Kîam 26 - ÎVUKU RÎA ÛVORO MWARO

Isaka nîwatûûrire Gerari

¹ Vûrûrirî ûcio nîkwagîre na yûra rîngî tiga rîrîa rîarî kuo vîndî ya Iburahimu. Nîûndû wa ûguo, Isaka nîwathiîre Gerari kûrî Abimeleki mûthamaki wa Afilisiti.

² Ngai-Mûnene nîwaumîrîre Isaka na akîmwîra atîrî, “Ndûkathiî Misiri; îkara vûrûrirî ûrîa ngûkwîra wîkare.

³ Tûûra vûrûrirî ûyû na ngethagîrwa nîrî vamwe nawe na nîngaakûrathima. Nîngaakûva vûrûri ûyû wonthe, we na njiarwa ciaku, na nîngaavingia kîîranîro gîakwa kîrîa neerîre Iburahimu na mwîvîtwa.

⁴ Nîngaakûva njiarwa nyîngî ta njata irîa irî îgûrû, na njoke nîmave vûrûri ûyû wonthe. Nîigaatuîka kîrathimo kûrî ndûrîrî cionthe cia nthî.

⁵ Nîngaakûrathima nîûndû Iburahimu nîwambathîkîre na akîathîkîra mataaro makwa na mawatho makwa monthe.”

⁶ Kwoguo Isaka nîwatûûrire kûu Gerari.

⁷ Rîrîa arûme a kûu maamûririe maûndû megiî mûka, Isaka nîwamerire atîrî, “Ûyû nî mwarwaiya.” Aameerire ûguo nîûndû nîwetigagîra kûmeera atî nî mûka wake nîûndû andû a kûu nîmangîamûragire nîguo moce Rebeka, nîûndû wa ûrîa aarî mûthaka.

⁸ Isaka ekaranga kûu, Abimeleki mûthamaki wa Afilisiti nîwarorererie na ndirica na akîona Isaka akîarara mûka Rebeka.

⁹ Abimeleki nîwetire Isaka na akîmûria atîrî, “Kwoguo ûyû nî mûkaguo! Nîndûî kîratûmire uge atî nî mwarwanyûkwe?” Nake Isaka nîwacokirie atîrî, “Neciragia atî nauga Rebeka nî mûka wakwa, nîngûragwa.”

¹⁰ Abimeleki nîwamûûririe atîrî, “Nî atîa ûguo ûtwîkîte, kethîrwa mûndû ûmwe gatagatîrî getû nîaramenyanire kîîmwîrî na mûkaguo, nîûngîratûretere kîrumi.”

¹¹ Abimeleki nîwarutire watho na akîra andû onthe atîrî, “Mûndû wa wonthe ûgeeka mûndû ûyû, kana mûka ûndû mûcûku, nwanginya akaaûragwa.”

¹² Mwaka ûcio Isaka nîwavandire mbeû mûgûndarî ûcio, na nîwakethire maita îgana rîa mbeû îrîa aavandîte, nîûndû Ngai-Mûnene nîwamûrathimîte.

¹³ Indo cia Isaka nîciathiîre na mbere kwongereka na agîtuîka gîtonga kînene.

¹⁴ Isaka aarî na ndîthia nyîngî cia ng'ondu na ng'ombe, wana ndungata nyîngî. Nao Afilisiti nîmaagîre na wîru nîûndû wake.

¹⁵ Kwoguo nîmaathikire ithima cionthe irîa cienjîtwe nî ndungata cia îthe Iburahimu rîrîa aarî mwoyo.

¹⁶ Abimeleki nîwerire Isaka atîrî, “Uma gûkû vûrûrirî wetû, nîûndû nîûgîte na vinya gûtûkîra.”

¹⁷ Kwoguo Isaka nîwaumire kûu na akîthiî Kîandarî Kîam Gerari na agîtûûra kuo.

¹⁸ Nîwathikûririe ithima irîa cienjîtwe vîndî ya Iburahimu, na ciathikîtwe nî Afilisiti rîrîa Iburahimu aakwire. Isaka nîwetire ithima icio marîîtwa wa marîa cietîtwe nî îthe.

