Kîam 25 - ÎVUKU RÎA ÛVORO MWARO

Njiarwa ciîngî cia Iburahimu

¹ Iburahimu nîwavikirie mûka wîngî wetagwa Ketura.

² Ketura nîwaciarîre Iburahimu Zimurani, Jokishani, Medani, Midiani, Ishibaku na Shua.

³ Jokishani nîke warî îthe wa Sheba na Dedani. Njiarwa cia Dedani ciarî: Ashurimu, Letushi na Leumimu.

⁴ Avîcî a Midiani maarî: Efa, Eferi, Hanoku, Abida na Elida. Acio onthe maarî njiarwa cia Ketura.

⁵ Iburahimu nîwatigîre Isaka indo cionthe irîa aarî nacio.

⁶ Nwatî avîcî arîa aagîte na aka ake a kwiga aamaveere iveo. Arî wa mwoyo, Iburahimu nîwengatire anake acio kuuma kûrî Isaka na makîthiî mwena wa îrathîro.

Gûkua na kûthikwa kwa Iburahimu

⁷ Iburahimu aakwire arî na ûkûrû wa mîaka îgana rîa mîrongo mûgwanja na îtano (175).

⁸ Aakwire arî mûkûrû mûno na akîthikwa.

⁹ Ciana ciake Isaka na Ishumaeli, nîciamûthikire ngurungarî ya Makipela, mûgûndarî ûrîa warî mwena wa îrathîro wa Mamure. Mûgûnda ûcio warî wa Efironi mûvîcî wa Zohari ûrîa warî Mûhiti.

¹⁰ Mûgûnda ûcio nî ûrîa Iburahimu aagûrîte kuuma kûrî Ahiti, na nîkuo Iburahimu na mûka Sara maathikirwe.

¹¹ Vuva wa gîkuû Kîam Iburahimu, Ngai nîwarathimire mûvîcî Isaka. Isaka nîwatûûrire vakuvî na kîthima kîrîa gîtagwa “Kîthima Kîam Ûrîa Ûrî Mwoyo na Ûmonaga”.

Njiarwa cia Ishumaeli

¹² Ino nîcio njiarwa cia Ishumaeli mûvîcî wa Iburahimu. Ishumaeli aaciarirwe nî Hagari ûrîa warî Mûmisiri. Hagari eethîrîtwe arî ndungata ya Sara.

¹³ Mama nîmo marîîtwa ma avîcî a Ishumaeli marûmanîrîrîte kûringana na ûrîa maaciarirwe. Nebaiothi nîke warî îrikithathi. Aarûmîrîrîtwe nî Kedari, Adibeli, Mibusamu,

¹⁴ Mishima, Duma, Masa,

¹⁵ Hadadi, Tema, Jeturi, Nafishi na Kedema.

¹⁶ Acio nîo maarî avîcî îkûmi na aîrî a Ishumaeli na nîo methe ma tene marîa metanîtue na athani arîa îkûmi na aîrî. Namo matûûra mao vamwe na kûrîa mambîte magema gwîtanîtue na marîîtwa mao.

¹⁷ Ishumaeli aakwire arî na ûkûrû wa mîaka îgana rîa mîrongo îthatû na mûgwanja (137).

¹⁸ Njiarwa cia Ishumaeli ciatûûraga kuuma Havila nginya Shuru, mwena wa îrathîro wa Misiri, njîrarî îrîa îthiîte Asîria. Maatûûraga matakwîgucana na njiarwa icio ciîngî cia Iburahimu.

Gûciarwa kwa Esaû na Jakovu

¹⁹ Ino nîcio njiarwa cia Isaka mûvîcî wa Iburahimu. Iburahimu nîke warî îthe wa Isaka.

²⁰ Isaka aarî na ûkûrû wa mîaka mîrongo îna rîrîa aavikirie Rebeka mwarî wa Bethueli. (Mûaramea wa kuuma Mesopotamia) Rebeka aarî mwarwang'ina wa Labani.

²¹ Rebeka aarî nthata, na Isaka nîwavoire kûrî Ngai-Mûnene nîûndû wake. Ngai-Mûnene nîwegwire mavoya make na Rebeka akîgîa îvu.

²² Îvu rîu rîarî rîa mathatha, na mbere ya aciara, ciana icio nîciagianaga. Rebeka nîweyûragia gîtûmi Kîam ûndû ûcio wîkîke. Kwoguo nîwathiîre kûrî Ngai-Mûnene kûmûria gîtûmi Kîam ûndû ûcio.

²³ Nake Ngai-Mûnene nîwamwîrire atîrî, “Ndaarî yaku kûrî na ndûrîrî igîrî, we nîûgaaciara andû a mîvîrîga îîrî. Nao nî magaatûûra marûaga, ûmwe nîûgakîria ûrîa wîngî vinya. Ûrîa mûkûrû nîagaatungatîra ûrîa mûnini.”

²⁴ Rebeka nîwakinyirie îvinda rîa gûciara, na nîwagîre na twana twa mathatha.

²⁵ Kaana karîa gaaciarirwe mbere kaarî gatune na mwîrî wako wonthe wakunîkîtwe nî guoya takwa arî guo geekîrîte. Kwoguo nîgaatuîrîrwe rîîtwa Esaû.

²⁶ Kaana ga kaîrî gaaciarirwe kanyitîte nthûng'wa ya Esaû. Kwoguo nîgaatuîrîrwe rîîtwa Jakovu. Isaka aarî na ûkûrû wa mîaka mîrongo îtandatû rîrîa twana tûu twaciarirwe.

Esaû nîwendirie ûrikithathi wake kûrî Jakovu

²⁷ Rîrîa tûvîcî tûu tuoîrî twakûrire, Esaû nîwatuîkire mûguîmi mwaro, kwoguo aatindaga kîthakarî. Nwatî Jakovu aarî mûkiri na kwoguo aatindaga mûciî.

²⁸ Isaka nîwendete Esaû nîûndû nîwakenaga akîrîa nyama cia nyamû irîa Esaû aaûragaga, nwatî Rebeka eendete Jakovu.

²⁹ Mûthenya ûmwe Jakovu nîwarugire gîtwero Kîam ndengû. Nake Esaû nîwaûkire aumîte kîthakarî kûguîma avûtîte mûno,

³⁰ na akîra Jakovu atîrî, “Tanûmia tûirio tûu twaku tûtune nîûndû nîrî mûvûtu.” (Kîu nîkîo gîatûmire etwa Edomu).

³¹ Nake Jakovu nîwamwîrire atîrî, “Mbere nwa wambire kûmenderie ûrikithathi waku.”

³² Esaû nîwaugire atîrî, “Rîu nîrî vakuvî gûkua, ûrikithathi ûcio wakwa nîûng'una na kî?”

³³ Jakovu nîwamûcokerie atîrî, “Amba wîvîte atî nîûkûmenderia ûrikithathi waku.” Esaû nîwevîtire, na akîenderia Jakovu ûrikithathi wake.

³⁴ Jakovu nîwarûmirie Esaû mûgate na gîtwero Kîam ndengû. Nîwarîre na akînyua agîcoka akîthiîra. Ûguo nîguo Esaû aateere ûrikithathi wake.