûu nîûndû vûrûri ûrîa ke na Jakovu maatûûraga ndwameganaga. Maarî na ndîthia nyîngî na matingîavotire gwîkarania vamwe.

⁸ Kwoguo Esaû (na nwake Edomu) nîwathiîre gûtûûra vûrûri ûrîa ûrî irîma wa Seiru.

⁹ Ino nîcio njiarwa cia Esaû, îthe wa Aedomu.

¹⁰ Elifazi mûvîcî wa Esaû na ng'ina eetagwa Ada; Reueli na ng'ina eetagwa Basemathi.

¹¹ Avîcî Elifazi maarî: Temani, Omari, Zefo, Gatamu, na Kenazi.

¹² Timuna ûrîa warî mûka wa kwigwa wa Elifazi nîwaciarire Amaleki. Icio nîcio ciarî njiarwa cia Ada mûka wa Esaû.

¹³ Mûka wa Esaû ûrîa wetagwa Basemathi aaciarire mwanake ûmwe tu wîtagwa Reueli. Nake Reueli nîwaciarire Zera, Shama na Mizia. Icio nîcio njiarwa cia Basemathi mûka wa Esaû.

¹⁴ Mûka wa Esaû ûrîa wetagwa Oholibama, mwarî wa Ana, na mûcûkûrûwe wa Zibeoni nîwaciarîre Esaû anake athatû, nao nî: Jeushi, Jalamu na Kora.

¹⁵ Îno nîo mîvîrîga îrîa yaumire kûrî avîcî a Esaû. Elifazi, îrikithathi rîa Esaû nîke warî îthe wa tene wa mîvîrîga ya Temani, Omari, Zefo, Kenazi,

¹⁶ Kora, Gatamu na Amaleki. Andû aya maarî njiarwa cia mûka wa Esaû ûrîa wetagwa Ada.

¹⁷ Mîvîrîga îrîa yaumanire na Reueli yarî: Nahathi, Zera, Shama na Miza. Aya nao maarî njiarwa cia mûka wa Esaû ûrîa wetagwa Basemathi.

¹⁸ Mîvîrîga ya Esaû îrîa yaumanire na mûka ûrîa wetagwa Oholibama, mwarî wa Ana yarî: Jeushi, Jalamu na Kora.

¹⁹ Mîvîrîga îo yonthe yaumîte kûrî Esaû.

Njiarwa cia Edomu

²⁰ Andû arîa maatûûraga vûrûrirî wa Edomu tene maarî avîcî a Seiru ûrîa warî Mûhori. Nao maarî: Lotani, Shobali, Zibeoni, Ana,

²¹ Dishoni, Ezeri na Dishani.

²² Avîcî a Lotani maarî Hori na Hemani. (Nake mûrwang'ina na Lotani etagwa Timuna.)

²³ Shobali aarî îthe wa tene wa: Aluvani, Manahathi, Ebali, Shefa na Onamu.

²⁴ Zibeoni aarî na avîcî aîrî, nao nî: Aia na Ana. (Ûyû nî Ana ûrîa wonire kûndû kûrîa kûtherûkaga manjî mama maviû werûrî akîrîthia mvunda cia îthe Zibeoni.)

²⁵ Ciana cia Ana ciarî: Dishoni na mwîrîtu wetagwa Oholibama.

²⁶ Nao avîcî a Dishoni maarî: Hemudani, Eshibani, Ithirani na Cherani.

²⁷ Avîcî a Ezeri maarî: Bilihani, Zaavani na Akani.

²⁸ Nao avîcî a Dishoni maarî: Uzi na Arani.

²⁹ Aya nîo maarî avîcî a Hori: Lotani, Shobali, Zibeoni, Ana,

³⁰ Dishoni, Ezeri na Dishani. Wa mûndû aarî mûnene wa mûvîrîga wake vûrûrirî wa Seiru.

Athamaki a Edomu

³¹ Aya nîo maarî athamaki arîa maathanaga vûrûrirî wa Edomu mbere ya kûgîa na athamaki vûrûrirî wa Isiraeli:

³² Bela mûvîcî wa Beori aathanaga vûrûrirî wa Edomu na mûciî wake mûnene warî Dinihaba.

³³ Bela akua, Jobabu mûvîcî wa Zera kuuma Bozira nîwathanire vandûrî vake.

³⁴ Jobabu akua, Hushamu wa kuuma vûrûri wa Atemani nîwathanire vandûrî vake.

³⁵ Hushamu akua, Hadadi mûvîcî wa Bedadi kuuma Avithi nîwathanire vandûrî vake. Mûciî wake mûnene warî Avithi. Nîwavootire Amidiani mbaararî îrîa maarûagîra vûrûrirî wa Moabu.

³⁶ Hadadi akua, Samula wa kuuma Masireka nîwathanire vandûrî vake.

³⁷ Samula akua, Shauli kuuma Rehobothi îrîa îrî vakuvî na rûnjîrî rwa Farati nîwathanire vandûrî vake.

³⁸ Shauli akua, Baali Hanani mûvîcî wa Akibori nîwathanire vandûrî vake.

³⁹ Baali Hanani akua, Hadadi nîwathanire vandûrî vake. Mûciî wake mûnene warî Pau. Mûka wa Baali Hanani eetagwa Mehetabeli mwarî wa Matiredi mûcûkûrûwe wa Mezahabu.

⁴⁰ Esaû nîke warî îthe wa tene wa mîvîrîga ya andû a Edomu. Wa kûrîa mûvîrîga watûûraga, gwetanagua na rîîtwa rîaguo. Nayo yarî: Timuna, Aliva, Jafethi,

⁴¹ Oholibama, Ela, Pinoni,

⁴² Kenazi, Temani, Mibizari,

⁴³ Magidieli na Iramu.