¹⁹ Ndungata cia Isaka nîcienjire kîthima kûu Kîamndarî na gîkiuma manjî.

²⁰ Nwatî arîthi a kûu Gerari nîmaakararanirie na arîthi a Isaka makiugaga atîrî, “Manjî mama nî metû.” Kwoguo Isaka nîwatuîrîre kîthima kîu rîîtwa Ezeku (Ngarari).

²¹ Ndungata cia Isaka nîciacokire ikînja kîthima kîngî, na gûkîgîa ngarari îgûrû rîgiî kîthima kîu wanakîo. Kwoguo Isaka nîwagîtire Sitina, (Ûthû).

²² Isaka nîwathaamire vandû vau na akîthiî akînja kîthima kîngî, na gîtiagîa na ngarari. Kwoguo Isaka nîwetire kîthima kîu Rehobothi (Wîyathi). Nîwaugire atîrî, “Rîu Ngai-Mûnene nî mûtûveu wîyathi tûtûûre gûkû, na nî tûkûthegeera kuo.”

²³ Isaka nîwaumire kûu na akîthiî Beerisheba.

²⁴ Ûtukû ûcio Ngai-Mûnene nîwaumîrîre Isaka akîmwîra atîrî, “Nînie Ngai wa aguo Iburahimu. Ndûgetigîre nîûndû nîrî vamwe nawe. Nîngaakûrathima na ndûme njiarwa ciaku ithegee nîûndû nînarîkanîre na ndungata yakwa Iburahimu.”

²⁵ Isaka nîwatumire metha ya kîgongoona vau, na akîgooca Ngai-Mûnene. Nîwacokire akîamba îgema rîake vau nacio ndungata ciake ikînja kîthima kîngî.

Isaka na Abimeleki nîmaarûthire kîrîkanîro

²⁶ Abimeleki, Ahuzathu Mûmûtaari na mûnene wa athigari ake wetagwa Fikoli, nîmaathiîre kûrî Isaka.

²⁷ Nake Isaka nîwamaûririe atîrî, “Mwaûka kûrî nie nîkî na mwamenire na mûkîmîngata vûrûrirî wenyu?”

²⁸ Nao nîmaamûcokerie atîrî, “Rîu tue nîtûmenyete nama atî Ngai-Mûnene arî vamwe nawe, na nîtûrona kwagîrîte tûthondeke mwîvîtwa gatagatîrî getû nawe na tûthondeke kîrîkanîro nawe. Twîrîre

²⁹ atî ndûgaatûîka ûndû mûcûku nîûndû wanatue tûtiagwîka ûndû mûcûku. Tue twagwîkire maûndû maro na tûkîrekia ûthiî na thayû. Rîu Ngai-Mûnene nîakûrathimîte.”

³⁰ Isaka nîwamarugîre, makîrîa na makînyua.

³¹ Mûthenya ûcio wîngî nîmaaramûkire karaûko tene makîrûtha kîrîkanîro na makîîvîtanîra. Isaka nîwacokire akîmaugîra ûvoro magîtigana na thayû.

³² Mûthenya wa ûcio ndungata cia Isaka nîciaûkire na ikîmwîra ûvoro wîgiî kîthima kîrîa meenjîte. Nîmaamwîrire atîrî, “Nîtwona manjî.”

³³ Isaka nîwetire kîthima kîu Shiba (Mwîvîtwa.) Vau nîvo îtûûra rîa Beerisheba rîarutire rîîtwa.

Esaû nîwavikirie aka aîrî a Ndûrîrî

³⁴ Rîrîa Esaû aakinyirie mîaka mîrongo îna, nîwavikirie erîtu aîrî Ahiti. Ûmwe eetagwa Judîthi mwarî wa Be-eri, na Basemathi mwarî wa Eloni.

³⁵ Aka a acio nîmaanyamaririe Isaka na Rebeka mûno.