Kîam 22 - ÎVUKU RÎA ÛVORO MWARO

Ngai nîwathire Iburahimu arute Isaka arî îgongoona

¹ Vuva wa maûndû mau Ngai nîwageririe Iburahimu. Nîwamwîrire atîrî, “Iburahimu!” Nake Iburahimu nîwacokirie atîrî, “Îî nîrî ava!”

² Nake Ngai nîwamwîrire atîrî, “Oca Isaka mwana waku wa kîmomwe ûrîa wendete mûno, na mûthiî nake vûrûrirî wa Moria. Thiî kîrîmarî kîrîa ngaakwonia na ûrute Isaka arî îgongoona rîa kûvîvua.”

³ Mûthenya ûcio warûmîrîrîte kîraûko tene Iburahimu nîwaunire ngû cia kûvîvia îgongoona, na agîcigîrîra îgûrû rîa mvunda yake. Nîwocire Isaka na ndungata ciake igîrî na akîthiî kûrîa Ngai aamwîrîte.

⁴ Mûthenya wa kathatû Iburahimu nîwaroririe arî varaca na akîona kûndû kûu.

⁵ Nîwerire ndungata ciake atîrî, “Mue îkaragani ava vamwe na mvunda, nîguo nie na mûvîcîwa tûthiî kûrîa kîrîmarî tûkavoe tûcoke tûke.”

⁶ Iburahimu nîwaîkire mûvîcî Isaka ngû cia kûvîvia îgongoona, nake nîwakuire kaviû na makara ma mwaki na makîthiî vamwe.

⁷ Marî njîrarî Isaka nîwaûririe îthe atîrî, “Vava” Nake îthe nîwetîkirie atîrî, “Mûvîcîwa.” Nake Isaka nîwaûririe atîrî, “Taroria, ino nî ngû na mwaki, nayo ndûrûme ya îgongoona îrî va?”

⁸ Iburahimu nîwacokerie Isaka atîrî, “Mûvîcîwa Ngai ke mwene nîakûvecana ndûrûme ya îgongoona.” Kwoguo wa oîrî nîmaathiîre na mbere na rûgendo rwao.

⁹ Rîrîa maakinyire varîa Ngai aameerîte, Iburahimu nîwarûthire metha ya kîgongoona. Nîwacokire akîara ngû waro, akîovania mûvîcî Isaka, na akîmwigîrîra îgûrû rîa ngû metharî ya kîgongoona.

¹⁰ Nîwacokire agîoca kaviû na agîgaûkîrîria nîguo aûrage mûvîcî.

¹¹ Nwatî mûraika wa Ngai-Mûnene kuuma îgûrû nîwamwîtire akîmwîra atîrî, “Iburahimu, Iburahimu!” Nake nîwacokirie atîrî, “Îî nîrî ava.”

¹² Mûraika nîwerire Iburahimu atîrî, “Ndûkavutie kamwana kau kana ûgeke ûndû; nîûndû nînamenya atî we nîûtîîte Ngai na nîûmwathîkagîra, nîûndû ndûnamûgiria mûvîcîguo wa kîmomwe.”

¹³ Rîrîa Iburahimu eenamûkire, nîwonire ndûrûme înyitîtwe mvîa nî mîrigica. Nîwathiîre akîmîoca na akîmîrutîra Ngai îgongoona rîa kûvîvua îthenya rîa mûvîcî.

¹⁴ Kwoguo Iburahimu nîwetire vandû vau “Ngai-Mûnene nîavecanaga”. Nginya ûmûnthî andû maugaga atîrî, “Kîrîmarî Kîam Ngai-Mûnene, nîavecanaga.”

¹⁵ Mûraika wa Ngai-Mûnene kuuma îgûrû nîwetire Iburahimu rita rîa kaîrî na akîmwîra atîrî,

¹⁶ “Ngai-Mûnene nîevîtîte akîgwetaga rîîtwa rîake akiugaga, atî nîngaakûrathima nîûndû ndûnangiria mûvîcîguo wa kîmomwe.

¹⁷ Nama nîngaakûrathima na njiarwa nyîngî ta njata cia îgûrû kana ta mûthanga ûrîa ûrî rûtererî rwa îria. Njiarwa ciaku nîikaavoota nthû ciao.

¹⁸ Na njîra ya njiarwa ciaku ndûrîrî cionthe cia nthî nîikaarathimwa nîûndû nîwambathîkîre.”

¹⁹ Iburahimu nîwacokire kûrî ndungata ciake, na onthe nîmaacokire Beerisheba na Iburahimu agîtûûra kuo.

Njiarwa cia Nahoru

²⁰ Vuva wa maûndû mau Iburahimu nîwerirwe atî Milika nîmûciarîru Nahoru, mûrwang'ina ciana inyanya. Nao nî:

²¹ Uzi, Buzi, Kemueli îthe wa Aramu,

²² Kesedi, Hazo Pilidashu, Jidilafu na Bethueli,

²³ îthe wa Rebeka. Ciana icio inyanya nîcio Milika aaciarîre Nahoru, mûrwang'ina wa Iburahimu.

²⁴ Reuma mûndû mûka ûrîa waigîtwe nî Nahoru nîwamûciarîre Teba, Gahamu, Tahasha na Maaka.