Kîam 32 - ÎVUKU RÎA ÛVORO MWARO

Jakovu nîwevaarîrie gûcemania na Esaû

¹ Jakovu nîwathiîre na mbere na rûgendo rwake, na arî rûgendorî, nîwatûnganire na araika.

² Rîrîa oonire araika acio nîwaugire atîrî, “Îno nî mbûtû ya athigari a Ngai.” Kwoguo nîwetire vandû vau Mahanaimu.

³ Jakovu nîwatûmire anjaama kûrî mûrwang'ina Esaû vûrûrirî wa Edomu. Andû acio mathiîre marî mbere yake.

⁴ Jakovu nîwerire andû acio mathiî makeere Esaû atî ndungata yake Jakovu yauga atîrî, “Ndûûraga ûgenirî kwa Labani na ndûûrîte kuo nginya ûmûnthî.

⁵ Nîrî na ng'ombe, mbûri na mvunda, ng'ondu wana ndungata cia arûme na cia aka. Natûmana kûrî we mwathi wakwa, ngîîrîgagîrîra atî nîngwîtîkîrîka nîwe.”

⁶ Anjaama arîa Jakovu aatûmîte nîmaacokire na makîmwîra atîrî, “Nîtûthiîre kûrî mûrwanyûkwe Esaû, na nîagûka gûgûtûnga arî na andû magana mana.”

⁷ Jakovu nîwegwire guoya na agîtangîka mûno. Nîwagaanirie andû arîa aarî nao, mbûri na ng'ondu, ng'ombe na ngamîîra, maita maîrî.

⁸ Ekire ûguo agîciragia atî, Esaû angîûka arûe na gîkundi kîmwe, kîu kîngî nîgîkûûra.

⁹ Jakovu nîwavoire atîrî, “Ngai wa methe makwa Iburahimu, na Isaka; we Ngai-Mûnene wambîrire njoke vûrûrirî wetû na kûrî andû etû, na atî nîûgaatûma maûndû makwa matuîke maro.

¹⁰ Ndirî mwagîrîru wanarî vanini wa kwonua wendo ûtathiraga na wîvokeku ûrîa ûmonetie nie ndungata yaku. Naaringire rûnjî rwa Jorodani nîrî na mûragi tu, na rîu naûka na ikundi igîrî.

¹¹ Nakûthaitha ûmvonokie kuuma kûrî mûrûwaiya Esaû. Nînîretigîra atî avota gûka gûtûûraga tuonthe ciana wana aa ng'ina.

¹² Nwatî we nîwambîrire atî nîûkaanthondekera maûndû makwa monthe, na atî nîûkaamva njiarwa nyîngî itangîtarîka ta mûthanga ûrîa ûrî rûtere rwa îria.”

¹³ Ûtukû ûcio Jakovu nîwararire vandû vau, na akîthuura kîveo gîa kûva mûrwang'ina Esaû kuuma kûrî indo ciake.

¹⁴ Nîwathuurire mvarika magana maîrî na nthenge mîrongo îîrî, mîatî magana maîrî, na ndûrûme mîrongo îîrî,

¹⁵ ngamîîra mîrongo îthatû irîa ciakamagwa vamwe na njaû ciacio. Ng'ombe cia nga mîrongo îna, na ndegwa îkûmi; mvunda mîrongo îîrî cia nga na îkûmi cia nûme.

¹⁶ Jakovu nîwagaanirie nyamû icio kûrî ndungata ciake, na akîva wa ndungata ndîthia nîguo îmenyagîrîre. Jakovu nîwerire ndungata ciake atîrî, “Thiîni mbere yakwa na mûtigatukanie ndîthia, mûtigage mwanya gatagatîrî ka ndîthia na îrîa îngî.”

¹⁷ Jakovu nîwerire ndungata yake îrîa yatongoretie atîrî, “Rîrîa mûgaatûngana na mûrwaiya Esaû, na akûrie wî wa û, na nîkû ûthiîte, na indo ino nî ciaû?

¹⁸ Ûkamûcokeria atîrî, ‘Nî cia ndungata yaku Jakovu. Aitûmîte irî kîveo kûrî mwathi wake Esaû. Jakovu ke mwene arî ava vuva wetû.’ ”

¹⁹ Jakovu nîwerire ndungata îrîa yarî na ndîthia ya kaîrî wa na ya kathatû wana icio ciîngî atîrî, “Mwatûngana na Esaû mûmwîre wa ûguo,

²⁰ na mûcoke mûmwîre atîrî, ‘Ndungata yaku Jakovu îrî ava vuva wetû.’ Jakovu eeciragia atî nwakûvoteke akavoreria Esaû na iveo irîa ikaathiî mbere yake magîgaakinyia vîndî ya kwonana na monana avota gûkaamwîtîkîra.”

²¹ Kwoguo Jakovu nîwatûmanire kîveo kîu kîthiî mbere yake, na ûtukû ûcio ke mwene nîwaraarire kûrîa aambîte îgema.

Jakovu arî Penieli nîwagianire na Ngai

²² Ûtukû wa ûcio, Jakovu nîwaûkîrire, agîoca aka ake oîrî na ndungata irîa cia aka igîrî, ciana ciake îkûmi na ûmwe, na akîringa karûnjî ka Jaboku.

²³ Amaringia, nîwacokire akîringia indo icio ciîngî cionthe aarî nacio,

²⁴ nwatî ke aatigirwe arî wenga. Mûndû ûmwe nîwaûkire na akîgiana nake nginya gûgîkîa.

²⁵ Rîrîa mûndû ûcio oonire atî nîakûvootwa nî Jakovu, nîwamûringire ngunguro, nakuo kûgûrû kwa Jakovu gûkîvenûka.

²⁶ Nake mûndû ûcio nîwerire Jakovu atîrî, “Tiga nthiî nîûndû kûthiîte gûkîa.” Nake Jakovu nîwamûcokerie atîrî, “Ndingîkûrekereria ûthiî ûtandathimîte.”

²⁷ Mûndû ûcio nîwaûririe Jakovu atîrî, “Wîtagwa atîa?” Nake nîwacokirie atîrî, “Jakovu”.

²⁸ Nake mûndû ûcio nîwerire Jakovu atîrî, “We ndûgeetwa Jakovu rîngî nîûndû nîwagiana na Ngai na andû na wavootana, we ûgeetagwa Isiraeli.”

²⁹ Jakovu nîwerire mûndû ûcio atîrî, “Nakûthaitha, mbîra wîtagwa atîa?” Mûndû ûcio nîwamûcokerie atîrî, “Ûrenda kûmenya rîîtwa rîakwa nîkî?” Nîwacokire akîrathima Jakovu.

³⁰ Jakovu nîwaugire atîrî, “Nie nîmonanîte na Ngai ûthiû kwa ûthiû, na nîrî wa mwoyo.” Kwoguo Jakovu nîwetire vandû vau Penieli.

³¹ Riûa nîrîarathire Jakovu arî njîrarî aumîte Penieli, na nîwathuaga nîûndû ngunguro yake yarî mvenûku.

³² Nginya ûmûnthî Aisiraeli matirîcaga nyama ya ngunguro ya nyamû wa yonthe nîûndû nîvo Jakovu aaringirwe.