Kîam 34 - ÎVUKU RÎA ÛVORO MWARO

Dina nîwanyitirwe na vinya na akîmenywa kîîmwîrî

¹ Mûthenya ûmwe Dina mwîrîtu wa Jakovu na Lea; nîwathiîre gûcerera aka amwe a Kanaani.

² Rîrîa Shekemu mûvîcî wa Hamori ûrîa Mûhivi oonire Dina, nîwamûnyitire na akîmûmenya kîîmwîrî na vinya. Shekemu nîke warî mûnene wa vûrûri ûcio.

³ Shekemu nîwendire Dina mwîrîtu wa Jakovu na ngoro. Kwoguo nîwamwaragîria na wendo nîguo Dina wanake amwende.

⁴ Shekemu nîwacokire akîra îthe Hamori atîrî, “Nîrenda ûmbocere Dina atuîke mûka wakwa.”

⁵ Jakovu nîwegwire atî mwarî aarî mûmenye kîîmwîrî na vinya. Nwatî nîûndû avîcî ake maarî kîthakarî kûrîthia ndîthia yake, nîwakirîrîrie nginya rîrîa meenûkire.

⁶ Hamori îthe wa Shekemu nîwathiîre kwaria na Jakovu.

⁷ Vîndî îo avîcî a Jakovu nîmaaumire kûrîthia. Na rîrîa meegwire ûvoro ûcio, nîmaamakire na makîrakara mûno nîûndû wa ûrîa Shekemu eekîte. Na njîra ya gîko kîu gîa kûnyita mwarî wa Jakovu na vinya na kûmûmenya kîîmwîrî, Shekemu nîwaretire gîconoko kûrî andû a Isiraeli. Ûndû ta ûcio ndwagîrîrwe nî gwîkîka.

⁸ Nwatî Hamori nîwerire Jakovu vamwe na avîcî ake atîrî, “Mûvîcîwa Shekemu nîaûmbîtwe nî mwarîguo. Nakûthaitha ûreke amûvikie.

⁹ Tigani tûrîkanîre atî tûkaavikagia erîtu enyu namue mûkavikia etû.

¹⁰ Mue nwa mwîkare vûrûrirî ûyû wetû na mûtûûre wa varîa mûndû angîenda, na nwa mûrutage wîra wa kûgûra na kwendia mûtagwîtigîra, na mûgîe na indo cienyu.”

¹¹ Shekemu nîwacokire akîra îthe wa Dina na aa mûrwang'ina atîrî, “Mbîtîkîrani na kîrîa kîonthe mûkambîtia nîngûmûnengera.

¹² Mbîrani kîrîa kîonthe mûkwenda nîmûnengere, na mwîtie îrîvi înene wata ûrîa mûkwenda, nie nîngûmûnengera ethîrwa nîmûkûmbîtîkîria mvikie Dina.”

¹³ Na nîûndû Shekemu nîwekîte Dina gîko gîa gîconoko, avîcî a Jakovu nîmaamacokerie na njîra ya wara atîrî,

¹⁴ “Tue tûtingîtîkîra mwîrîtu wetû avikue nî mûndû ûtarî mûruu; nîûndû ûcio ûngîthîrwa ûrî ûndû wa gûtûconorithia.

¹⁵ Ûndû ûrîa ûngîtûma twîtîkîre ûvikie Dina nwa arûme onthe enyu marwithirue mekare tatue.

¹⁶ Mweka ûguo, tue nîtûgwîtîkîra mûvikagie erîtu etû, natue tûvikagie erîtu enyu, na twîkare gûkû kwenyu tûtuîke kîndû kîmwe.

¹⁷ Mwarega gwîtîkîra ûguo tûramwîra na mûrue, nîtwoca mwîrîtu wetû tûkînathiî.”

¹⁸ Maûndû mau nîmaakenirie Hamori na mûvîcî Shekemu.

¹⁹ Shekemu ndaata kavinda atekîte ûguo eerirwe, nîûndû nîwendete Dina mwarî wa Jakovu. Shekemu nîke waveetwe gîtîîo mûno kwao mûciî.

²⁰ Kwoguo Hamori na mûvîcî Shekemu nîmaathiîre varîa vaacemanagua vakuvî na kîvingo gîa îtûûra, na makîra andû onthe a îtûûra atîrî,

²¹ “Andû aya nî arata etû; tigani matûûre vûrûrirî ûyû wetû, na magûrage na makendia matagwîtigîra. Vûrûri ûyû nî mûnene wa kûmegana wa nao. Tigani tûvikagie erîtu ao nao mavikagie erîtu etû.

²² Nwatî ûndû ûrîa ûngîtûma andû acio metîkîre gûtûûrania natue na tûtuîke kîndû kîmwe nao nî atî: Arûme onthe etû marue wata ûrîa o marî aruu.

²³ Na kinthî ndîthia yao yonthe na indo irîa ciîngî cionthe marî nacio itigûtuîka cietû twetîkîra ûrîa maakuuga? Kwoguo tigani twîtîkîre matûûranie natue.”

²⁴ Nao andû onthe a îtûûra rîu nîmetîkanirie na Hamori na mûvîcî Shekemu nao arûme onthe a îtûûra rîu nîmaaruire.

²⁵ Mîthenya îthatû kuuma andû acio marua na magîtuuragwa mûno nîûndû wa kwimba, avîcî aîrî a Jakovu Simeoni na Lawi, arîa maaciaranîrîtue na Dina, nîmoocire mviû ciao na makîthiî îtûûrarî rîu na nthitho na makîûraga arûme onthe.

²⁶ Nîmaaûragire Hamori na mûvîcî Shekemu na magîcoka makîruta Dina gwa Shekemu nyomba na makîthiî nake.

²⁷ Vuva wa kûragana, avîcî acio engî a Jakovu nîmaathiîre kûu kwaûraganîtwe na magîtava indo îtûûrarî rîu nîguo merîvîrîrie maûndû ma gîconoko marîa mwarwang'ina eekîtwe.

²⁸ Nîmoocire ng'ondu, ng'ombe, mvunda na kîrîa kîonthe Kîamrî îtûûrarî rîu na mîgûndarî.

²⁹ Nîmaatavire ûtonga wa andû acio wonthe, twana twao, aka ao, na indo cionthe irîa ciarî nyomba ndaarî.

³⁰ Jakovu nîwerire Simeoni na Lawi atîrî, “Mue nîmwandetera thîna. Nîûndû Akanaani, Aperizi na andû onthe a vûrûri ûyû nîmakûmena. Ndirî na arûme eengî, na kwoguo andû a gûkû mangînyitana vamwe na manthithûkîre nwa mambûrage vamwe na andû akwa.”

³¹ Nao nîmaamûcokerie atîrî, “Tûtingîtîkîra mwarwaiya ekwe maûndû ta ma mûmaraa.”